Te haapaoraa i te mau metua ruhiruhia

“E MEA ohipa vau i te mahana atoa, e e tia atoa vau i te po, tera râ, te manaˈo noa ra vau e e haamaitairaa te reira.” O te reira ta te hoê metua vahine faaipoipohia i faataa i te haapaoraa i to ˈna mama ruhiruhia. No tera vahine, e no vetahi atoa, te haapaoraa i te mau metua ruhiruhia e ohipa maitai.

E riro atoa ei hau aˈe i te hoê ohipa matauhia. Te pǔpǔ paari roa ˈˈe i te Hau Marite ua hau oia i te area e 75 matahiti. I te matahiti 1900, e iti aˈe e hoê mirioni feia marite e 75 matahiti aore ra e hau atu. I te matahiti 1980 e fatata e ahuru mirioni e ua hau e 75 matahiti. Te ora maoro nei te feia paari, e te titau ra e fatata e toru i nia i te feia e 85 matahiti aore ra hau atu i te hoê tauturu tamau.

E nehenehe te haapaoraa i te hoê taata hapepa e riro ei ohipa maitai, e mea hepohepo. Mai te peu e e mea ruhiruhia hoê aore ra na metua e piti e te titau nei ia haapaohia ratou, e ite outou i te tahi mau tuhaa fifi. Te mauiui nei outou ia ite anaˈe outou ia ratou i te itiraa i te pae oraora-maitai-raa. E mai te peu e te fanaˈo ra outou i te tahi tauturu iti aore ra aita no ǒ mai te tahi atu mau melo utuafare, na outou ïa e rave te rahiraa o te atuaturaa ia ratou.

E ite atoa outou e noa ˈtu eaha to outou matahiti, eita outou e manaˈo e ua paari outou ia vai anaˈe outou i pihai iho i to outou mau metua. Te faariro noa râ ratou ia outou mai te hoê tamarii, e mea tia e ia pahono outou mai te reira te huru. E nehenehe te ereraa o te turu i te pae o te manaˈo hohonu no ǒ mai i te mau hoa e faarahi i te taiâraa i te taime haapaoraa i te mau metua.

Tera râ, eiaha ia vaiiho i te mau haafifiraa o te haapaoraa i te mau metua ia faaore i to outou taairaa piri e to outou mau metua. Te faaue ra te mau Papai ma te papu i te taata paari ia “rave na ratou i te paieti i te faaamuraa i to ratou iho fetii, a tahoo ai i te mau metua ra: e mea maitai hoi te reira e te au i te aro o te Atua ra.” I te tahi pae, e “tiahi ê i te metua vahine, e tamaiti faatupu ïa i te haama e te faaino.”—Timoteo 1, 5:4; Maseli 19:26.

E nehenehe te paieti faaitehia na roto i te haapaoraa i te metua e riro ei ohipa faufaa. Tera râ, na mua, e mea maitai ia ite outou eaha te tauturu ta to outou mau metua e titau nei. E tauturu te mau tumu parau i muri iho ia outou ia ite e ia haamâha i taua mau hinaaro ra. E a haapapu noa ˈi teie mau tumu parau i te mea e nehenehe e ravehia i te fare, e mea taa maitai e i roto i te tahi mau tupuraa, no te inoraa i te pae tino aore ra te paari-roa-raa, e titau paha te hoê metua i te tauturu o te feia aravihi, mai te itehia ra i roto i te hoê fare maˈi.