No te aha hoi e tiai uˈana ˈi i te ao apî?

Te hopea o teie nei ao—Fatata roa?

EAHA hoi te auraa te parau no te hopea o teie nei ao? Te haamouraa anei na roto i te auahi, mai ta vetahi mau haapaoraa e haapii ra? Eita; nafea ïa te reira e nehenehe ai, inaha te na ô ra te Salamo 104:5 e: “Na oe i haamau i te tumu o te fenua, ia ore roa ia aueue?”

E ite tatou i te pahonoraa ia hiˈo tatou e rave rahi senekele i muri, i te hoê ao i na mua ˈtu i teie nei ao. Ua riro hoi ei ao viivii e tei patoi i te Atua, e inaha, “i pohe ai te reira fenua i te ninaraahia e te miti.” Tera râ a mou ai taua ao ra, te vai ra hoi to ˈna raˈi e to ˈna fenua, i te diluvi o te anotau o Noa, aita te mau raˈi mau e te fenua mau i mou. Oia atoa te hopea o teie nei ao e ere ïa te mou-roa-raa teie nei raˈi tei î i te fetia e teie nei palaneta Fenua.—Petero 2, 3:5, 6; Genese 6:1-8.

I te tahi mau taime, e faaohipa te Bibilia i te mau parau ra “raˈi” e te “fenua” i roto i te hoê auraa taipe. E faaohipa-atoa-hia na te parau ra “raˈi” no Satani, te atua o teie nei ao; tei raro aˈe hoi te mau hui mana o teie nei ao i ta ˈna faatereraa; e te mau varua iino i roto i te mau raˈi—o ratou paatoa teie e faaohipa nei i te hoê mana demoni i nia i te huitaata nei. (Korinetia 2, 4:4; Ephesia 6:12) E faaohipa-pinepine-hia te parau ra “fenua” no te faahiti i te parau no te mau nunaa i nia i te fenua nei. (Genese 11:1; Mau Arii 1, 2:1, 2. Paraleipomeno 1, 16:31; Salamo 96:1) O taua mau raˈi e te fenua taipe o teie nei ao iino ta te Petero 2, 3:7 e parau ra e e mou i te “auahi.”—Galatia 1:4.

I muri iho, te faahiti ra o Petero i te parau no te parau apî oaoa oia hoi, e monohia teie nei ao tahito e te hoê ao apî. “Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.

Te hoê ao apî aita e oto e aita atoa e pohe

E mau parau apî oaoa mau â te mau parau ta Petero i faahiti, e faaite ra no nia i taua parau-tia ra e aratai tia i taua ao apî ra, te mau parau râ ta Ioane e faahiti, e hau roa ˈtu ïa i te faahiahia! No nia i taua ohipa ra, teie ta ˈna e parau ra i roto i te Apokalupo 21:3, 4: “Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”

Maoti hoi i te haamou i te fenua i te auahi, te faaau maira Iehova e ia taatahia oia e a muri noa ˈtu: “Te na ô maira hoi Iehova; o tei hamani i te mau raˈi ra; oia te Atua: o tei rave i te fenua e na ˈna hoi i haamau: aita râ oia i hamani ia vaiiho-taata-ore-noa-hia, ua hamani râ oia ia taatahia.”—Isaia 45:18.

O te parau-tia te itehia i reira no te mea aita e taata parau-tia ore faahou: “Na te feia piˈo ore hoi e parahi i te fenua e te feia parau-tia te haapapuhia i reira; e tâpû-ê-hia râ te paieti ore i te fenua nei, e te feia i rave i te hara ra, e taihitumuhia ïa.”—Maseli 2:21, 22.

I raro aˈe i te faauruaraa, ua haapapu atoa mai te papai salamo ra o Davida i te reira i te na ôraa mai e: “No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei. Area te feia mǎrû ra, e parahi ïa i te fenua, e oaoa ratou i te rahi o te hau ra.”—Salamo 37:10, 11.

O Iesu iho tei haapapu mai i te reira, i te na ôraa oia i roto i ta ˈna Aˈoraa i nia i te mouˈa e: “E ao to tei mǎrû; e riro hoi ia ratou te fenua.” Mai ta ratou faatereraa, e haamaitaihia teie mau taata haehaa na te mau raˈi apî haehaa o ta ratou e pure ra: “Ia tae i to oe ra hau. Ia haapaohia to oe hinaaro i te fenua nei, mai tei te ao atoa na.”—Mataio 5:5; 6:10.

Te hau rahi ta te mau taata o taua ao apî ra e fanaˈo, e ite-atoa-hia ïa i roto i te aorai o te mau animala: “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî e te puaatoro haaporia ra, hoê â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê â ïa amuraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. E hauti noa hoi te tamarii aiû i te apoo o te asepi, e te tamaiti no mairi aˈe te û ra, e tuu ïa i te rima i nia i te pupuniraa o te zepho ra. E ore ratou e hauti, e ore e rave ino, i to ˈu atoa nei mouˈa moˈa, te na reira maira Iehova, mai te vairaa miti e î i te miti ra.”—Isaia 11:6-9.

Fatata roa?

Mai te peu e eitâ outou e farii i teie mau mea atoa nei, e eita hoi outou e tiaturi, a feruri â. Hau atu i te mau ohipa i tupu no nia i te tapao ra e rave rahi o ˈna tupuraa no nia i te vairaa mai te Mesia, te vai ra te pǎpǎ-tupuna-raa a te Bibilia tei faaite mai i te matahiti 1914 ei matahiti i reira te vairaa mai o Iesu e haamata ˈi. Ua nenei te mau Ite no Iehova i te matahiti 1914 ei matahiti tapaohia i roto i te tupuraa te faatereraa o te Basileia o Iehova i nia i te fenua nei, i roto i te vea ra Te Pare Tiairaa o te avaˈe tiurai 1879 ra. E rave rahi mau taata tuatapapa aamu e mau taata hiˈopoa i te tereraa o te mau ohipa o te ao nei tei tapao mai e ua iriti te matahiti 1914, i te uputa i nia i te hoê anotau taa ê roa i roto i te aamu o te taata nei, mai ta te api e turu ra i teie nei tumu parau e haapapu ra.

Te tahi atu tupuraa ta Iesu i horoa mai, e itehia ïa i roto i te Mataio 24:21, 22: “E ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu. Ahiri hoi e haamaorohia taua tau ra, aore roa ïa e taata e ora; e haapotohia râ taua tau ra, no te feia maitihia ra.”

Ua faaite atoa mai Iesu e e hope roa taua tapao e rave rahi o ˈna tupuraa i roto i te oraraa o te ui e ite atu i to ˈna haamataraa i te matahiti 1914 ra. I roto i te Mataio 24:32-34, te na ô ra oia e: “E teie nei, ia ite outou i te tahi parabole i te suke nei. Ia oteo te omou rii e mahora aˈera te rau, ua ite ïa outou e ua fatata te auhune i reira: oia atoa i teie nei, ia hiˈo outou i taua mau mea nei, ua fatata te Tamaiti a te taata i reira, ia ite hoi outou; tei te pae uputa ïa. Oia mau ta ˈu e parau atu ia outou nei, E ore e mou teie nei ui e hope ai teie nei mau mea atoa i te tupu.”

E riro mau â te iteraa ˈtu i teie nei ao tahito—e ta ˈna mau tamaˈi atoa, mau oˈe, mau maˈi, e mau pohe—ia hope roa, ei tumu oaoaraa. Te iteraa ˈtu te reira ia monohia e te ao apî parau-tia a te Atua ra o Iehova—e faaore roa i te oto, te mihi, te mauiui, e te pohe—e riro ïa i te faaoaoa e i te arue i te Atua ra o Iehova, te Poiete Rahi e te Arii Manahope o teie nei ao.

Maoti teie nei tiaturiraa i mua ia ratou, eita ïa e maerehia ia tiai uˈana e rave rahi mau taata i taua ao apî parau-tia a Iehova e ia monohia teie ao tahito tei î i te oto, te taparahi taata, te maˈi, e te pohe! Inaha, no te rahi to ratou tiairaa, ratou e rû ai ia tae mai taua ao apî ra! I teie nei râ, aita noa e itehia ra te tahi mau tuhaa taa ê o te tapao o to ˈna hoˈiraa mai no te tamata ia tatou ia faaroo i te mau faaararaa hape. I teie nei e nehenehe tatou e ite i te taatoaraa o te tapao e rave rahi o ˈna tupuraa o te horoa mai i te niu papu e hinaaro uˈana ˈi tatou e ia hope teie nei ao iino e ia monohia oia e te ao apî a Iehova.

[Tumu parau tarenihia i te api 25]

1914—E tuhaa faufaa roa i roto i te Aamu

I MURI noa ˈˈe i te piti o te tamaˈi rahi, e rave rahi tei faariro i te matahiti 1914 ei matahiti faufaa roa i roto i te aamu o teie nei tau:

“O te matahiti 1914 hoi hau atu i te ohipa i tupu i Hiroshima tei tapao i te tuhaa faufaa roa ˈˈe o to tatou nei tau.”—René Albrecht-Carrié, The Scientific Monthly, tiurai 1951.

“Aitâ mai te matahiti 1914 mai, te taata i ite maitai i te mau huru tupuraa o te ao nei, i peapea roa aˈenei i te mea e parauhia ra e te tereraa ohipa i faataahia e haere tia ˈtura i te ino-roa-raa. E rave rahi mau taata feruri maitai tei manaˈo e aita e ohipa e nehenehe e ravehia no te arai i te mau fifi e haere roa ˈtura i te inoraa.”—Bertrand Russel, The New York Times Magazine, 27 no setepa 1953.

“Ua haamata . . . te tau apî i te matahiti 1914 ra, e aita e taata i ite e afea aore ra nafea oia ia hope. . . . E nehenehe hoi oia e hope roa na roto i te haamouraa rahi.”—The Seattle Times, 1 no tenuare 1959.

“E nehenehe mau â hoi te ao taatoa nei e faaore roa i te Tamaˈi rahi Matamua e aitâ tatou i ite e no te aha. . . . E moemoeâ hoi tei itehia. I vai na te hau e te ruperupe. E inaha, ua ore roa te mau mea atoa. Tei roto tatou i te hoê huru tupuraa mai tei ore i itehia aˈenei.”—Taote Walker Percy, American Medical News, 21 no novema 1977.

“I te matahiti 1914 ra, ua erehia te ao nei i te au-maite-raa o tei ore hoi i ite-faahou-hia mai, e i noaa faahou mai. . . . Ua riro mau â te reira ei taime huehue mau e te haavî uˈana, i roto i te otia o te fenua iho e i roto i tera e tera otia.”—The Economist, Lonedona, 4 no atete 1979.

“E haere noa hoi te mau mea atoa i te maitairaa. O te ao ïa i reira to ˈu paariraa. . . . E inaha, ma te manaˈo-ore-hia, i te hoê poipoi o te matahiti 1914, ua hope taua mau mea atoa ra.”—Faatere hau beretane o Harold Macmillan, The New York Times, 23 no novema 1980.

[Hohoˈa i te api 24]

E hau rahi no te taatoara i roto i te ao apî i tǎpǔhia maira