Te tahi mea maitai aˈe i te horoaraa taoˈa i te Noela

“E ONO matahiti to Christopher, ua parau oia ia ˈu, mai te huru e e ohipa matarohia te reira i te ao nei, e i te Noela e ‘aita roa ˈtu ta ˈna e mea aˈe’ e noaa mai. Ua parau mai râ oia ma te inoino ore. O Alexander 8 matahiti, hoê â ïa huru parau ta ˈna i te na ôraa e: ‘E mau Ite no Iehova matou.’”

Ua haamata te hoê vea no Heremani o Kölner Stadt-Anzeiger i te hoê tumu parau no nia i te hoê utuafare o ta te papai e parau ra “aore e haapao ra i te Noela no te mea e ere i te mahana fanauraa o Iesu e e niu etene to te reira.” E ere ra anei e mea aroha roa o Christopher e o Alexander? E ere roa ˈtu, no te mea mai ta te tumu parau e tapao ra, na te mau paepae taoˈa hauti a te mau tamarii e haapapu ra e te aupuruhia ra raua e to raua metua.

Teie râ, ua faahapa te tahi mau metua tei tae i te hoê aparauraa a te mau metua e te orometua haapii i Heremani Apatoa e i te mea aore te mau Ite no Iehova e horoa i te mau ô na ta ratou mau tamarii i te Noela e riro mai ratou i te ore e tiaturi ia ratou iho. E ere ïa te reira i te parau mau, mai ta te orometua haapii i tapao. Ua parau oia e “e paraparau te mau tamarii a te mau Ite no Iehova ma te mâtaˈu ore, e huru papu to ratou, e ua ite maitai ratou i te faataa papu i to ratou faaroo, o te mea ïa ta te tahi atu mau tamarii e ore e tia i te rave.”

Oia mau, e mau ahuru tausani utuafare na te ara tei mono i te horoaraa taoˈa i te Noela i te tahi mea maitai aˈe, ma te tutava i te horoa i te mau ô no ta ratou mau tamarii i te roaraa o te matahiti. Ua ite-papu-hia e e faaoaoa te reira i te taatoaraa.

Te hoê vahi faufaa, e rave rahi ïa mau tupuraa oaoa te itehia i te roaraa o te matahiti, e nehenehe ïa te tamarii e au hau atu i te mau ô taitahi. Te tahi atu mea faufaa ua ite te tamarii e na to ratou mau metua e horoa ra i te mau ô ma te here, e e haamauruuru iho â ïa ratou i to ratou metua. Eita te metua e haamâuˈa hua noa i te moni e e tutava ia haamauruuru ta ratou mau tamarii i te hoê taata no te aai noa o Papa Noela e aore ra ia riro mai ratou ei tamarii mauruuru ore, ma te manaˈo e e hopoia na Papa Noela te hopoiraa mai i te mau ô e aita e e titauhia ra te mau haamauruururaa.

Te ô faufaa rahi roa ˈˈe

E ite pinepine o Dominik ahuru matahiti, e o Tina e ono matahiti, i te mau ô tiai-ore-hia na to raua nau metua—e maa totora i nia i te turua o te roˈi, e penitara aore ra e buka papai ta raua e nehenehe e afai i te fare haapiiraa, aore ra e hauti tano no te faaanaanatae ia raua i te mau avaˈe toetoe. Eaha râ ta raua e au rahi roa? Te pahono maira to raua nau metua e: “Ia horoa mauâ i te taime na raua—ei hiˈoraa, te hautiraa i roto i te hiona.”

Hoê â manaˈo to te tahi atu â mau metua Ite no Iehova. “I roto i teie nei ao ru noa,” ta Edelgard e faataa ra, “o te taime te mea faufaa roa o ta ˈu e tia i te horoa i ta ˈu mau tamarii.” E e farii te feia apî i te reira! Te parau ra o Ursula e ua faariro te tamarii i te mau ori-haere-raa o te utuafare taatoa ei “ô maitai roa ˈˈe.” Ua tae roa te peretiteni no te hoê taatiraa orometua haapii i Heremani i te parau e ere i te mea maoro i teie nei, e te ô maitai roa ˈˈe ta te mau metua e horoa na ta ratou mau tamarii i te Noela o te taime e te faaoromai.

Ma te feaa ore, te horoaraa ia ˈna iho—to ˈna taime, te haapao e te ara-maite-raa—i te hoê melo o te utuafare, i te hoê hoa, e ô faufaa rahi roa ïa. Eita iho â ïa teie huru ô e titau ia taotiahia i te tahi noa mau mahana o te matahiti.

Te horoaraa taoˈa ma te oaoa tei auhia

E hiˈopoa tatou i te mau hiˈoraa o te mau Ite no Iehova o te fanaˈo ra i te tahi mea maitai aˈe i te horoaraa taoˈa i te Noela. Ua parau o Wilfried e o Inge no Heremani e: “Ua matau mâua i te horoa i te mau ô ia hinaaro anaˈe mâua, e faanaho atea atoa râ mâua i te mau ô huru rarahi aˈe.” Oia atoa no Dieter e no Debora tei tutava no te horoa i te mau ô na to raua tamaiti iti i te roaraa o te matahiti. Te faataa ra râua e “tei te piti o te parahiraa te rahi e te faufaa o te ô, e mea varavara roa te mau ô rarahi e te moni rahi.”

E tiai te rahiraa o te mau tamarii i te ô i te Noela e aita ˈtura ïa e maereraa faahou. Te parau ra o Helga e “mea oaoa roa ˈˈe ta ˈna mau tamarii ia noaa ia ratou te ô tiai-ore-hia i te mau taime e horoahia te ô e tiaihia e ratou.” Te farii ra o Natascha e 15 matahiti, e “mea au aˈe na ˈu ia noaahia mai te ô tiai-ore-hia no roto mai i te mafatu i te hoê ô tei horoahia i te mahana faataahia no te mea e titauhia ra te reira e te peu.”

Oia atoa, e mea faufaa ia ara i te mau taoˈa hauti ta te tamarii e au rahi. No nia i te reira, te faataa ra o Fortunato o te faaea ra i Heremani e: “Te mau ô ta mâua e horoa e rahiraa ô ta te tamarii iho i ani. E tamata râ mâua i te horoa i te reira i te taime manaˈo-ore-hia. Ahiri oe i ite i te rahi o to ratou oaoa!”

Ua ite atoa te mau metua e ia horoahia te hoê ô na te mau tamarii maˈi e tarava ra i nia i te roˈi e faaitoito te reira ia ratou. E horoa te tahi pae i te ô hou te tau faaearaa haapiiraa eiaha te tamarii ia haumani. Ei hiˈoraa, hou te tau faaearaa haapiiraa ua horoahia na Stefan te hoê hiˈo faarahi. “Ua maere roa ïa oia,” ta to ˈna papa i faatia mai, “e ua ouˈa no te rahi o te oaoa.” No reira, te horoaraa ma te mafatu tae e te faahepo-ore-hia e oaoa rahi te taata horoa e te taata i horoahia ˈtu.

Parau mau, e mau mea atoa ta te tamarii e hiaai. Te faataa ra o Jörg e o Ursula e: “Ia faaite mai ta mâua tamahine i ta ˈna e hinaaro ra, e paraparau ïa mâua ia ˈna. E hiaai au maitai anei? E tano anei teie taoˈa no to ˈna faito matahiti? Te vai ra anei te hoê vahi i roto i te fare no taua taoˈa ra? Mai te peu e, eita e tia ia mâua i te haamâha i te mea o ta ˈna e e hiaai ra i taua iho â taime, e haamanaˈo mâua i te reira e e tamata mâua i te faatia i te mea o ta ˈna e hinaaro i te taime tano.” E mea tano iho â, i te ore e faaino i te tamarii ma te haamâha i to ratou atoa mau hiaai, a erehia ˈi ratou i te oaoa e noaahia mai ia horoahia ˈtu te mau ô.

Te mau metua o tei matau i te horoa, e pee ïa teie huru feruriraa i nia i ta ratou mau tamarii, e e faaitehia te reira ma te oaoa. Te parau ra o Sebastian ahuru matahiti e: “Eita vau e tiai i te mau tau faaeraa no te faaoaoa i to ˈu nau metua e ta ˈu mau tuahine. Ia hinaaro anaˈe vau e e maa moni ta ˈu i roto i te pute te reira ïa!”

Ua ite atoa te mau utuafare Ite no Iehova e mea maitai aˈe te tahi atu huru ô, i te horoaraa taoˈa i te Noela. O te mau tere e fanahohia aore ra te tahi mau ori-haere-raa, i te vahi mataitairaa animala, te fare vairaa taoˈa tahito, te fare hiˈopoaraa taoˈa, aore ra te hoê vahi i te mataeinaa. E riro teie huru ô i te haapii e te faaanaanatae mau i te tamarii apî.

Te mau haamaitairaa tei noaa mai i te horoaraa ma te oaoa

I te faaohiparaa i te mau faaueraa tumu o te Bibilia, e ape ïa tatou i te faateimaharaa e te inoino e itehia i te horoaraa taoˈa i te Noela. E a haamanaˈo, te horoaraa i to tatou taime e to tatou aravihi no te haamaitai i te taata tupu i te pae o te feruriraa e te pae varua atoa e ô hau atu â i te faufaa i te mau ô materia. E haamaitai teie horoaraa maitai hau aˈe i te taairaa o te utuafare, e haapaari i te au-hoa-raa, e hopoi i te oaoa mau i te roaraa o te matahiti eiaha noa i te taata tei noaa ia ˈna te ô i te taata atoa râ tei horoa i te ô.—Ohipa 20:35.

No reira maoti i te horoa ma te faahepohia i te tau Noela i teie matahiti, no te aha e ore ai oe e tamata i te hoê huru raveraa taa ê? No te aha oe e ore ai e tamata i te ravea maitai aˈe?

[Tumu parau tarenihia/Hohoˈa i te api 22]

Eita ra anei te tamarii e erehia i te reira?

Rebecca, 16 matahiti: “Aita vau e erehia ra i te Noela, no te mea e noaa ia ˈu te mau ô i te roaraa o te matahiti. E oaoa roa vau i te hoê ô tiai-ore-hia i te ô faahepohia.”

Tina, 12 matahiti: “E oaoa mau vau i te mau ô e tano ia ˈu, eiaha i te mahana faataahia, i te tahi noa mahana o te matahiti—eiaha râ i te mau ô o te tia ia ˈu ia parau mauruuru e aita hoi vau i hinaaro i te reira.”

Birgit, 15 matahiti: “E mea faufaa ore roa te mau huru ô atoa e noaahia mai te peu e, e fifi te vai ra i roto i te utuafare. No reira ïa matou e rave amui ai e rave rahi mau mea ei utuafare tahoê.”

Janosch, 12 matahiti: “E here matou te mau tamarii i to matou mau metua noa ˈtu e eita ratou e horoa mai i te mau ô na matou. Ua riro to ratou here anaˈe iho ei ô rahi mau.”

[Hohoˈa i te api 20]

Te ô maitai roa—to outou taime!