Aita vetahi mau taurearea e hinaaro faahou ra e ora
I INIDIA, te tapaohia ra te hoê faito riaria o te feia e haapohe nei ia ratou. Te manaˈo nei te feia maimi e, i te mau piti minuti atoa, e tamata te hoê taata i te haapohe ia ˈna e, i te mau ahuru minuti atoa, e manuïa te hoê taata i te haapohe ia ˈna.
I roto i te matahiti 1990, tau 60 000 taata o tei haapohe ia ratou i Inidia e, ia au i te vea India Today, “fatata te afaraa i rotopu ia ratou, e 18 e tae atu i te 35 matahiti ïa to ratou.” Aita vetahi i hau atu i te 10 matahiti! Aita i itehia te numera mau o te feia o te haapohe nei ia ratou no te mea, no to ratou haama, mea au aˈe na te mau fetii e rave rahi, ia parau e ua pohe ratou na roto i te hoê ati maoti hoi i to ratou haapoheraa ia ratou.
Te haapapu nei te vea India Today e i te matahiti 1990 “hau atu i te 2 500 taurearea apî o tei haapohe ia ratou no to ratou manuïa-ore-raa i te pae no te here.” Ia au i te mau taote i te pae feruriraa, te vai ra te tahi atu tumu no te maraaraa o te feia e haapohe nei ia ratou: i to ratou apîraa roa ra, e faaruru te mau taurearea i te mau faateimaharaa i te fare haapiiraa, mai te manaˈo tataˈuraa i rotopu i te mau tamarii haere haapiiraa e te faaheporaa ia manuïa ratou.
Te na ô atoa ra teie vea e “te ite nei te mau taote i te pae feruriraa i te hoê taairaa piri roa i rotopu i te amahamaharaa o te mau utuafare e te taiâraa e te manaˈoraa e ua faaruehia ratou, o te nehenehe e faatupu i te mau manaˈo e haapohe ia ˈna” i roto i te mau tamarii. Ua parau te hoê taote vahine i te pae feruriraa, o S. Dastoor, e: “Ahiri noa e e rave te mau metua i te taime no te faaea e ta ratou mau tamarii, e ite ïa ratou e eaha te mea e ore e afaro ra e e nehenehe ïa ta ratou mau tamarii e faaorahia. Mea pinepine vau i te manaˈo e o te mau metua te tia ia aˈohia.”
Te faaitoito nei te Bibilia i te mau metua kerisetiano ia faataa i te taime no te faaea e ta ratou mau tamarii e no te haapii atu i te mau faaueraa tumu a te Atua. (Deuteronomi 6:4-9) Te aˈo atoa nei te mau Papai i te mau metua ia ore e faariri atu i ta ratou mau tamarii, tera râ, ia haapii atu ia ratou i roto i ‘te aˈo e te faatitiaifaroraa a Iehova i te pae feruriraa.’—Ephesia 6:4.
Hau atu, e nehenehe te mau taurearea kerisetiano e faaruru i te mau fifi o te ao no teie nei tau mai te peu e e faaohipa ratou i teie aˈoraa paari a te Bibilia i roto i te Philipi 4:6, 7: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.”