O vai te hinaaro e riro mai ei taata ona mirioni?

E AU RA e teie te pahonoraa: fatata ïa te taatoaraa. E te ravea ohie roa—ia au i te manaˈo o te rahiraa—e tamata noa ïa i ta ˈna moni i te loto aore ra i tueraa popo.a

Te haafaufaaraa i to vera mau hiaai—e no to ratou hinaaro i te moni hau ta te loto e horoa mai—te faaitoito nei te mau faatereraa mai Moscou e tae atu i Madrid, mai Manille e tae atu i te oire o Mexico, o te horoa ra i te moni rahi no te loto a te Hau o te pǔpǔ nei i te hoê hanere mirioni dala marite.

Mea iti te riro mai ei taata ona mirioni. Ua faaî te hoê taata beretane i te mau titeti tueraa popo e 25 matahiti hou oia a manuïa ˈi i te pae hopea i te tano moni rahi roa ˈˈe. No te hoê tino moni e 50 toata, ua noaa ia ˈna fatata e 1,5 mirioni dala marite. Hau atu â te faahiahia o te moni aufauhia i te hoê vahine no New York, te riro ei hoê o te taata manuïa tuiroo o te ao nei i te noaaraa ia ˈna e 55 mirioni i te pere tanumera o te Hau no Floride.

Mea varavara roa ratou. Te mea matauhia râ o teie taata paari paniora rave ohipa i te fare haavaraa tei hoo i te mau titeti loto i te mau hebedoma atoa e 30 matahiti i teie nei. Noa ˈtu e aita i noaa ia ˈna maa mea faufaa rii, ua vai itoito noa oia. “Te manaˈo noa nei au e e manuïa vau,” ta ˈna ïa parau. Oia atoa, no te hoê tane no Montreal, tei haamâuˈa te tino moni taatoa no te hoê hebedoma i te pere tanumera no Kanada, ua haapoto noa oia i te manaˈo o te rahiraa i to ˈna faataaraa mai e: “Te ohiparaa mai te reira te huru o te ravea hoê roa ia nehenehe te taata haehaa e moemoeâ i te oraraa maitai aˈe.” E aita hoi oia i manuïa.

Noa ˈtu te hiaai i te mau pereraa tanumera i te mau vahi atoa, te au-rahi-hia nei te tahi atu huru pereraa moni: te hautiraa ïa i te mau matini moni. Noa ˈtu e eita te taata e onahia i teie mau matini moni eiâ i te hoê po, e nehenehe mau ratou e faafanaˈo oioi i te taata hauti i te tano rahi—e moni maitai atoa hoi. E aita teie mau matini e vai noa i roto i te mau fare pereraa moni. Te huti ra te mau maniania tamau, te anapanapa o te mau mori, e te papaaina o te moni e topa ra i te ara-maite-raa no to ratou vairaa i roto e rave rahi mau fare inuraa taofe, mau piha farereiraa, mau fare tamaaraa, e mau hotela no Europa.

E vahine ivi ruhiruhia o Frances e ora ra i te oire no New York. E piti aore ra e toru taime i te hebedoma atoa, e tere oia e piti hora e te afa na nia i te pereoo uta taata i te oire no Atlantic, i New Jersey. Ia tae oia e tomo o ˈna i roto i te hoê o te fare pereraa moni no te oire, e i reira oia e hauti ai i te mau matini moni e ono hora e tiahapa hou oia a hoˈi ai i te fare. “Aita vau i ite e eaha ta ˈu e rave ahiri e aita te oire no Atlantic,” ta ˈna i parau. “Teie ta matou arearearaa, ua ite oe, tera ta matou e rave.”

No te tahi mau taata, ua hau atu ïa te pereraa moni i te ohipa hauti noa, e ravea no te aperaa i te oraraa o te mau mahana atoa, aore ra e tiairaa ia onahia. No ratou, e tuhaa faufaa ïa—titau-roa-hia—teie no te oraraa.

“E taata pere vau no te mea mea roa na ˈu i te tamata noa,” ta Luciano, no Córdoba, Paniora e faataa ra. “Aita vau e imi ra i te mau otoheraa,” ta ˈna e na ô faahou ra, “teie râ te hepohepo ra vau, e no reira vau i haamata ˈi i te hauti i te bingo. E imi atura vau te tahi atu mau pereraa. Mea faahiahia mau oe ia î anaˈe to oe pute i te moni parau e ua ineine oe no te hauti.” Te tahi atu taata pere, o tei erehia ta ˈna ohipa ei raatira, ua uihia oia e mai te peu e ua manaˈo o ˈna e faarue i teie peu ino. “Faarue i te reira?” ua pahono mai oia. “Eita ta ˈu e nehenehe. O ta ˈu imiraa teie.”

Noa ˈtu te rau o te mau tumu, e ere roa ˈtu te feia pere i te hoê pǔpǔ iti taata. I te mea rahi aore ra te mea iti, e 3 taata paari marite i nia i te 4 e pere moni ra; hoê â ïa huru i te fenua Paniora, te tahi atu fenua i reira ua parare roa te pereraa moni. E imiraa moni rahi mau te pereraa moni. Mea iti te mau taatiraa fare hamaniraa taoˈa i te ao nei e faatupu ra i te mau hoo-mâmâ-raa i te matahiti hoê e hau aˈe te moni e noaa mai i te pere tanumera i roto e 39 mau fenua.

Mea papu, e umeraa manaˈo puai mau te pereraa moni. E faaoaoaraa ino ore anei teie, aore ra e haapuraa no te mau ati huna? Te faaara ra te hoê maseli tahito e: “O tei ru râ i te haaputu i ta ˈna taoˈa ia rahi eita e ore te hara.” (Maseli 28:20) E parau mau anei te reira no te feia e hinaaro nei e onahia i te pereraa moni?

[Nota i raro i te api]