Te tauturu a te utuafare fetii

“E inu na mua te taata i te hoê hapaina, e i muri iho, e titau oia i te tahi atu hapaina, e i te pae hopea, na te hapaina e inu i te taata.”—Parau paari no Hitia o te râ.

TE HAERE noa ra outou na te hiti o te hoê fenua vari. Hee taue atura outou. Eita e maoro roa, te moe atura outou i roto i te vari. Rahi noa ˈtu outou i te hautiuti, rahi noa ˈtu outou i te tomo.

Ia au i teie faahiˈoraa, e faatomo atoa te inu-hua-raa i te ava i te utuafare taatoa. E aro te hoa tîtî apiti no te faataui i te taata inu ava. No to ˈna here, e haamǎtaˈu atu oia ia ˈna, aita râ o ˈna e faaea i te inu. E huna oia i ta ˈna ava, e hoo faahou mai râ oia i te tahi. E tapuni oia i ta ˈna moni, e tarahu atu râ oia i to ˈna hoa. E faahiti oia i to ˈna here i to ˈna utuafare, i te oraraa, e tae noa ˈtu i te Atua—aita râ e faufaa. Rahi noa ˈtu oia i te aro, hohonu roa ˈtu â te utuafare taatoa i te tomo i roto i te vari o te inu-hua-raa i te ava. No te tauturu i te taata inu ava, e tia na mua i te mau melo o te utuafare ia taa i te huru mau o te inu-hua-raa i te ava. E tia ia ratou ia ite e no te aha eita vetahi mau “ravea” e manuïa, e e tia atoa ia ratou ia haapii e eaha te mau ravea o te manuïa mau â.

E ere te inu-hua-raa i te ava i te tahi noa taeroraa ava. Ua riro râ ei fifi o te inu-tamau-raa o te tupu mai na roto i te haamauraa i to ˈna feruriraa i nia i te ava e te oreraa e nehenehe e faaea i te inu. Noa ˈtu e te manaˈo nei te rahiraa o te feia aravihi e eita teie peu e rapaauhia, e nehenehe te tîtîraa i te ava e araihia maoti te hoê porotarama no te haapae-roa-raa i te inu i roto i to ˈna oraraa taatoa.—A faaau e te Mataio 5:29.

I roto i te tahi mau tuhaa, e nehenehe teie huru tupuraa e faaauhia i to te hoê taata i roohia i te omaha tihota. Noa ˈtu e eita ta ˈna e nehenehe e taui i to ˈna huru, e nehenehe te taata maˈi e tauturu atu i to ˈna tino na roto i te haapaeraa i te tihota. Oia atoa, eita te taata inu ava e nehenehe e taui i te huru o to ˈna tino ia inu anaˈe oia i te ava, teie râ, e nehenehe oia e ohipa ia au maite i teie fifi na roto i te haapae-roa-raa i te ava.

Teie râ, mea ohie aˈe ia parau maoti hoi i te rave. Eita te taata inu ava e farii i to ˈna fifi. ‘E ere au i te mea ino roa.’ ‘Na to ˈu utuafare e turai ra ia ˈu ia inu.’ ‘E te hoê paoti ohipa mai teie te huru, o vai te ore e inu?’ Mea pinepine, no te papu o to ˈna huru feruriraa, e riro te utuafare taatoa i te pee atu ia ˈna no te faaiti i te fifi. ‘E tia ia Papa ia tamǎrû i to ˈna rohirohi i te ahiahi.’ ‘E tia ia Papa ia inu. Mea faaoromai roa oia ia maniania anaˈe o Mama.’ Eiaha roa ˈtu e faaite i te parau huna a te utuafare: E taata inu ava o Papa. “Te reira anaˈe te ravea e ora ˈi ratou,” o ta te taote Susan Forward ïa e faataa ra. “Ua riro te haavare, te mau parau otoheraa, e te mau parau huna, ei mau peu matauhia i roto i teie mau utuafare.”

Eita te mau melo o te utuafare e nehenehe e huti mai i te taata inu ava i rapaeau i te vari ahiri e aita ratou iho i haere na mua mai i rapae. E patoi mai paha vetahi e, ‘O te taata inu ava o te titau ra i te tauturu, e ere o vau!’ A feruri na râ: Aita anei to outou mau manaˈo e ta outou mau ohipa i taaihia e te haerea o te taata inu ava? E ere anei i te mea pinepine to outou ririraa, tapitapiraa, inoinoraa, aore ra to outou mǎtaˈuraa i ta ˈna mau ohipa? Ehia taime to outou faaearaa i te fare no te haapao i te taata inu ava maoti hoi i te rave i te hoê ohipa faufaa roa ˈtu â? Ia rave te mau melo o te utuafare e ere ratou i te feia inu ava i te mau taahiraa avae no te haamaitai i to ratou iho oraraa, e riro te taata inu ava i te pee atu i to ratou hiˈoraa.

A faaea i te faahapa ia outou iho. ‘Ahiri e mea maitai aˈe oe i nia ia ˈu, eita ïa vau e inu,’ o ta te taata inu ava paha e parau mai ia outou. “Te hinaaro ra te taata inu ava e ia tiaturi noa outou i teie parau ia nehenehe oia e faatopa i te hopoia o to ˈna inuraa ava i nia ia outou,” o ta te vahine aˈo ra o Toby Rice Drews ïa e parau ra. Eiaha e turu atu ia ˈna. Eita noa te taata inu ava e titau ra i te ava, e titau atoa râ oia i te tahi mau taata o te turu mai i ta ˈna inuraa. Ma te ore e hinaaro, e nehenehe hoi te mau melo o te utuafare e atuatu noa i te fifi o te taata inu ava.

E tano atoa te hoê maseli a te Bibilia no nia i te ereraa i te hitahita ore no te taata inu ava: ‘A vaiiho noa ˈtu ia ˈna ia faaruru i te mau faahopearaa. Mai te peu e e faaora noa mai oe ia ˈna, e na reira faahou oia.’ (Maseli 19:19, Today’s English Version) Oia mau, a vaiiho e na te taata inu ava iho e taniuniu atu i to ˈna paoti ohipa, e tia mai i to ˈna roi, e horoi i to ˈna pihae. Mai te peu e na te utuafare e rave i teie mau ohipa no ˈna, te tauturu noa ra ïa ratou ia ˈna ia tamau noa i te inu e tae roa ˈtu i te pohe.

A ani i te tauturu. Mea fifi roa e peneiaˈe eita roa ˈtu ta te hoê melo o te utuafare e nehenehe e tiamâ mai i te fifi o ˈna anaˈe iho. E tia ia imi i te tauturu. A turui atu i nia i te mau hoa o te ore roa e turu i te haerea hape a te taata inu ava e o te ore atoa e vaiiho ia outou i roto i teie fifi.

Ia farii noa ˈtu te taata inu ava e ia tauturuhia oia, mea oaoa roa ïa. Teie râ, o te omuaraa noa ïa o te rapaauraa. E nehenehe te tîtîraa o te tino i te ava e ore tau mahana i muri aˈe na roto i te ravea arairaa i te inu-hua-raa i te ava. Teie râ, mea fifi roa ˈtu â ia arai i te tîtîraa i te pae feruriraa.

[Tumu parau tarenihia i te api 5]

Te mau huru o te taata inu ava

E haamau oia i to ˈna feruriraa i nia i te ava: E tiai ru te taata inu ava i te taime e inu ai oia. Noa ˈtu e aita o ˈna e inu ra i te ava, te tamau noa ra o ˈna i te manaˈo i te ava.

Eita o ˈna e nehenehe e faaea i te inu: Mea pinepine e e hau atu oia i te inu i ta ˈna i opua, noa ˈtu eaha te papuraa o ta ˈna opuaraa.

To ˈna etaeta: Ua riro noa te mau faaheporaa i nia ia ˈna iho (“Eita vau e inu o vau anaˈe,” “eita vau e inu i te taime ohipa,” e te tahi atu â) ei mau parau haavarevare no te huna i to ˈna hinaaro mau oia hoi: “Eita vau e vaiiho i te tahi mea ia tapea ia ˈu ia inu.”

Eita o ˈna e taero ohie noa: E ere roa ˈtu te aravihi no te ‘oreraa e taero ohie noa’ i te mea maitai—mea pinepine e tapao matamua te reira no te tîtîraa i te ava.

Te mau faahopearaa iino: Eita te mau peu maitatai e faaino i te utuafare, te toroa, e te oraora-maitai-raa. Area te inu-hua-raa i te ava ra, oia ïa.—Maseli 23:29-35.

Te farii-ore-raa i te fifi: E tahuna, e faaiti, e e tapoˈi te taata inu ava i to ˈna haerea.