Te hoê taata inu ava i roto i te utuafare

“Te feia inu ava, o te hoê noa ïa tuhaa o te fifi o te inuraa ava . . . Noa ˈtu e hoê anaˈe taata inu ava i roto i te hoê utuafare, o te utuafare taatoa o te roohia i te ati o te inuraa ava.”—Taote Vernon E. Johnson.

TE TARAVA noa ra o Alice, e pae matahiti to ˈna, i nia i to ˈna roˈi, e te iriti noa ra to ˈna avae. Ua pepe oia e piti mahana na mua ˈtu e ua tuuhia ˈtura to ˈna avae taatoa i roto i te tima. Ua vî roa râ te tima, e ua oru atura to ˈna avae. Ua taparu o Alice ia afai to ˈna mau metua ia ˈna i te taote, tera râ, ua unuhi to ˈna metua tane, e aita to ˈna metua vahine e taa faahou ra e o vai ta ˈna e haapao i rotopu ia raua.

Tau mahana i muri aˈe, ua motuutuu roa ˈˈera te avae o Alice. I te taime a tahe mai ai te tahi pape ereere na roto mai i to ˈna manimani avae, ua faahoro ru noa ˈtura te mau metua o Alice ia ˈna i te fare maˈi. I te tatararaahia te tima, ua fatata roa te vahine utuutu maˈi i te matapohia i to ˈna iteraa ˈtu i to ˈna avae. Ua pe roa te avae o Alice e ua tâpûhia ˈtura.

Te inu-hua-raa i te ava e te feia tîtî apiti

Mea ino roa ˈtu â teie ati i te ereraa i te hoê melo. E taata inu ava te metua tane o Alice. No teie huru to ˈna, aita i maraa ia ˈna i te pae feruriraa e i te pae tino ia tauturu atu i ta ˈna tamahine i te taime a titau rahi ai oia ia ˈna. “E turai te peu taero ava i te taata inu ava ia tuu i to ˈna utuafare i nia i te parahiraa hopea—i muri aˈe i te ava e te mau mea atoa o ta ˈna e titau ra,” o ta te vahine aˈo ra o Toby Rice Drews ïa e faataa ra.

E te metua vahine ïa o Alice? Ua riro atoa oia ei tîtî, eiaha no te ava, no ta ˈna râ tane inu ava. Mea matauhia e ia horoa te hoa e ere oia i te inu ava, ia ˈna taatoa no te tutava ia faaea to ˈna hoa i te inu aore ra no te faaruru atu i to ˈna huru tauiui haere noa.a E mau roa oia i roto i te fifi o te taata inu ava e e faaite atoa oia i te hoê â tapao no te tîtîraa i te ava—tera râ hoi, aita oia e inu ra i te ava. No teie tumu, mea pinepine te feia mai te metua vahine o Alice i te parauhia te feia tîtî apiti.

Ma te ore e hinaaro, te faaterehia ra te taata inu ava e te hoa tîtî apiti e te tahi mea aore ra te tahi taata ê atu ia raua iho. Aita raua toopiti atoa ra e farii ra i teie fifi. Eita e maraa ia raua ia aupuru i ta raua mau tamarii. Ua mau roa raua toopiti atoa ra i roto i te hoê oraraa hepohepo no te mea, i te hoê pae, eita ta te taata inu ava e nehenehe e haavî i ta ˈna inuraa, i te tahi aˈe pae, eita ta te hoa tîtî apiti e nehenehe e haavî i te taata inu ava, e inaha, eita ta raua toopiti e nehenehe e haavî i te faahopearaa ta te inu-hua-raa i te ava e faatupu i nia i ta raua mau tamarii.

Teie râ, te vai ra te tauturu no te taata inu ava e no to ˈna utuafare. E tuatapapahia te reira i roto i te mau tumu parau i muri nei.

[Nota i raro i te api]