Te papai mai nei te feia taio

Te mau tapao faaara o te tino Ua haere to ˈu taote no te hoê tau faafaaearaa a tupu mai ai te tahi mau fifi o ta ˈu i manaˈo e e mau maˈi haihai roa. Ua opua hoi au e ore e tâuˈa i teie mau tapao faaararaa a tae mai ai te tumu parau “Te haapao ra anei outou i te mau tapao faaara a to outou tino.” (8 no atopa 1991) Mai te faaitoitohia ra, ua haere atura vau e hiˈo i te taote, e ua itehia maira e e mariri ai taata to ˈu. No te mea e ua haapao vau i te mau tapao faaara o to ˈu tino, ua rapaau-oioi-hia e ua ora mai au i teie maˈi.

S. S., Hau amui no Marite

Te totovaraa topita Ua oti ia ˈu i te taio i te tumu parau “Ua ora mai mâua i te totovaraa topita a te hoê taparahi taata.” (8 no tenuare 1992) Aita vau e taa ra e eaha te parau atu ia outou! Ua riro mau â te reira ei hiˈoraa no te faaoromai. Ua riro mau â te faaroo e te manaˈo papu o Sue Schulz no nia i te fifi o te pâmuraa toto ei tuhaa faufaa roa; oia atoa no te here ta ta ˈna tane o Peter i faaite no Sue noa ˈtu te fifi i te pae tino i faatupuhia e te paainaraa topita. Mea papu maitai e e ere o vau anaˈe tei putapû roa i te taioraa i teie tumu parau!

G. J. S., Beresilia

Te peu faahinaaro Mauruuru no te tumu parau “Te uiui nei te mau taurearea . . . Nafea ia ape i te mauiui o te peu faahinaaro?” (8 no titema 1991) Aita i maoro aˈenei, ua faaruru au i te mauiui e te haavare no roto mai i te peu faahinaaro i te taime a tâpû ai te hoê taurearea o ta ˈu i momoˈa i to mâua taairaa ma te taue e te tumu ore. I muri iho, ua ite ihora vau e ua matauhia o ˈna ei tamaroa faahinaaro haere i te tamahine e ua haamauiui oia i te tahi atu mau potii na mua ˈˈe ia ˈu. Te taa ra ia ˈu i teie nei e e hape atoa ta ˈu i roto i teie huru tupuraa mauiui no te mea ua faatupu oioi noa vau i te mau manaˈo o te here. Ahiri e ua tae mai teie tumu parau tau avaˈe na mua ˈˈe.

G. T., Hau amui no Marite

Ua parau mai te hoê taurearea ia ˈu e te hinaaro ra oia e ia riro mâua ei hoa, e ua farii atura vau. Teie râ, ua tamau noa oia i te taniuniu mai e i te ani mai ia haere mâua i te tahi vahi. I to ˈna aniraa mai i muri iho ahiri e e hinaaro anei au e faaipoipo ia ˈna, ua oaoa roa vau! Teie râ, hoê matahiti i muri iho, ua na ô maira oia e aita iho â o ˈna i hinaaro e faaipoipo. Ua parau mai oia e eita e tia ia ˈu ia mauiui rahi roa no te mea ua faaite mai oia i te omuaraa ra e aita oia i ineine no te faaipoipo. E no te “paruru” ia ˈna, ua na ô maira oia e te hinaaro ra oia e ia faaipoipo mâua—tera râ i roto i te ao apî. Te mauiui noa nei au, tera râ, te tauturu ra te tumu parau ia ˈu ia faaruru i teie huru tupuraa.

S. Y., Hau amui no Marite

Ia tahoê maite te mau utuafare Ua riro au ei metua tane o te ore roa ˈtu i anaanatae i ta ˈu mau tamarii. Aita vau i feruri i te mau faahopearaa e noaa mai a muri aˈe. Ua putapû hohonu roa vau i to ˈu taioraa i te mau tumu parau ra “E te mau utuafare—A tahoê maite, eiaha e tiai e ia maoro roa” (8 no setepa 1991)! Ua tǎpǔ vau e taui e e rave i te mau tutavaraa atoa no te faaite i to ˈu here i ta ˈu mau tamarii.

J. B. M., Gabon

Tairururaa i Europa Hitia o te râ Ua putapû roa vau i te mau tumu parau ‘Ua oaoa te mau hoa o te tiamâraa a te Atua i Europa Hitia o te râ.’ (8 no titema 1991) Mai te mea ra e e nehenehe ta ˈu e faaroo i te mau pii oaoa e te mau haapopouraa a farii ai to tatou mau taeae kerisetiano i te mau buka bibilia apî na roto i to ratou reo. I te mea e aita vau i tae atu i taua mau tairururaa ra, ua oaoa roa vau i to outou neneiraa i teie mau tumu parau, ia nehenehe atoa matou i roto i te tahi faito ia apiti atu i to ratou oaoa e ia mauruuru hau atu â no te tiamâraa o ta tatou e fanaˈo nei.

M. M., Italia

Te fifi o te toto No oti noa ˈtura ia ˈu i te taio i te tumu parau “Eiaha e parau e eiaha!” (8 no setepa 1991), e te tahe nei to ˈu roimata a papai ai au i teie rata. Ua amahamaha to ˈu utuafare i te pae faaroo e e tamahine iti ta ˈu. Noa ˈtu e aita ta ˈu tane e patoi ra i to ˈu faaroo i teie nei, mai te peu noa ˈtu e e fifihia ta mâua tamahine e e anihia ia pâmuhia oia i te toto, i reira ïa oia e patoi mai ai ia ˈu. Ua haapapu hau atu â teie tumu parau i roto i to ˈu feruriraa i te faufaaraa ia faaineine i ta tatou mau tamarii ia nehenehe ratou iho e rave i te hoê tiaraa papu no te turu i te mau faaueraa tumu a te Bibilia i to ratou nainairaa ra.

L. W., Hau amui no Marite