E tumu anei to te oraraa?

“‘Eaha ta tatou ohipa i ǒ nei?’ o te uiraa faufaa roa ˈˈe te tia i te hoê taata ia pahono. . . . Te tiaturi nei au e e auraa to te oraraa noa ˈtu te taa ore o te pohe o ta ˈu i ite. Aita e auraa to te pohe, e auraa râ to te oraraa.”

Ua papaihia teie mau parau e Elie Wiesel, taata papai buka tuiroo o tei ora mai i te mau aua tapearaa nazi. Tei rotopu oia i te feia e rave rahi o tei pahono i te hoê uiraa i uihia e te vea Life: “Eaha ta tatou ohipa i ǒ nei?” Ua ite oia i te paeau riaria roa ˈˈe o te oraraa, noa ˈtu râ, ua papu ia ˈna e e auraa to te oraraa.

Aita râ te mau taata atoa e farii ra i teie manaˈo. Teie ta te hoê taata faahoro pereoo tarahu o José Martínez to ˈna iˈoa i pahono i teie uiraa: “E fanauhia mai tatou no te pohe, oia mau e ora e e pohe tatou i muri iho. Te faahoro nei au i te hoê pereoo tarahu. E haere au e taiˈa haere, e haere vau na muri i to ˈu hoa vahine, e aufau vau i te mau tute, e taio rii au, e i muri iho, e faaineine au ia ˈu no te pohe . . . E ohipa maamaa te oraraa.” No José, aita to te oraraa e auraa, aita to ˈna e tumu.

Ma te maere, e rave rahi feia tei noaa ia ratou te ite o te farii nei i te manaˈo o teie taata faahoro pereoo tarahu maoti i to te taata papai buka. Te faaite ra na feia tiaturi i te tatararaa ra e mea tupu noa mai te mau mea, o Richard E. Leakey raua o Roger Lewin, i roto i ta raua buka Haamataraa (beretane), e: “Peneiaˈe ua riro te fetii taata nei ei hape riaria mau, o tei naeahia i te faito e nehenehe ai ta ˈna e faaau maite ia ˈna iho e te ao e haaati ra ia ˈna.” No ratou ra, aita hoê aˈe auraa to te oraraa.

Oia atoa, teie ta Stephen Jay Gould, te hoê taata e tiaturi ra e ua tupu noa mai te mau mea, i papai: “Tei ǒ nei tatou no te mea te vai ra to te hoê pǔpǔ iˈa taa ê te tahi pehau i nia i to ratou tino o tei riro mai ei avae no te tahi mea ora o te haere na nia i te fenua; . . . no te mea ua imi te tahi mea ora haihai e te paruparu, i fa mai i Afirika tau 250 000 matahiti i mutaa ihora, i te ravea ia ora oia. Te titau nei paha tatou i te tahi tatararaa ‘maramarama’ aˈe—teie râ, aita ˈtu tatararaa.” No Gould Tane, ua riro te oraraa o te taata ei ohipa tupu matapo noa mai.

Ua tano o Gould i nia i te hoê tuhaa. Te titau nei te taata i te tahi pahonoraa “maramarama” aˈe i ta ˈna iho. I te tau ati, e rave rahi o te feruri nei mai ia Jason, 11 matahiti. Teie ta teie tamaroa i papai no nia i te poheraa o to ˈna hoa apî: “I te taime a pohe ai to ˈu hoa o Kim i te mariri ai taata, ua ani atu vau i to ˈu mama e, mai te peu e e haapohe te Atua ia Kim i te 6raa o to ˈna matahiti, no te aha ïa oia i farii ai e ia fanauhia mai oia?” Ua taa ohie noa ia Jason e e tumu to te oraraa, e na roto i te pohe peapea mau o to ˈna hoa iti, aita ïa taua tumu nei i naeahia.

Te faufaaraa o teie uiraa

Mea faufaa anei ia ite ahiri e e tumu to te oraraa aore ra eita? E uiraa noa anei teie i te pae philosopho, aore ra e tia anei ia outou ia feruri i te reira? E rave rahi o tei ora ma te ore roa ˈtu e tâuˈa i teie nei uiraa. E mai te peu e ua tano iho â o José Martínez, mea tano atoa ïa ia pee i to ratou haerea.

Area ra, mai te peu e ua tano o Elie Wiesel e e auraa mau to te oraraa, e tia ïa ia tatou ia tamata i te ite e eaha mau na teie auraa. Ahiri e aita ra, e erehia ïa tatou i te tapao faufaa roa ˈˈe o te ora. Mai te mea ra ïa e te haere ra tatou na roto i te hoê piha peni aravihi e eita outou e mataitai i te mau hohoˈa aore ra te parahi ra outou i roto i te fare tamaaraa e eita outou e ani i te tahi maa.

Nafea tatou e ite ai ahiri e e tumu anei to te oraraa aore ra eita? I roto i te tumu parau i muri nei, e tuatapapa tatou i te tahi mau tupuraa o te tauturu ia tatou ia faatitiaifaro i teie fifi.