Eaha to oe manaˈo no nia i te oroa Pakate

Hora 8 i te afa i te po. I roto i te hoê fare pure pouri e 300 matahiti i Afirika Apatoerau, te himene ra e 20 diakono e ahu uouo to ratou e te tupaipai ra i ta ratou mau pahu. Te mâˈi ra te hâuˈa o te taoˈa noanoa na roto mai i te mau farii. I teie nei, te amui atoa maira te tahi pǔpǔ perepitero i te oroa, ma te taio i te Bibilia na roto i te hoê reo lituria tahito tei parauhia Geez. Te faaroo noa ra te feia haamori. Mea iti roa i rotopu i te feia i tae mai o te taa ra i te auraa o te mau parau e faahitihia ra. E tamau noa teie ohipa e tae roa ˈtu i te hora toru i te poipoi.

I te oire no Vaticana, te faatere ra te pâpa i te hoê Pureraa taa ê. No teie putuputuraa rahi, ua tae mai te taatoaraa o te mau tia a te Vaticana, e tae noa ˈtu te mau hanere karatino, te mau ekalesiatiko, te mau perepitero, te mau paretenia e te mau tausani feia pererina.

I te tahi atu pae o te Moana Ataranitita, i te oire no New York, ua tuu te mau mutoi i te mau aua ia ore te mau pereoo uira ia haere atu na roto i te aroa tuiroo o te Fifth Avenue. Te hahaere ra te tahi mau taata no New York tei faanehenehe maitai ia ratou—te mau tane e to ratou mau taupoo teitei e te pereue roa e te mau vahine tei omono i te mau taupoo peni puai—na nia i te aroa ma te ieie rahi.

Eaha hoi teie ohipa? O te oroa Pakate ïa. Na te ao atoa nei, te faatura rahi nei te taata i teie oroa faaroo. Ua pii vetahi i teie oroa te arii vahine o te mau oroa e te festum festorum—te hoê parau latino oia hoi te auraa “te oroa o te mau oroa.”

Eaha te faufaaraa no oe?

Eaha to oe manaˈo no nia i te Pakate? Ua ite anei oe i te tumu e faatupuhia ˈi teie oroa? E rave rahi o tei ore i ite. Ua faaite mai te hoê maimiraa i ravehia i Beretane e 1 taata beretane i nia i te 3 o tei ore i ite i te tumu o te oroa Pakate. Teie râ, i Beretane, e tae noa ˈtu i roto i te rahiraa o te mau fenua o te ao nei, ua riro o Pakate ei oroa faaroo faufaa roa ˈˈe a te amuiraa faaroo kerisetiano.

Ia au i Te buka parau paari beretane apî, ua riro te Pakate ei “oroa matamua o te Matahiti a te Ekalesia Kerisetiano, o te faahanahana i te Tia-faahou-raa mai o Iesu Mesia i te toru o te mahana i muri aˈe i to ˈna faasatauroraahia.” Te faataa ra te buka Pakate—To ˈna aamu e to ˈna auraa (beretane) e ua riro te Pakate ei “oroa rahi roa ˈˈe o te Matahiti kerisetiano, o tei faatupuhia ma te oaoa rahi, no te mea te tǎpǔ ra oia i te tia-faahou-raa no te feia atoa o tei farii i te Faaroo a te Mesia.” Te haafaufaa atoa ra anei oe i te oroa Pakate? Te tiaturi mau ra anei oe e ua taaihia te Pakate e to oe oraraa no a muri aˈe?

E rave rahi o te ore e faatura nei i te oroa Pakate mai teie te huru. No nia i te ohipa moni a te Pakate, ua pii te hoê vea i teie oroa e “Te Aamu rahi roa ˈˈe i hoohia aˈenei.” Te na ô faahou ra oia e: “O te Pakate, oia hoi te tau oroa kerisetiano faufaa roa ˈˈe, te piti o te tau pûpûraa taoˈa rahi roa ˈˈe, ia au i te feia hamani hauti.” Te oroa rahi roa ˈˈe, o te oroa Noela iho â ïa, e te manaˈo nei vetahi mau tia a te ekalesia e, i te pae no te ereraa i te auraa faaroo, ua apee atu te Pakate i te oroa Noela.

Ei hiˈoraa no te tau Pakate o te matahiti 1989, ua haamaraa te feia hamani momona no te mau Hau amui no Marite i te mau hooraa opuahia i nia i te faito e 815 mirioni dala marite. O te piti teie o te tau hooraa momona rahi roa ˈˈe i te mau Hau amui no Marite i muri noa ˈˈe i te Noela. Te hamani nei te hoê taiete hau atu i te hoê hanere hohoˈa monamona rapiti no te Pakate.

Ia au i te vea The Detroit News, ua farii o Jack Santino, orometua haapii i te mau peu e te ihotumu o te nunaa i te Fare haapiiraa tuatoru Bowling Green no Ohio, e ua riro te faaereraahia te auraa faaroo o te oroa Pakate ‘ei “tapao” no te taiete imi moni no teie nei tau.’ Ua faaite atoa te vea e “o te rapiti [no Pakate]—eiaha râ te tia-faahou-raa—o tei riro ei tapao no te Pakate.”

Te tahi atu tau oroa

I te pae fenua Apatoerau, ua riro te Pakate ei tapao faaite no te omuaraa o te tau uaaraa tiare e mea pinepine oia i te apeehia e te hoê hebedoma faafaaearaa na te mau fare haapiiraa. I te vahi e nehenehe, e rave rahi mau taurearea o te haere nei i te mau vahi veavea no te rave i te mau arearearaa i te pae tahatai. Te faariro nei vetahi i te oroa Pakate mai te hopea o te tau faaheeraa i nia i te hiona—te taime hopea e nehenehe ai ratou e arearea i nia i te mau aivi faaheeraa hiona.

I Norevetia, i reira fatata e 88% o te huiraatira tei roto i te ekalesia Lutero Evanelia a te hau, e 14% anaˈe o te feia i uiuihia o tei faaite e peneiaˈe e haere atu ratou i te pureraa no te oroa Pakate. Fatata e 75% o tei farii e aita ratou e faariro faahou ra ia Pakate ei oroa faaroo. Mea au aˈe na ratou ia haere e faahee i nia i te hiona.

No te mau taata e rave rahi, ua riro te mau taoˈa faufaa roa ˈˈe o te Pakate ei mau taipe no te arearearaa e te mau hautiraa. Ei hiˈoraa, eita e ore e ua riro te huero moa, ei taipe matau-roa ˈˈe-hia o te Pakate i roto i te rahiraa o te mau fenua. E auraa faaroo to te taipe o te huero moa. Te parauhia ra e te faahohoˈahia ra te tia-faahou-raa o Iesu Mesia na roto i te ora apî o te fa mai na roto i te hoê huero moa aita hoi to ˈna ora. No reira, ua riro te peu e faaunauna i te mau huero moa e te mau peni nehenehe e te mau hohoˈa ei tuhaa faufaa roa o te oroa Pakate.

No te rahiraa râ o te taata, te vahi faufaa roa ˈˈe o te huero moa o te Pakate, o te faaanaanataeraa ïa i te mau tamarii. I roto i te hoê oire, e hope te maimiraa matauhia i te huero moa no Pakate i te fare pure na roto i te hoê taputôraa huero moa! “No te mau tamarii,” o ta Robert J. Myers ïa e parau ra i roto i ta ˈna buka Oroa (beretane), “te auraa o te Pakate ra, o te arearearaa ïa, te mau ohipa maere, e te mau rahiraa momona e navai e tae roa ˈtu i te oroa Halloween!”

Ia au i tei parauhia ra, te tapea noa ra te Pakate i te hoê parahiraa teitei i roto i te mau oroa faaroo a te amuiraa faaroo kerisetiano. I roto râ i te tupuraa mau, e au ra e te rahi noa ˈtura te taata o te faaiti ra i to ˈna faufaa, o te hiˈo ra i teie oroa mai te tahi noa tau oroa. E o oe iho? Eaha to oe manaˈo no nia i te Pakate? Hou oe e pahono ai i teie uiraa, e tia ia oe ia aniani na mua e: ‘Eaha te manaˈo o te Atua no nia i te Pakate? Te oaoa ra anei oia i teie oroa? Mea titauhia anei ia faatupu te mau kerisetiano i te oroa Pakate?’

[Parau iti faaôhia i te api 4]

Ua riro te mau taoˈa o te Pakate ei taipe no te arearearaa e te mau hautiraa