Te papai mai nei te feia taio

Tairururaa i Europa Hitia o te râ Ua putapû roa vau i te mau tumu parau “Te mau hoa o te tiamâraa a te Atua—Ua oaoa ratou i Europa Hitia o te râ.” (8 no titema 1991) I te mea e ua paari au ei Ite no Iehova, aita vau i haapao i te faufaaraa o te maa pae varua o ta tatou e fanaˈo ra. Teie râ, i to ˈu iteraa e mea nafea to te mau Ite i Europa Hitia o te râ fanaˈoraa no te taime matamua na roto i to ratou iho reo i te mau buka e vai ra ia tatou e rave rahi matahiti i teie nei, ua turai te reira ia ˈu ia haafaufaa i te haamaitairaa o ta ˈu e fanaˈo ra oia hoi te riroraa ei melo no teie faanahonahoraa faahiahia mau.

T. O., Tapone

Ia tahoê maite te mau utuafare Ua oaoa roa vau i te mau tumu parau ra “E te mau utuafare—A tahoê maite, eiaha e tiai e ia maoro roa.” (8 no setepa 1991) Ua tahe roa to ˈu roimata i to ˈu iteraa i te api rapaeau nehenehe mau. Ua maiti-atoa-hia e ua papaihia te mau parau e te mau pereota tataitahi ma te ara maite e te here! Mauruuru i to outou faahaamanaˈoraa ia matou i te faufaaraa ia tahoê maite i roto i te utuafare.

K. E., Hau amui no Marite

Teie te mau tumu parau putapû roa ˈˈe o ta ˈu i ore i taio aˈenei. E rave rahi o te manaˈo nei e ia haapii tatou i te Bibilia i ta tatou mau tamarii, ia afai atu tatou ia ratou i te mau putuputuraa kerisetiano, e ia poro tatou na muri ia ratou, ua manuïa ïa tatou ei metua. Ua taa râ ia ˈu e e tia i te mau metua o te manuïa mau ia faatupu i te hoê taairaa piri roa e ta ratou tamarii—te hoê taairaa o te haapapu i te tamarii e te here ra to ˈna mau metua ia ˈna. Ua faataa-ê-na-hia teie manaˈo i roto i te mau tumu parau na mua ˈtu, teie râ, aita vau i putapû aˈenei mai teie te huru.

T. H., Hau amui no Marite

Hou vau a faaipoipo ai, ua riro vau ei haapao buka. Ua oaoa roa vau i ta ˈu ohipa. Ua fanau maira vau i te tamarii e ua faaoti ihora vau e vaiiho i ta ˈu ohipa no te faaea i te fare e ta ˈu mau tamarii. I te tahi râ mau taime, ua tupu mai te manaˈo haumani e ua hinaaro vau e haere faahou e rave i te ohipa. I muri aˈe i to ˈu taioraa i ta outou tumu parau, ua tupu mai te hoê anaanatae apî no nia i ta ˈu mau hopoia i nia i ta ˈu mau tamarii.

S. M., Hau amui no Marite

Te pereraa moni Mauruuru no te tumu parau “Te uiui nei te mau taurearea . . . Mea ino mau anei te pereraa moni?” (8 no novema 1991) I ta matou fare haapiiraa, mea au roa na te mau taurearea te pereraa moni. E noaa i te taata upootia e 20 yen i te hoê hautiraa; e afai mai vetahi taurearea e 2 000 yen i te fare haapiiraa! I te hoê taime, ua anihia mai ia hauti atoa vau. Ua feruri atura vau ahiri e mea ino mau anei te pereraa moni, e ua hinaaro vau e tamata i te hoê noa taime. I muri aˈe râ i to ˈu taioraa i te tumu parau, ua taa ia ˈu e e ere te pereraa moni i te ohipa maitai e mai te peu e e tamata oe i te hoê noa taime, eita ta oe e nehenehe e faaea faahou.

N. N., Tapone

Te parau mau Te papai atu nei au no nia i te tumu parau “Mea hoona anei ia faaite i te parau mau?” (8 no atopa 1991) I te mea e aita te mau Ite no Iehova e faaitoito ra i te mau ohipa faaetaetaraa tino i muri aˈe i te haapiiraa, e au ra e ua haafeaa teie tumu parau i te manaˈo.

C. P., Hau amui no Marite

Te faahiti ra te tumu parau no te hoê taurearea o tei hauti i te tairiraa popo e o tei haamauruuruhia no to ˈna parau-tia. Teie râ, no roto mai teie aamu i te vea ra “Sports Illustrated.” No reira, e ere ïa te taurearea e faahitihia ra i ǒ nei i te Ite no Iehova. Noa ˈtu râ, ua neneihia teie tumu parau, eiaha no te faaitoito ia apiti atu i roto i te ohipa faaetaetaraa tino, no te faahohoˈa râ i te faufaa o te faaiteraa i te parau mau.—Feia nenei.

Taioraa E 13 matahiti to ˈu. Ua tano roa te tumu parau “A taio no te faaano i to outou ite (8 no tiurai 1991) no ˈu. Ia taio anaˈe au, e taio vau i te hoê parau i te hoê taime. E haere ê roa ïa to ˈu feruriraa e e tia ia ˈu ia taio faahou na nia iho ia taa ia ˈu i te auraa. Ua tauturu rahi mau â ta outou mau haamaramaramaraa ia ˈu.

A. K., Polonia

Te tauiraa o te feia ohipa ino Ua mau ta ˈu tamaiti i te auri e ua tamatahitihia o ˈna i te A ara mai na!, e ua pure uˈana vau ia haaputapû vetahi mau tumu parau i to ˈna mafatu. No reira, ua oaoa roa vau i te tumu parau ra “Te puai o te parau mau no te faatitiaifaro i te haerea” (8 no tiurai 1991). Ua taˈi au i to ˈu taioraa i teie tumu parau no to ˈu mauruuru rahi i te Atua, o ‘te hinaaro ra ia noaa paatoa te tatarahapa.’ (Petero 2, 3:9) Peneiaˈe e tatarahapa atoa ta ˈu tamaiti.

A. F., Hau amui no Marite