E nafea ia tamau aau i te mau irava Bibilia?

I te tahi taime, e ere i te mea ohie ia haamanaˈo i te hoê irava ta oe e faaohipa pinepine ra aore ra ihea te reira i te papai-raa-hia. E irava paha teie tei tamahanahana ia oe, tei tauturu ia oe ia haapae i te tahi manaˈo tano ore, aore ra ta oe e faaite ia vetahi ê. (Sal. 119:11, 111) Teie mai te tahi mau manaˈo tauturu no te tamau aau i te mau irava Bibilia.

• A faaohipa maitai i te JW Library^®. Ia taio oe i te Bibilia i roto i te JW Library, e tano paha oe i nia i te hoê irava ta oe e hinaaro e tamau aau. I tera taime, e nehenehe oe e tuu i te tahi nota aore ra e faaherehere i teie manaˈo i roto i te tahi tuhaa ta oe e tuu “Te mau irava ta ˈu e au roa.”

• A tuu i teie irava i te vahi ite-maitai-hia. A tapao i ta oe irava i nia i te hoê iri papai, e a tuu i teie nota i te hoê vahi pinepine oe i te haere. Ei hiˈoraa, e tuu vetahi i nia i te hiˈo aore ra i mua i te faatoetoeraa. Te vai atoa ra o te pata i te hohoˈa o teie irava a tuu atu ai i roto i ta ratou vini. Tera ïa te hohoˈa e pura mai i nia i te paruai o ta ratou vini aore ra matini roro uira.

• A hamani e a faaohipa i te tahi mau tareta no te tamau aau. I te hoê pae o te tareta, a papai i te irava e i te tahi atu pae, a papai eaha te parauhia ra i roto. I muri iho, a hiˈo i te pae o te irava e a tamata i te haamanaˈo eaha te parauhia ra i roto. E ia hiˈo oe i te tahi atu pae o te tareta, a taio i tei parauhia i roto e a tamata i te haamanaˈo ihea teie mau parau i te faahiti-raa-hia.