Te papai mai nei te feia taio

Rap aore ra Rock? Te oaoa nei au i te mea e ua huti outou i te ara-maite-raa i nia i te fifi o te peu faufau i roto i te upaupa o teie nei tau na roto i te tumu parau ra “Te peu faufau i anoihia i roto i te upaupa.” (8 no mati 1991) Teie râ, ua hape outou i to outou faahitiraa i te pǔpǔ “2 Live Crew” i roto i te anairaa o te mau pǔpǔ hauti upaupa rock. Inaha, e pǔpǔ hauti upaupa rap ratou, oia hoi, e faahiti ratou i te mau parau eita râ ratou e himene.

D. L., Fenua marite

Mauruuru no teie haapapuraa. Oia mau, e faariro vetahi i te upaupa rap mai te hoê noa tuhaa o te upaupa rock. Inaha hoi, e tia i te mau kerisetiano ia maiti maitai i ta ratou upaupa e faaroo, noa ˈtu eaha te iˈoa.—Te feia nenei.

Te tapearaahia i te fare maˈi Mauruuru no te mau haamaramaramaraa faufaa e te papu i vauvauhia i roto i te mau tumu parau ra “Te mau fare maˈi—Nafea outou e nehenehe ai e faaruru?” (8 no mati 1991) Te hinaaro atoa nei au e parau e, mai te peu e e ere i te hoê huru tupuraa ru, e ia faataa-papu-hia te huru o te maˈi, e tia ia imi hau atu â i te parau no nia i to tatou maˈi e to ˈna mau ravea rapaauraa. E nehenehe tatou e rave i te mau faaotiraa maitatai mai te peu noa e ua haamaramarama-maitai-hia tatou. E noaa mai te mau haamaramaramaraa e rave rahi i te fare vairaa buka a te oire aore ra i te fare maˈi.

E. D., Fenua marite

Te peu faahinaaro Ua anaanatae roa vau i te tumu parau ra “Te uiui nei te mau taurearea. . . Eaha te inoraa o te peu faahinaaro?” (8 no me 1991) Te vai ra te hoê hoa to ˈu o te faahinaaro noa i te mau tamaroa, e mea pinepine, e au ra e mea arearea roa na ˈna. Ua oaoa roa vau i te iteraa e “mea tia iho â ia hinaaro e ia herehia tatou.” Teie râ, te taa ra ia ˈu i teie nei e e peu atâata roa te peu faahinaaro; e tutava ïa vau i teie nei ia faaite i te anaanatae mau i te mau huru taata atoa.

S. I., Tapone

Te taata e te mau animala Te haamauruuru nei au ia outou no te mau tumu parau ra “Te tau e ora ˈi te taata e te animala ma te hau.” (8 no eperera 1991) Hoê matahiti to ˈu haapiiraa i te Bibilia, e ua ite au i teie nei e te opua nei te Atua e faariro i te fenua nei ei paradaiso mure ore. I muri aˈe i to ˈu taioraa i teie mau tumu parau, ua puai roa ˈtu â to ˈu here no Iehova, e tae noa ˈtu to ˈu hinaaro e ora ma te hau e te mau animala i roto i te ao apî.

A. S., Beresilia

Mea au roa iho â na ˈu te mau animala. Ua opua atoa hoi au e haere atu i te fare haapiiraa tuatoru no te haapii i te toroa no nia i te mau animala. Eaha râ te faufaa ia horoa i to ˈu oraraa taatoa no te tuatapapa i te tahi noa mau huru animala? I roto i te ao apî i tǎpǔhia mai e Iehova, e nehenehe ïa vau e tuatapapa i te mau animala atoa, e a muri noa ˈtu. I to ˈu taioraa i teie tumu parau, ua taˈi au i te oaoa i te manaˈoraa e e tupu mau â teie hinaaro to ˈu.

L. M., Fenua marite

Te mau peu au ore I to ˈu hiˈoraa, ua riro te tumu parau ra “Nafea ia ape i te rave faahou i te mau peu au ore.” (8 no eperera 1991) mai te hoê rata i faatae-taa-ê-hia mai ia ˈu nei. Aita te peu au ore o ta ˈu e rave nei i faahitihia, tera râ, te manaˈo nei au e e faufaahia vau i te mau faaueraa tumu i vauvauhia i roto i teie tumu parau. Maoti te tauturu a Iehova, e haapae roa vau i teie peu!

S. M., Fenua marite

Fatata e 11 matahiti i teie nei, ua manuïa vau i te pararai e 36 kilo, tera râ, ua poria faahou vau i muri iho. Te haapao faahou ra vau i to ˈu kilo, e ia ite au e te topatopa rii ra vau, e taio faahou vau i te tumu parau. Ua faaohipa atoa vau i te reira e e piti taata tei haamata i te haapii i te Bibilia o te aro nei no te haapae i te avaava.

E. T., Fenua marite

Ua taˈi roa vau no te nehenehe o teie tumu parau. Te mea i haaputapû roa ia ˈu, o te vahi ïa e faahiti ra i te manaˈo ra: ‘Aita vau i manuïa, e faaea ïa vau.’ Mai te reira hoi to ˈu manaˈo na mua ˈˈe, teie râ, ua tauturu mai outou ia ˈu ia taui i to ˈu huru hiˈoraa.

S. N., Beresilia