Taui, no te aha?

MEA iti roa i rotopu ia tatou tei farii e te vai ra ta tatou mau hape ino mau. E mea tano iho â te papai a te rohipehe ekotia ra o Robert Burns: “Ahiri e e puai tei horoa mai na tatou, ei ô, te iteraa i to tatou iho huru mai ta vetahi pae e ite ra”! Oia mau, e mea ohie ia ite i to vetahi ma hape e e oioi noa tatou i te aˈo ˈtu ia ratou no te faaite e mea nafea ia haamaitai ia ratou iho. E inoino râ tatou ia horoahia mai te tahi mau manaˈo hinaarohia e tatou no te taui i to tatou iho haerea. E faariri ra anei te reira ia oe?

E faaea tatou maa taime rii e e feruri tatou i te hoê ao tia roa i reira mea mâ, oraora maitai, oaoa e te haavare ore te taata atoa; e tae noa ˈtu te feia faatere, mea mǎrû ratou e te hamani maitai ma te anaanatae i te rave i te mea maitai no vetahi ê; aore ïa e miimii faahou, aore e taata e haavî i to ˈna taata-tupu; mea faaroo te tamarii i to ratou mau metua here e te haapao maitai; eita e ite-faahou-hia te huru iria taue noa—aore ïa e haavîraa uˈana, aore e taparahiraa taata, aore e taiataraa faahou i reira; e mea maitai iho â te taata e te tiaturi te tahi i te tahi; i reira tatou e fanaˈo ai i te oraraa maitai e te peapea ore.

Te ite ra anei oe ia oe i te oraraa i roto i te hoê ao mai te reira te huru, mai te peu e e tupu mau â teie ao maitai roa? Oia mau, teie te parau apî maitai no roto mai i te Bibilia e, ua fatata teie ao i te tupu iho â i nia i te fenua nei. I teie nei, teie ïa te uiraa faufaa: E erehia oe i teie totaiete maitai roa no te tahi noa mau peu ta oe o te ore e tia? I to oe manaˈoraa, e mea fifi roa anei te tutavaraa no te faaau ia oe no te oraraa i roto i teie huru paradaiso?—Isaia 65:17-25; Petero 2, 3:13.

I teie nei iho â, na mua ˈˈe teie ao apî e tae mai ai, e nehenehe anei oe e haamaitai i to oe oraraa ahiri oe e rave i te tahi mea no nia i to oe haerea e to oe huru? Mai te peu e e, no te aha ïa oe e ore ai e taui? E nehenehe oe e manuïa. A haamanaˈo e, a tahi, na te mau mea e rave rau i ohipa i nia ia oe no te haamau i to oe haerea, no reira na roto i te haavîraa ia oe e te aau tae, e nehenehe oe e faaapî, i teie nei iho â, i to oe haerea.

E patoi mai paha oe i te na ôraa e: ‘E nehenehe mau râ anei vau e taui? Ua tamata aˈena vau, e rave rahi taime, e aita vau i manuïa. Tera iho â to ˈu huru, e aita ta ˈu e ravea aˈe!’

A hiˈo na ia Paulo, aposetolo a Iesu Mesia. (Roma 7:18-21) Ua taui o Paulo, na mua ˈˈe e taata faahua parau-tia oia o tei patoi uˈana i te mau kerisetiano, e ua riro mai oia ei kerisetiano. Ua taui o ˈna no te mea ua hinaaro mau oia. Aita oia i faarue i mua i te mau paruparu aore ra te mau huru i noaa mai ia ˈna no ǒ mai i to ˈna mau tupuna. Aita oia i tiaturi e e ore roa ta ˈna e nehenehe e taui i to ˈna huru taata tahito. I to ˈna aˈe pae, ua tutava ïa o ˈna. Ua noaa râ ia ˈna te mau tauturu e rave rahi.—Galatia 1:13-16.

Nohea mai ïa teie tauturu?