Te kita—To ˈna huru hamaniraa, to ˈna huru taˈiraa

Ua matauhia te mau iˈoa ra Andrés Segovia, Carlos Montoya, e Chet Atkins e te mau mirioni taata na te ao nei. Eaha te mea e tahoê ra ia ratou? Ua faaanaanatae ratou i te mau taata na roto i te hautiraa i te hoê taoˈa e parari ohie noa, hamanihia i te raau e te taura—te kita.

E faaroohia te taˈi o te kita i nia i te fenua paatoa, hautihia e te feia e au ra i te upaupa e te feia e rave ra i taua ohipa ra. Na Andrés Segovia, taata faataˈi kita paniora tei pohe i teie nei, te hoê o te feia i faaite i to ˈna faufaa, i huti mai ia ˈna mai roto mai i te pouri no te faariro ia ˈna ei taoˈa hautiraa upaupa aravihi.

No te aha te kita i tuiroo roa ˈi? No te mea paha e ohipa to ˈna taˈi, ia hautihia te flamenco, te pehe aravihi, aore ra te upaupa no teie tau, ia au i te huru taa ê o te mau taata. E mea ohie atoa hoi ia afaifai ia ˈna.

Noa ˈtu eaha te mau tumu o to ˈna manuïaraa, e horoa te huru hamaniraa o te kita i te hoê taa-ê-raa rahi i roto i to ˈna taˈi. Mea hamanihia te mau kita maitatai roa ˈˈe na roto i te here rahi e te atuaturaa e te hoê taata hamani tei piihia te hoê luthier. E haere anaˈe na e mataitai i te fare ohipa a te hoê taata hamani i Tennessee (Fenua Marite), e e hiˈo anaˈe na i te hamaniraa o te kita.

Te mau taoˈa maitatai roa

A fariihia ˈi matou e te taata hamani i roto i ta ˈna fare ohipa, te tapao nei matou i te rahiraa raau. Eiaha râ te mau huru raau atoa. Ua maiti-maitai-hia te tâpû raau tataitahi e ua haaputuhia no te hamani i te mau kita no a muri aˈe. Te raau epicea e te arezi no te muaraa; te raau o te tarona, te acajou e te érable no te tohe e te mau hiti; e te acajou e te cedro no te tapearaa. No te mau kita flamenco, e faaohipahia te berusi (cyprès) e vai matie noa e te sycomore no te tohe e te mau hiti. I to matou raveraa hoê o taua mau tâpû raau ra, ua ite matou i te hoê taio mahana tei papaihia. Ua faataa mai to matou hoa, te taata hamani e: “Mea au aˈe na ˈu e faaohipa noa i te raau tei mǎrô e pae matahiti te maoro.” No te aha? “No te mea ua faaite te mau matahiti ohiparaa e e haapapu mai te matahiti, te huru o te raau, e te aravihi o te taata hamani, i te mau huru taa ê hopea o te kita.”

E hiˈo anaˈe na na nia i te tapono o te taata hamani a hamani ai oia i te hoê kita parauhia classique. Te vai ra e piti huru kita: te kita paniora, aore ra classique, e te kita hamanihia i te taura auri. Eaha te mau taa-ê-raa? Te pahono ra oia e: “E rave rahi mau taa-ê-raa i rotopu ia raua, na te maitiraa râ i te mau taoˈa o te taura e faaite ohie mai i te huru taa ê. Mai ta to ˈna iˈoa e faataa ra, mea hamanihia te kita taura auri i te mau taura auri. Ua hamanihia oia na roto e rave rahi mau faito e mau huru. I te tahi aˈe pae, te vai ra e toru taura hamanihia i te nylon aore ra i te aau animala i nia i te kita classique, e e toru taura tirita haaatihia i te auri.”

Mea au aˈe na to matou taata hamani ia haere mai te taata hoo e mataitai i ta ˈna fare toa, e nehenehe ïa o ˈna e faaroo ia hauti anaˈe o ˈna. Inaha, e nehenehe ta ˈna e hamani i te hoê kita e tano maitai ia ˈna. Mea nafea? Te faataa ra to matou taata hamani e: “E hiˈo vau eaha te puairaa ia patapata ratou i te mau taura, te huru taˈi ta ratou e hauti. E hinaaro atoa vau e ite e nafea ratou e faaohipa ˈi i te kita. E nehenehe ïa ta ˈu e faatano i te huru hamaniraa e te taata hoo. E hauti mǎrû anei ratou? E faaiti ïa vau i te meumeu aore ra te faito o te tahi mau tuhaa o te kita ia nehenehe o ˈna e horoa ohie i te hoê taˈi puai aˈe. Mea puai anei ratou? E nehenehe e faateiaha atu â i te hamaniraa o te kita.”

Te mau tuhaa o te hamaniraa

Te niaraa o te afata, aore ra te vahi tamauraa i te taura: E haamata te hamaniraa na roto i te maitiraa i te mau raau e faaohipahia. E maiti maite ta matou taata hamani i roto i te hoê anairaa epicea e i te tahi taime e tapiri oia i te hoê apaapa i pihai iho i to ˈna tariˈa e e patapata oia e to ˈna rimarima. E faaroo oia e rave rahi ohipa; mea maramarama anei te taˈi, mea teiaha, mea navenave e e vai maoro anei te taˈi, aore ra e horoa anei oia i te hoê taˈi puai ore? Fatata te niaraa o te afata e te tohe paatoa e hamanihia ma te raveraa e piti tâpû iri tei tuea noa. Mea eehia i nia i te hoê iri e mai te hoê buka ra te huru ia iritihia. Hoê â ïa to raua huru e hoê â taˈiraa.—Hiˈo i te hohoˈa i raro mai.

Te faaunaunaraa na te hiti: E faarairaihia te vahi tamauraa i te taura e 3 milimetera i te meumeu, e e faatanohia te faaetaetaraa o te auvaha, aore ra te faaunaunaraa na te hiti, i roto i te tâpûpûraa i faataahia no ˈna. E rave rahi mau tâpû raau e te mau peni huru rau tei ravehia no te hamani i te faaunaunaraa e e horoa te reira na te taata hamani i te ravea no te faaite i to ˈna ite no te faaunauna. Mea pinepine, e titauhia hoê mahana ohipa taatoa no te hamani e no te tamau i te faaunaunaraa na te hiti. Ia mǎrô maitai anaˈe te tapiri o te faaunaunaraa, e faarairai-faahou-hia te niaraa, e 2,5 milimetera. E tâpûhia ïa te niaraa no te hohoˈa o te kita, e e tapirihia te mau taamuraa paatoa no te haapaari i raro aˈe i te vahi tamauraa taura. Mea faufaa taua mau taamuraa no te horoa i te taˈi e no te haapaari i te kita. Ua tuea te manaˈo o te rahiraa o te feia hamani e, na te vahi taamuraa taura e horoa rahi i te taˈi e te reira te vahi faufaa roa ˈˈe o te kita.

O te raau tarona no Beresilia, te maitiraa matamua a te taata hamani no te tohe e te mau hiti no ta ˈna mau hohoˈa nehenehe, te mau peni huru rau, e to ˈna mau huru taa ê no nia i te taˈi.

Te ohipa fifi o te raau

Te mau hiti: I muri iho, e faarairai te taata hamani i te hiti o te raau tarona o te kita i nia e 2,4 milimetera. I teie nei, e ravehia te tuhaa fifi roa ˈˈe, te haaatiraa i te mau hiti no te hamani i te hohoˈa o te kita. Ua matauhia e e tapuruhia te mau hiti o te raau tarona i roto i te pape e 24 hora te maoro, e e haafefehia ïa no te horoa i te hohoˈa na roto i te tapiriraa i nia i te hoê auri veavea. E riro mai te pape i roto i te raau ei hou, na ˈna e haamǎrû i te raau, e e faaohie atoa i te haaatiraa. “Oia mau,” ta ta matou taata hamani e parau ra, “ua parari te tahi ia ˈu i to ˈu haapiiraa mai.” Mea au aˈe na te taata e hamani ra i te tahi noa tau kita, e haaati i te mau hiti ia au i taua huru raveraa ra no te mea e faatia te reira ia ˈna ia taui i te haafeferaa o te kita tataitahi, e mea varavara e te vai ra e piti kita hoê â hohoˈa.

Te tapearaa: I teie nei, e faanainaihia te tapearaa. Te mau raau e rave-pinepine-hia, o te acajou ïa e te cedro. Ua maitihia taua mau raau ra no to ratou paari, to ratou papu, e to ratou faito mâmâ. No te mea hoi e e kita classique teie, e pee ïa te taata hamani i te huru hamaniraa a te fare haapiira paniora, e tapirihia ïa te mau hiti i roto i te mau area i hamanihia i roto i te tapearaa, e eita e nehenehe e tataratara i te tapearaa mai te tahi atu mau kita. E horoahia to ˈna hohoˈa hopea ia tapiri-anaˈe-hia te mau tuhaa taatoa o te kita.

I teie nei, e tapirihia te niaraa i nia i te mau hiti, no te mea râ e mea rairai roa te mau hiti, e tataipitihia ïa ratou e te hoê hatua iri. I te tahi taime, e maitihia te arobe no to ˈna faito mâmâ e e fefe ohie oia ia tapuru-anaˈe-hia i roto i te pape.

Te tohe: I muri iho, e haamata ta matou taata hamani i te ohipa i nia i te tohe na roto i te raveraa i te raau tarona no Beresilia. Mea hau aˈe na te rahiraa o te feia hamani e hamani i te tohe i roto i te hoê raau o te tano maitai i te peni e te mau hohoˈa o te mau hiti. A faaroo na ia tatara anaˈe te taata hamani i te tahi meumeuraa iti i roto i te tohe, ia haafefe anaˈe oia no te tamata i te etaeta, ia taviri anaˈe no te faaroo i te taˈi, e i te pae hopea, e faaiti faahou oia i te meumeuraa. Ia navai anaˈe te rairai o te iri, e taˈi oia mai te hoê auri. I muri aˈe, e tapirihia na raau e toru no te haapaari. Mea pinepine e mau tâpû raau epicea aore ra acajou, tei maitihia no to ratou paari, to ratou faito mâmâ e to ratou taui-ore-raa ia haumi anaˈe. Mea faufaa roa to ratou paari, inaha, mea rairai roa te tohe. I te tuhaa i muri aˈe, e tapirihia te tohe mai te niaraa atoa.

I teie nei, te haamata ra oia i te rave mai i te hohoˈa o te kita. Ua hau rii te vahi taamuraa taura e te tohe, no reira raua e tâpûhia ˈi no te horoa i to raua huru hopea. No te paruru i te mau poro, e tapirihia te mau raau iti i te roaraa o te tuatiraa o te mau hiti e te vahi taamuraa taura e te tohe. Ua matauhia i te maiti i te raau iti tarona no to ˈna nehenehe e to ˈna paari.

Ia haamata te upaupa

Te tamauraa taura i nia i te tapearaa e te vahi tururaa i te mau taura: E toe noa ïa i teie nei i te tapiriraa i te tamauraa taura i nia i te tapearaa i te raau ereere, e te vahi tururaa i te mau taura i te raau tarona. E faarairaihia te tamauraa taura i nia i te tapearaa e 6 mm e e tâpûpûhia to ˈna hohoˈa hopea. I muri iho, e tamauhia te mau niuniu auri no te tapea i te taura, i roto i te mau tâpûpûraa i nia i te tamauraa taura i nia i te tapearaa ma te faaarea maitai ia ratou. Ua faataahia taua mau area ra ia au i te hoê numeraraa te tia ia faaturahia. Mai te peu e e tamauhia ratou i te hoê vahi tano ore, e faaroo oioi noa te tariˈa i te hape, e eita te kita e nehenehe e faaohipahia. E tapirihia te tamauraa taura i nia i te tapearaa tei faanainaihia, e e haamata te ohipa i nia i te tuhaa faufaa o te taoˈa, oia hoi te vahi tururaa i te mau taura.

Te vahi tururaa i te mau taura, o te hoê ïa tuhaa nainai o te raau tarona tei tapirihia i nia i te vahi taamuraa taura, i reira te mau taura e haamauhia ˈi. Mea faufaa atoa to ˈna vahi vairaa mai to te mau niuniu auri no te tapea i te taura, e e faataahia te reira na roto hoê â numeraraa. Eita, eita ta matou taata hamani e numera i te reira no te kita tataitahi. E hamani oia i ta ˈna mau kita atoa hoê â huru rahi e e haapao maitai oia i te hoê arearaa. Mea faufaa te tapiriraa o te vahi tururaa taura. Ua farerei vetahi feia hamani kita i te mau haafifiraa na roto i te toparaa te vahi tururaa taura! Eita te reira e maerehia, ia haamanaˈo outou e e nehenehe te mau taura o te kita e faaohipa i te hoê etaetaraa hau atu i te 45 kilo, amuihia i te puai e faatupuhia e te mau hautiutiraa o te mau taura.

Te hoê faaotiraa rave-maitai-hia

Te faaoioi ra tatou i te parau. Te haamanaˈo ra anei outou i taua tapearaa tei faanainaihia? E, e tia oia ia tâpûhia no te horoa i to ˈna hohoˈa hopea. Te faataa ra ta matou taata hamani e: “Mea au na ˈu ia tae mai te fatu apî o te kita no te horoa mai i to ˈna manaˈo i nia i te hohoˈa o te tapearaa, inaha, e nehenehe te hoê taata tairi kita e ite i te hoê taa-ê-raa 1 milimetera i roto i te meumeuraa!”

Fatata ta tatou kita i te oti i teie nei. E toe noa te tamâraa ia ˈna, te hahauraa e te faahinuhinuraa i te papie taratara. Ia mauruuru anaˈe te taata hamani i te niaraa e te hohoˈa o ta ˈna taoˈa i hamani, e parai oia i te vaniti no te paruru i te kita.

Eita te manaˈo o te feia hamani e tuea no nia i te vaniti maitai aˈe no te kita. Teie râ, te rave nei te rahiraa o te feia hamani no teie tau i te hoê vaniti anaana e mǎrô oioi noa. Ia tuuhia te vaniti, e nehenehe te kita e hautihia e piti hebedoma i muri iho. Eaha te mau ravea faaotiraa o te horoa mai i te taˈi kita navenave aˈe? Te pahono ra to tatou hoa e: “Ua rau te huru o te mau manaˈo, e rave rahi râ mau kita paniora tuiroo tei tapoˈihia i te vaniti farani. Teie râ, e titau taua vaniti ra ia faaapîhia i te mau pae matahiti atoa.”

Ia taˈi te upaupa!

Eita e nehenehe e faaoromai faahou a piri mai ai te taime no te faataˈi i te kita! E tamauhia te mau taura i nia i te vahi tamauraa taura i te hoê pae e i te vahi faatanoraa i te tahi aˈe pae, i nia i te upoo o te kita. Ua tae i te taime i teie nei no te tamata i te taˈi. E faatanohia te etaeta o te mau taura e horoa i te nota tano. I muri aˈe i te hoê ohipa roa e te faaoromai maite, ua oti te kita!

Teie râ, aitâ oia i ineine atura no te hautiraa mau. Te faataa ra te taata hamani e: “I te rahiraa o te taime, e tapae te hoê kita apî i nia i to ˈna faito maitai roa ia hautihia oia e ono avaˈe. Teie râ, e nehenehe e ite e eaha te huru o te kita. Mea horoa maitai anei te nota e te puai? Mea taˈi maitai anei te mau nota teitei mai te kerehe ra? E tano anei te mau nota noa ˈtu eaha te vahi e tuuhia ˈi te mau rimarima? E roaa te huru maitai o te mau taˈi e hautihia e te taata hauti, maoti te faito aravihi o te taata hamani na roto i te maitiraa i te mau taoˈa maitatai e te faarahi-roa-raa i te faahiahia na roto i te hoê amuiraa tano maitai.”

No reira, ia faahiahia faahou anaˈe outou i te hautiraa aravihi a te taata faataˈi kita, a haamanaˈo na e te huru hamaniraa o te kita, te maitiraa taoˈa a te taata hamani e to ˈna aravihi, e haapapuhia na roto i te hoê faito rahi e to ˈna taˈi.—Na te hoê taata taio.

[Hohoˈa i te api 28]

I te pae aui: te raau i reira e tâpûhia ˈi e piti afaraa o te vahi taamuraa taura

I te pae atau: tamauraa i te faaunaunaraa na te hiti e te haaatiraa i te mau hiti

[Hohoˈa i te api 29]

I nia: tapiriraa i te mau raau i raro aˈe i te niaraa o te kita

I raro: tamauraa i te mau hiti

[Hohoˈa i te api 30]

Tamauraa i te mau taamu niuniu i roto i te tapearaa