Te papai mai nei te feia taio

Ia taa te mau metua Te tuatapapa ra te tumu parau “Te uiui nei te mau taurearea . . . Te faataa nei to ˈu mau metua—Eaha te tia ia ˈu ia rave?” (8 no atete 1990) i te hoê huru tupuraa o ta ˈu iho i farerei ei metua e ono matahiti i teie nei. Ua tano roa te pereota e na ô ra e “ia atuatu noa outou i te riri e te manaˈo tahoo, e nehenehe ïa te reira e faaino roa i to outou huru,” o te ohipa ïa i tupu i roto i to ˈu utuafare. O te mau manaˈo ïa ta ta ˈu e toru na tamarii i atuatu noa na i roto i na matahiti e ono i mairi aˈenei. No reira, ua hapono atu vau i teie tumu parau e te hoê rata no te parau atu ia ratou e mea here roa mau ratou. Te tiaturi nei au e e maitai atu te mau ohipa.

M. H., Fenua Tapone

Haereraa i mua i te pae varua Mauruuru roa no te tumu parau “Te uiui nei te mau taurearea . . . Nafea vau e haere ai i mua i te pae varua?” (8 no setepa 1991) E rave rahi hoi mau manaˈo maitai roa o ta ˈu e nehenehe e faaohipa. E piti taime to ˈu taioraa i teie tumu parau. Ua papai atoa vau i te hoê tabula o te mau tapao i te pae varua o ta ˈu e titau ra (mai ta outou i faataa mai), e e pine roa ˈtu vau i nia i te pǎpai.

G. K., Etats-Unis

Auaa ta outou tumu parau, inaha i teie nei, te tamata nei au i te taio i te Bibilia 15 minuti i te mahana. Mea pinepine râ, e hau atu â te taime o ta ˈu e rave. E rave rahi mau mea o ta ˈu i haapii; e maerehia oe!

T. L. P., Kanada

Haapueraa pehu rahi Mea au roa na ˈu te tumu parau ra “E moe roa anei tatou i raro aˈe i te hoê haapueraa pehu rahi?” (8 no setepa 1990) Mea iti roa te feia e taa ra i te rahiraa pehu e hamanihia ra i te mau mahana atoa e te atâataraa o teie ohipa i nia i te palaneta. Mauruuru roa no te maramarama maitai o ta outou tumu parau.

B. S., Beresilia

No te aha te Atua e vaiiho noa ˈi i te mauiui Ua tatara ê na outou i teie uiraa na roto e rave rahi mau huru tuatapaparaa e e rave rahi taime na mua ˈtu. Teie râ, mea faahiahia roa te tumu parau i neneihia i roto i te numera o te 8 no atopa 1990. Mai te mau hohoˈa e tae atu i te omuaraa parau, oia, mea nehenehe pau roa!

G. H., Etats-Unis

Ua tauturu te tumu parau ia ˈu ia haapapu i to ˈu mau tiaturiraa no nia i te mau tumu o te ino e no nia i te tau i mua nei. I te tahi aˈe pae, ua fatata roa ˈtu â to ˈu mau taairaa e o Iehova.

J. H., Etats-Unis

Te ohipa imiraa moni o te toto Ua anaanatae roa vau i te mau tumu parau no nia i “Te toto: Te hoê ohipa imiraa moni rahi” (8 no atopa 1990) no te mea ua faaauhia mai ia ˈu te hoê ohipa aufau-maitai-hia oia hoi te iritiraa i te toto na te hoê fare haaputuraa toto. I muri aˈe i to ˈu taioraa i teie tumu parau, ua papu roa ia ˈu e mea ino roa teie ohipa. Noa ˈtu e e fanaˈo paha vau i te moni, ua feruri maite au i nia i te mau faahopearaa iino mau o te toto e ua patoi atura vau i teie ohipa.

R. M., Etats-Unis

E ora anei i rapae au atu i te fenua nei? Mauruuru no te tumu parau maramarama maitai ra “Te vai ra anei te ora i rapae au atu i te fenua nei?” (8 no eperera 1990) Aita vau i ite aˈenei i te hoê pahonoraa papu i teie uiraa e tae roa mai i teie nei. Ua tauturu mai râ te tatararaa papu i niuhia i nia i te Bibilia o ta outou tumu parau, ia ˈu ia taa maitai i te faufaa taa ê mau ta tatou e fanaˈo ra, oia hoi te oraraa i nia i teie palaneta otahi roa.

A. A. C., Beresilia