Te hoê diluvi rahi i te tahi hiti o te fenua
A feruri na i te hoê pape rahi o tei faaî roa i te fenua hoê â faito e te fenua Beretane, o Farani e o Helemani taatoa. O te ohipa ïa i tupu i te matahiti i mairi aˈenei i Queensland, Auteralia. Ua faarue te taata i te oire no Charleville e vai ra fatata i ropu mau i te tuhaa fenua i atihia. E toru tausani taata o tei puhapa i raro aˈe i te mau fare ie i nia i te hoê vahi teitei i te vahi tauraa manureva. Ua tii te hoê manureva tautau i te tahi mau taata tei paiuma ˈtu i nia i te tapoˈi fare.
Ua haere atu te hoê pǔpǔ iti e 35 taata no roto i te amuiraa a te mau Ite no Iehova no Charleville e haapu i ǒ te hoê Ite tei nia to ˈna fenua i te hoê vahi teitei e 10 km i rapaeau atu i te oire. Ua riro atura to ˈna fare ei pu no te faanaho i te tauturu no te feia tei atihia.
Ua haamata oioi noa ˈtura te mau Ite i te faanaho i te tauturu. I Dalby, e 550 km i te atearaa, ua faanahohia te hoê pǔpǔ feia tauturu no te tamâ i te mau fare tei î i te pape. I Roma, 270 km i te atearaa, ua haaputu te mau Ite i te maa e te tahi atu mau taoˈa e titau-ru-hia, mai te mau ahu taoto e te mau ahu. I muri aˈe i te hoê hiˈopoaraa na nia i te manureva no te ite i te faito o te mau ati, ua haere tia ˈtura te feia tauturu — tau hanere — i te vahi i tupu ai te ati.
Ua faaite ratou e “eita e nehenehe e faaau” i te hohoˈa o te vahi i atihia ra. E 5 tenetimetera vari e tapoˈi ra i te mau mea atoa. Ua purara haere te mau huˈahuˈa taoˈa fare na roto i te mau piha, ua ino roa te mau tapoˈi tahua, ua moe roa te mau tauihaa uira i raro aˈe i te pape e ua huri roa te mau pereoo. Te mâˈi noa ra te hâuˈa o te maa ino, te raau pê e te mau pehu na te mau vahi atoa.
Ua haamata te feia tauturu i te ohipa. I te mahana maa 28 no eperera, hoê noa hebedoma i muri aˈe i te pue pape, ua mâ roa te mau fare e te mau aua a te mau Ite no Charleville. Aita noa râ te ohipa tamâraa i navai. Ua tamau faahou te mau pǔpǔ rave ohipa i te uira i roto i te mau fare e ua tataˈi i te mau pereoo e te mau taoˈa fare. Ua tamau te feia haapao i teie toroa i te mau tapoˈi tahua apî; ua hamani te mau tamuta raau i te mau tauihaa fare apî; ua tataˈi te mau tamuta, te feia peni e te feia tamau auri pape i te mau tauihaa.
Te faahopearaa: E piti hebedoma i muri iho i te pue pape, ua hoˈi faahou atu te mau Ite atoa i roto i to ratou mau fare apî. Aita râ te feia rave ohipa i tauturu noa i to ratou mau hoa Ite no Iehova. I to te hoê pǔpǔ tamâraa ˈtu i te fare o te hoê katolika, aita o ˈna i faaea i te faaite i to ˈna maere.
I Brisbane, ua haafaahiahia te afata radio i te ohipa a te mau Ite. E rave rahi mau taata i Charleville tei maere roa i te iteraa ˈtu i te vitiviti o te ohipa a te mau Ite. Ua parau roa te hoê taata o tei patoi i te mau Ite na mua ˈtu e: “O te feia hoi teie o ta tatou i tiahi!”