Te papai mai nei te feia taio

Te mau utuafare hoê anaˈe metua Ua au roa vau i te tumu parau “Te uiui nei te mau taurearea... E afaro anei to ˈu oraraa mai te peu e hoê anaˈe to ˈu metua?” (8 no tiurai 1990). Ua faarue mai to ˈu metua tane ia matou e e piti anaˈe to ˈu matahiti. Ua haafifi mau â te reira i to ˈu tupuraa i te pae no te here. Ua riro maira vau ei taata ru haere noa e aita ta ˈu e nehenehe e faahoa ˈtu i te taata. Ua tapea noa vau i to ˈu mau manaˈo hohonu atoa i roto ia ˈu nei, e ua afaihia ˈtura vau i ǒ te hoê taote rapaau i te feruriraa. No te tahi mau taata, mea fifi roa ia paari i roto i te hoê utuafare hoê anaˈe metua. Teie râ, ia fariihia oia e ia taahia to ˈna manaˈo e to ˈna mau hoa kerisetiano, te feia iho â râ hoê â matahiti, e nehenehe te reira e tamǎrû i te taata o tei ahoaho roa i te pae no te mau manaˈo hohonu. Ua tutava mau â vau ia itea mai ia ˈu teie mau huru hoa. I teie mahana, maoti te hoê porotarama aifaito maitai, e nehenehe vau e faataa i te taime no te faaea e to ˈu metua vahine e to ˈu mau hoa apî, aita vau e oto noa nei i nia i to ˈu nei mau fifi na roto i te manaˈoraa e e ere faahou to ˈu utuafare mai i mutaa ihora.

T. A., Fenua Marite

Ua faarue mai ta ˈu tane ia ˈu e maha matahiti i teie nei. Ua taio mâua ta ˈu tamahine i te tumu parau, e ua parau maira oia e: “Ua ite oe, mea maitai roa vau. Te ora nei to ˈu mau metua i roto e piti fare taa ê, tirara ˈtu ai!” Ua haapapu atoa ta outou mau faataaraa i to ˈu manaˈo e aita to ˈu nei oraraa e faariro ra ia ˈu ei vahine huru ê roa, inaha, ua ore roa to ˈu peapea e to ˈu manaˈo faahapa ia ˈu iho o ta ˈu i faatupu noa na no nia i ta ˈu tamahine.

J. P., Fenua Marite

Putuputuraa eukumene no Europa Mauruuru no ta outou tumu parau “Haavahia na roto i to ratou iho vaha”. (8 no mati 1990.) Na ratou iho i faˈi e, ua moehia i te mau haapaoraa te parau tumu o te Bibilia e aita ratou e fariu ra i nia i te Basileia o te Atua. Ua tano maitai outou i te parauraa e ‘ua faahapahia ratou i ta ratou mau parau’. — Mataio 12:37.

D. P., Niu-Zelani

Te pure korona Aita te taatoaraa o te parau o ta outou e faataa ra no nia i te pure korona i tano (8 no tiunu 1990). Ua niuhia te rahiraa o te mau pure i nia i te mau aamu bibilia, e i te tahi taime, e faahiti-roa-hia te tahi mau irava a te mau Papai. Ia purehia te pure korona, e omuaraa maitai roa ïa no te hoê oraraa no te pae varua e e faatupu atoa i te mau haamaitairaa, mai te hau o te feruriraa e te oaoaraa i roto i teie ao fifi mau.

H. W., Italia

Mea faufaa roa te pure korona no te mau katolika aau rotahi e rave rahi. Teie râ, ua titau teie tumu parau i te faataa e te farii maira anei te Atua i teie peu aore ra aita. Hau atu, noa ˈtu e e nehenehe te hoê pure tei tamau-aau-hia e faahiti i te mau manaˈo no roto mai i te mau Papai, tera râ, e tia ia haamanaˈo e na Iesu iho i parau i roto i te Mataio 6:7, 8 e: ‘Ia pure outou, eiaha e na nia iho noa i te parau.’ [T.a.a.] — Te feia nenei.

Aho pau Mauruuru roa no ta outou tumu parau no nia i te aho pau (8 no eperera 1990). 16 matahiti to ˈu e e maˈi aho pau to ˈu mai to ˈu fanauraa mai â. Aita vau i ite e nehenehe te mau hepohepo i te pae no te here e te tahi mau maa e faatupu i te maˈi aho pau. E faaohipa vau i te mau manaˈo o ta outou i faataa mai.

A. D., Paniora

E maˈi aho pau tamau to ˈu, e ua afai-ru-hia vau i te fare maˈi fatata e 12 taime i roto e toru avae. No reira, ua anaanatae roa vau i ta outou tumu parau. Ua faariro hoi au i to ˈu maˈi mai te hoê maˈi e tupu poto noa, eiaha râ mai te hoê maˈi ino mau. I te hoê po, ua mou to ˈu aho e toru taime; mai reira mai, ua opua vau e haapao maitai i te rapaauraa i horoahia mai. E toru matahiti i teie nei aitâ vau i hoˈi atura i te fare maˈi.

S. M., Auteralia

Crack Mea faataa-maitai-hia ta outou mau tumu parau no nia i te crack (8 no tiurai 1990). E tia mau â ia ˈu ia faaite atu i te tahi mea. Ua riro vau ei tîtî no teie raau taero i mutaa ihora, e ua tiamâ mai au i to ˈu haamataraa i te haapii i te Bibilia e te mau Ite no Iehova e i to ˈu amuiraa ˈtu ia ratou. E eiâ na vau e aita atoa vau e aufau na i ta ˈu fare tarahu e te mau tino moni e titauhia no te haapee i to ˈu pereoo, e te tumu, no te hoo mai ïa i te crack. Ua pararai-roa-hia vau e te iri noa i nia i te ivi. Tera râ, maoti te turu e te aratairaa ta te mau Ite no Iehova i horoa mai, ua ora mai au.

C. H., Fenua Marite