Nafea ia haafaufaa i to ˈna taime

‘E mairi oioi noa te taime!’

Mea pinepine teie parau i te faaroohia. Mai te peu e hoê â to outou huru e to te rahiraa o te taata, eita e ore e te faahiti pinepine atoa ra outou i teie parau.

Na mua roa ˈˈe, e tano te mau manaˈo i muri nei no te mau vahine. Teie râ, no te mea e hoê â rahiraa taime to te tane e to te vahine i roto i te hoê hebedoma, e nehenehe ratou paatoa e ite e eaha te tia ia rave no te haafaufaa i te taime.

A faataa i te mau ohipa faufaa roa ˈˈe

I te mea e e rave te mau ohipa atoa i te taime, e tia iho â ïa ia rave i te tahi mau ohipa na mua ˈˈe i te tahi atu pae. Ei hiˈoraa, i te hoê poipoi toetoe roa, e hinaaro paha te hoê metua vahine e faaea noa i roto i to ˈna roi mahanahana maitai. Tera râ, e faahaamanaˈo te hora faaara e ua tae i te taime no te faaineine i te inuraa taofe, no te haapao i ta ˈna tane e haere ra i te ohipa, e no te faaineine i te mau tamarii no te haapiiraa.

No te atuatu maitai i to outou utuafare, e tia ia outou ia faataa e eaha te mau ohipa faufaa roa ˈˈe. Te vai ra te hoê taime no te haere i te fare toa e te hoê taime no te tunu i te maa; te hoê taime no te faanaho i te fare e te hoê taime no te puˈa i te ahu; te hoê taime no te faafaaea rii e te hoê taime no te haapii; te hoê taime no te hiˈopoa i te mau ohipa haapiiraa e te mau ohipa huru rau a te mau tamarii, e te vai atu â.

Te rave ra anei outou i te ohipa? Mai te peu e e, ia apitihia teie mau ohipa hau, mea faufaa roa ˈtu ïa to outou taime. Eita ta outou e nehenehe e haamâuˈa i te taime aore ra e vaiiho noa i te mau ohipa no a muri aˈe. No reira, e rave rahi mau vahine teie e parau nei e mea titauhia te hoê tabula ohipa no te rave i te mau hopoia atoa.

“Mai te peu e aita ta ˈu e tabula ohipa no te mahana tataitahi, o ta Joséphine ïa e faataa ra, e ono tamarii ta ˈna mai te 2 e tae atu i te 15 matahiti, eita roa ˈtu ïa ta ˈu e nehenehe e rave i te mau ohipa o ta ˈu i faataa no te mau mahana atoa.” Hoê â manaˈo to Sandra, e toru tamarii ta ˈna e te rave ra oia i te ohipa i te afa mahana e 25 hora i te hebedoma: “Mai te peu e aita ta ˈu e tabula ohipa, o ta ˈna ïa e parau ra, e inohia paha to ˈu upoo.”

E ohipa atoa to outou huru hiˈoraa i te taime i nia i te mau ohipa faufaa roa ˈˈe o ta outou e faataa ra. O ta Lola ïa e ite ra. E tia ia ˈna ia haapao i ta ˈna tane, tera râ, te faataa atoa ra o ˈna e 90 e tae atu i te 100 hora i te mau avae atoa i roto i te hoê ohipa haapiiraa bibilia. “Mea faufaa roa te taime no ˈu nei. Ia hiˈo vau, e ere i te mea tano ia faatiai i te taata. Ia ite anaˈe te mau taata tâuˈa ore rii i teie tuhaa i te faufaa o ta ˈu e horoa ra no te taime, e haapao maitai ratou.”

A faanaho maitai i ta outou ohipa

No te aha vetahi mau vahine e ru noa ˈi i roto i ta ratou ohipa? No te aha vetahi e amuamu noa ˈi no te mea te erehia ra ratou i te taime? Peneiaˈe paha no te mea aita ratou e faanaho maitai ra i ta ratou ohipa. I mutaa ihora, e titau na te puˈaraa ahu e te auriraa i te ahu e piti mahana ohipa taatoa, e e tia atoa ia haere e hoo haere e e tunu i te maa i te mau mahana atoa. I teie mahana, i roto i te rahiraa o te mau fenua, e nehenehe te mau vahine e rave i te hoê â taime i te ohipa fare, te puˈaraa ahu, te haamaroraa i te ahu e te faaineineraa i te maa, ia faanaho maitai iho â râ ratou i ta ratou ohipa. Maoti te mau matini apî, e nehenehe ta te mau vahine e rave rahi e rave i te ohipa i rapae ma te ore atoa râ e vaiiho i to ratou utuafare i te hiti.

Eaha te nehenehe e parau no nia i te taime e ravehia i rapae au i te fare? Taa ê atu i te mau hora i faataahia no te ohipa, te haamâuˈahia nei te rahiraa o te taime i roto i te mau tereraa i rotopu i te fare e te vahi raveraa ohipa e te mau tiairaa i ǒ te taote, te taote niho aore ra i te tahi atu vahi. E nehenehe anei ta outou e haafaufaa i teie mau taime? Peneiaˈe paha ua ite outou i te hamani i te ahu e te huruhuru mamoe, e nira faanehenehe, e hamani i te tahi atu taoˈa faanehenehe e te taura. No te aha ïa outou e ore ai e faaohipa i to outou aravihi i roto i taua mau taime ra? E rave rahi mau vahine teie e faaohipa nei i teie mau taime no te taio, no te papai i te rata aore ra no te faataa i te tabula o ta ratou mau taoˈa e hoo. Ia parahi outou i mua i te afata teata, a tamata na i te nira aore ra i te rave i te tahi atu ohipa no te mau melo o to outou utuafare. Eita e ore e e oaoa roa ratou i teie mau taoˈa o ta outou iho i hamani maoti hoi i te mau taoˈa e hoohia nei i te fare toa. Hau atu, e haapapuraa atoa te reira e aita outou i haamâuˈa i to outou taime.

Te vai ra te tahi atu tuhaa te tia ia hiˈopoahia. Eiaha atoa e riro roa ei taata etaeta roa e hinaaro ra e faaohipa i te mau minuti tataitahi. E nehenehe hoi e riro ei tîtî no te taime, e inaha, e ore atoa ïa te oaoa. Te vai ra te mau taime e hinaaro ai tatou e faaea no te feruri i nia i te ohipa i ravehia. E mau taime faufaa roa hoi teie.

E tano atoa teie manaˈo no nia i te mau tino moni e haaputuhia: ia vai aifaito noa outou, e tia ˈi. Eaha te faufaa ia haaati outou i te oire no te haapae i te tahi maa moni iti mai te peu e e pau to outou taime e ta outou mori? Oia mau, mai te peu e aita ta outou moni i navai maitai, mea faufaa roa ïa ia haapao maitai. No reira, mea au aˈe paha ia tahoê i te mau hoo-haere-raa i te hoê noa fare toa rarahi: ua ite outou e teihea roa te mau tauihaa, eita ïa to outou taime e pau, e ua ite outou e afea ra e hoo-mama-hia ˈi te mau taoˈa, eita ïa ta outou moni e pau.

A haapao i to outou iho huru

Mea taa ê te mau vahine atoa. Inaha, mea itoito aˈe hoê i te poipoi, area te tahi ra, i te avatea ïa. Mai te peu e mea au aˈe na outou i te poipoi, a rave ïa i te mau ohipa teimaha roa ˈˈe i tera taime. A faaohipa i to outou puai i te taime o te mahana mea maitai roa ˈˈe outou. Mai te peu e te rave ra outou i te ohipa, no te aha outou e ore ai e paraparau atu i ta outou paoti ohipa? Oia mau, mea maitai aˈe no orua piti atoa ra ia faatano outou i ta outou ohipa ia au i to outou huru. Ahiri râ e mea paruparu aˈe outou i te poipoi, a faanaho ia outou no te rave i te mau ohipa faufaa roa ˈˈe i muri iho, i te taime mea itoito aˈe outou.

E vahine no te poipoi o Marie. Ua riro te taime o ta ˈna i faataa no te taviniraa kerisetiano ei taime faufaa roa ˈˈe o te mahana; no reira, ua maiti oia e rave i te ohipa i te avatea. E nehenehe ïa oia e faaohipa i te mau hora mea itoito aˈe oia no te haapii i te Bibilia ia vetahi ê. E nehenehe atoa anei outou e na reira e ta outou tabula ohipa?

A faaau ia outou i te mea mau

Ia manuïa te hoê tabula ohipa, eiaha e tuu rahi roa i te ohipa i roto. Eiaha e tamata i te riro ei metua vahine, ei vahine faaipoipo aore ra ei vahine rave ohipa o te ore e faafaaea; e nehenehe hoi outou e inoino ia ore anaˈe e taeahia ia outou i te mea o ta outou e hinaaro ra, mai te peu iho â râ e e vahine paruparu rii outou. A haapii râ ia haapao i to outou mau otia.

Te parau ra o Danièle, tei roohia i te hoê maˈi e tupu tamau nei, e: “E faanaho vau i to ˈu taime ia au i te mau ohipa a ta ˈu tane. E tiaau oia [i te pae faaroo]. I te mea e te ora nei mâua i roto i te hoê pereoo nohoraa iti, e haamata vau i ta ˈu ohipa ia oti anaˈe ta ˈna. No to ˈu maˈi, eita ta ˈu e nehenehe e rave mai ta ˈu e hinaaro. Tera râ, ia nehenehe anaˈe ta ˈu, e rave na mua vau i ta ˈu taviniraa; e vaiiho ïa vau i ta ˈu ohipa fare no te poipoi aˈe.”

Eiaha e riro ei vahine etaeta roa

E itehia te puai o te feruriraa o te hoê vahine i to ˈna huru i mua i te mau tupuraa teimaha o te oraraa. Mai te peu e e faaea hau noa oia i mua i te fifi maoti hoi i te iria taue noa, mea ohie aˈe ïa no ˈna ia arai i te reira.

Ua itea mai ia Sandra i te ravea: “Ia tupu anaˈe te tahi mau ohipa manaˈo-ore-hia e ia faahepohia vau na te mau vahi atoa, e tamǎrû vau ia ˈu. Mea ê roa paha, tera râ, e tano iho â. Ia papu anaˈe to ˈu feruriraa, e nehenehe ïa ta ˈu e faataa e eaha te mau mea faufaa roa ˈˈe, inaha, eita hoi vau e ite i te reira mai te peu e aita to ˈu hepohepo i mâha. Ia faaoti anaˈe au i te mau mea faufaa roa ˈˈe, e haavitiviti au ia nehenehe au e faaruru i te ohipa ru. Ei hiˈoraa, i te hoê mahana, ua tae mai te feia o ta matou i titau e haere mai e tamaa i tera po, e rave rahi hora na mua roa ˈˈe. Maoti hoi i te haapeapea, ua faaineine au i te maa ma te haapao atoa ia ratou. Ua vai hau noa te mau taata atoa e ua oaoa roa matou paatoa.”

A ani i te tauturu

Te parauhia ra e te feia aravihi roa ˈˈe, o te feia ïa e rave nei i te mau taata aravihi no te tauturu ia ratou. Te ani ra anei outou i te tauturu o vetahi ê i ta outou vahi raveraa ohipa? Ia ite anaˈe te mau hoa ohipa e te fariihia ra ta ratou tauturu, e ineine roa ïa ratou i te tauturu mai. E tano atoa teie manaˈo i roto i te utuafare fetii. Tera râ hoi, no te mea e e titau rahi roa te tahi mau vahine i te ohipa i te pae no te atuaturaa fare aore ra no te maa, inaha, e haaparuparu roa te feia e haere mai e tauturu ia ratou. Ua riro paha teie haerea ei tumu no reira te tahi mau vahine e mau metua vahine e rave rahi ai i te ohipa a faaea noa ˈi to ratou utuafare i te hiti ma te ore e haapao mai.

E o outou? Ia hinaaro anaˈe outou i te tauturu, e faaitoito anei to outou haerea i te taata ia tauturu mai ia outou? Te ani ra anei outou i te tauturu aore ra te faahepo ra outou i te taata? Ia ani atu outou i te tauturu i ta outou mau tamarii aore ra i ta outou tane, e anaanatae aˈe ratou ia parau mǎrû atu outou e “Ee, a tauturu mai na” maoti hoi i te faahepo atu e “A rave”.

Ma te haafaahiahia i ta ˈna tane no to ˈna tautururaa mai ia ˈna, ua faaite te hoê vahine e: “Auê hoi au i te fanaˈo e. Ia rohirohi rii au, e parau mai oia ia ˈu e haere e taoto e na ˈna e tunu i te maa; e tahoê pauroa mai ta ˈu tane e ta mâua mau tamarii no te rave i te ohipa fare. Mea oaoa roa na ˈu teie autahoêraa.”

E huru feruriraa faahiahia roa teie i roto i te utuafare! Teie râ, e tiaraa faufaa roa to te metua vahine i roto i teie tuhaa. E nehenehe ta ˈna e haapii i ta ˈna mau tamarii i te faufaaraa o te taime e e faaite atu ia ratou nafea ia rave i te hoê haerea maitai i mua i te ohipa. E ineine noa te mau tamarii i haapiihia ia au i teie haerea, ia tahoê e e oaoa roa ratou i te tautururaa ˈtu i te utuafare ia naeahia te tapao o ta ratou i haamau.

Mea papu maitai e, noa ˈtu eaha te mea e parauhia aore ra e ravehia, e riro noâ vetahi i te haamâuˈa i to ratou taime. Eita e nehenehe e taui ia ratou; e nehenehe noa e haamaitai ia tatou iho na roto i te opuaraa e rave i te huru feruriraa e tano no nia i te taime, te faanaho-maitai-raa i ta tatou ohipa, te faataaraa ma te au i te mau ohipa faufaa roa ˈˈe e te aniraa i te tauturu ia hinaarohia.

[Hohoˈa i te api 13]

Ia nehenehe outou e haapao maitai i to outou utuafare, e tia ia outou ia faataa e eaha te mau ohipa faufaa roa ˈˈe.