Te fariiraa i te hairiiri o te tamaˈi

I TE MATAHITI 1988, ua faataa mai te Vea a te Taatiraa a te mau taote marite (beretane) i te tamaˈi mai “te ati ino roa ˈˈe o te senekele XX”. Te manaˈohia ra e mai te omuaraa o te senekele, ua haapohe te mau tamaˈi e 90 mirioni taata. I mutaa ihora, e naeahia na te faito o te feia tivila tei pohe i te 50%, i teie nei râ, ua maraa rahi roa ïa teie faito. I te omuaraa o te mau matahiti 70, ua riro te mau tivila e 73% o te feia pohe e e 85% i roto i te mau matahiti 80.

Nafea te mau taata ia faataa i te taparahiraa o teie mau taata hapa ore atoa? Mai ta te mau Marite matamua ïa i faataa i te ohipa faatîtîraa i te taata: oia hoi, ua parau ratou e e ere te feia o ta ratou e faatîtî ra i te taata. Te na ô ra te buka ra Tuatapaparaa no nia i te mau fifi i te pae totiale (beretane) e: “Aita te parau ra ‘Hoê â te mau taata atoa’ i tano no te feia Ereere, inaha, e mau ‘taoˈa’ noa hoi ratou ‘e hoohia mai’, e ere râ i te taata.” Oia atoa, te faaite ra te Vea a te Taatiraa a te mau taote marite e aita te mau nunaa e farii ra e “e tiaraa taata mau â to te feia o ta ratou e taparahi ra, ma te taotia-noa-raa i to ratou tiaraa taata na nia i te hoê noa iˈoa, e parauhia e mea atâata roa no te mana o te nunaa: e ere faahou ïa i te tane, aore ra te metua tane, te taata nanaˈo raau, te taata faaapu rii, e taata noa râ; e ere faahou i te vahine, te potii haere haapiiraa, te tamahine, te potii rohipehe, e vahine e pee i te haapiiraa a Marx râ.”

E tuhaa rahi ta te manaˈo here aiˈa e faaitoitohia na e te mau upoo faatere haapaoraa, i roto i teie taparahiraa taata hairiiri mau, mai ta te taata tuatapapa aamu katolika ra o E. Watkin e faataa ra i te na ôraa e: “Noa ˈtu eaha te parau i haamanahia, i roto i te tupuraa mau, teie te parau ta te mau epikopo katolika i pee noa na i roto i te tau tamaˈi: ‘Eita roa to ˈu fenua e hape.’ (...) Ia tupu noa ˈtu te manaˈo here aiˈa o te tamaˈi, ua riro ratou ei mau vea na Kaisara.”

[Faaiteraa i te fatu o te hohoˈa i te api 31]

U.S. Army