“Aita te hue i parari”

E taui te huru faaiteraa i te oto ia au i te mau peu e te ihotumu o te mau nunaa e te mau opu tataitahi. Te tiaturi nei te mau Yorubas no Nigeria e e ora faahou mai te varua o te taata pohe i roto i te tahi atu taata. No reira, ia pohe anaˈe te hoê tamarii, noa ˈtu e e oto rahi te faaitehia i roto i te hoê area taime poto, eita teie moeraa e faarirohia ei ati rahi roa; no te mea, mai ta te hoê himene yoruba e parau ra, “ua manii te pape, aita râ te hue i parari”. Oia hoi te auraa, e nehenehe te hue, oia hoi te metua vahine, e fanau faahou i te tamarii. Hau atu â, ia au noâ i teie mau tiaturiraa, e fa faahou mai te tamarii i pohe i roto i te hoê tino apî; no reira, ia oto maoro te taata, e nehenehe te reira e faataere i te taime e fanau ai te metua vahine i te hoê tamarii apî, e rave mai hoi ta ˈna tamaiti i pohe aore ra te tahi atu taata i te tino o teie aiû apî. No reira, e hope oioi noa ïa te otoraa.

Ia pohe anaˈe te hoê maehaa, e tuu vetahi mau metua vahine yorubas i te hoê tii iti i nia ia ratou e faahaamanaˈo ra i te aiû i pohe. I te taime tamaaraa, e taipuhia te hoê mereiti maa na te tamarii i pohe. Ia hoo-anaˈe-hia te ahu na te maehaa e ora noa ra, e hoo-atoa-hia te tahi na te tamarii i pohe. Te haapao-maite-hia nei teie peu, no te mea te tiaturihia ra e, ia ore anaˈe te reira e haapaohia, e nehenehe te maehaa e ora noa ra e pohe atoa. Oia mau, aita te feia tei noaa ia ratou i te ite mau no nia i te Bibilia e tiaturi ra i teie mau haapiiraa a te nunaa e aita atoa ratou e pee ra i teie mau peu.