To te haapaoraa huru a muri aˈe ia au i to ˈna huru tahito ra
15 o te tuhaa: 1095-1453—Te faaohiparaa i te ˈoˈe
“E tatamaˈi te mau taata no te faaroo, e papai ratou i te buka no nia i te faaroo, e aro ratou no te faaroo, e pohe ratou no te faaroo, e rave ratou i te mau mea atoa no te faaroo, maoti i te ora no ˈna.”—Charles Caleb Colton, ekalesiatiko beretane no te XIXraa o te senekele.
I te omuaraa o te kerisetianoraa, ua itehia te tau oaoa i reira te mau kerisetiano i te faaohipa-maite-raa i ta ratou haapaoraa. No te paruru i to ratou faaroo, ua faaohipa na ratou ma te itoito i “te ˈoˈe a te [v]arua ra o te parau a te Atua”. (Ephesia 6:17.) Tera râ, i muri roa mai, mai ta te mau tupuraa i itehia mai te mau matahiti 1095 e tae roa i te matahiti 1453, aita te feia faahua kerisetiano i ora no te kerisetianoraa mau, ua faaohipa râ ratou i te tahi atu â mau ˈoˈe.
I te VIraa o te senekele, ua monohia mai te Hau emepera no Roma tooa o te râ e te tahi Hau no te pae hitia o te râ hoê â raua oia hoi, te Hau emepera byzantin, o Kotatinopoli te oire pu. Ua oioi noa ra ta ratou mau Ekalesia iho, mea paruparu roa hoi to ratou mau taairaa, i te haamǎtaˈuhia e te hoê â enemi o tei ite i te hoê parareraa oioi: te ao arabia.
Ua haamata te Ekalesia no te pae hitia o te râ i te taa i taua haamǎtaˈuraa i te VIIraa o te senekele, a haru ai te mau mahometa i te fenua Aiphiti e te tahi atu mau tuhaa no Afirika Apatoerau o te Hau emepera byzantin te fatu.
Aita i taeahia i te hoê senekele i muri iho, ua riaria aˈera te Ekalesia no te pae hitia o te râ i te iteraa te mau mahometa i haere tia na roto i te fenua Paniora e te tomoraa i te fenua Farani, e te tapearaa i te tahi tau hanere kilometera ia Paris. Ua pee aˈera e rave rahi katolika i te haapaoraa mahometa, area vetahi ra, ua pee ïa ratou i te mau tutuu e te mau peu o taua haapaoraa ra. “No to ˈna riri rahi i taua mau ereraa, te taiohia ra i roto i te buka ra Te haamataraa te haapaoraa mahometa (beretane), ua ohipa aˈera te Ekalesia ma te tuutuu ore ia faarahi i ǒ ta ˈna mau tamaiti paniora i te auahi o te tahoo.”
Tau senekele i muri iho, i muri aˈe to ratou haru-faahou-raa mai i te rahiraa o to ratou fenua, “ua hamani ino aˈera [te mau katolika no te fenua Paniora] i te mau mahometa no te fenua iho, e ua taparahi-ino-roa-hia ia ratou. Ua turaihia aˈera ratou ia faarue i to ratou faaroo, ua tiavaruhia aˈera ratou mai roto mai i te fenua Paniora e rave atura ratou i te tahi mau ohipa fifi mau no te haamou roa te terera o te peu mahometa no Paniora”.
Faaohipahia i te ˈoˈe
I te matahiti 1095, ua pii atura te pâpa Urbain II i te mau katolika no Europa ia rave i te ˈoˈe mau. E tia ia tatarahia te haapaoraa mahometa i te Fenua Moˈa no te Moyen-Orient, ta te amuiraa faaroo kerisetiano e ani faahou ra i te taatoaraa o ta ratou iho mau tiaraa.
E ere i te mea apî te manaˈoraa i te hoê tamaˈi “tia”. No reira, ua faahitihia taua manaˈo ra no te aro atu i te mau mahometa i te fenua Paniora e i Sicile. Hau atu, ia au i te parau a Karlfried Froehlich, no te fare haapiiraa porotetani e haapii ra no nia i te Atua no Princeton, ua iti i te ahuru matahiti hou te piiraa a Urbain, “ua manaˈo aˈena [te pâpa Grégoire VII] i te hoê militia Christi no te aro i te taatoaraa o te mau enemi a te Atua e ua feruri aˈena oia e afai i te hoê puai nuu i te pae Hitia o te râ”.
Ua riro te ohipa a Urbain ei pahono rii noa i te piiraa i te tauturu horoahia e te emepera byzantin o Alexis. I te mea e te afaro rii noa ra te taairaa i rotopu i na amaa e piti o te amuiraa faaroo kerisetiano, te mau Ekalesia no te pae Hitia o te râ e no te pae Tooa o te râ, peneiaˈe ua ite oia i te ravea no te tahoê faahou na tuahine e piti tei au ore na ia raua. Noa ˈtu â râ, ua haaputuputuhia aˈera te apooraa no Clermont, o tei faaite e te feia e hinaaro ra e faaô ia ratou i roto i taua ohipa “moˈa” ra, e horoahia ïa ia ratou i te faaoreraa i te utua no te mau hara. Ua farii-maitai-hia mai tei ore i matauhia. I te pae Hitia o te râ mai te pae Tooa o te râ, ua riro ïa te tuôraa e “Deus volt” (Te hinaaro ra te Atua) ei tuô no te tahoê.
Ua haamata aˈera i te faarevahia i te nuu, o tei maoro mai e ma te faataime i roto i te roaraa e piti senekele (hiˈo te tuhaa i te api 24). I te haamataraa, ua manaˈo aˈera te mau mahometa e o te mau Byzantins te feia tei tomo mai. Teie nei râ, i muri aˈe to ratou papu-maitai-raa e no hea mai ratou, ua piihia ihora ratou te mau “Francs”, nunaa helemani e no ô mai hoi te iˈoa ra Farani. No to ratou hinaaro e faatia i te parau ta taua feia “ěê” no Europa, te putapû mǎrû te manaˈo o te mau mahometa no te hoê “jihad”, aore ra tamaˈi moˈa.
Te faataa ra te orometua beretane o Desmond Stewart e: “No te feia maimi atoa aore ra feia hoo o tei ueue na i te mau huero no te oraraa a te haapaoraa mahometa na roto i te haapiiraa e te hiˈoraa, te vai ra ïa te hoê faehau ta te haapaoraa mahometa e tuô na no te haere e aro.” I te piti o te tuhaa o te afaraa o te senekele XII, ua faatupu te taata faatere ra o Nūr-al-Dīn i te hoê nuu aravihi ma te tahoê i te mau musulmans no te pae apatoerau no Suria e te feia no te pae apatoerau no Mesopotamia. No reira, “ia au i te mau kerisetiano no te tau i rotopu i te toparaa o te Hau Roma (476) e te haruraa o Kotatinopoli (1453) tei faaohipa i te mauhaa tamaˈi no te haaparare i te haapaoraa a te Mesia, ta Stewart ïa e parau faahou ra, oia atoa te mau mahometa i faaohipa i te mauhaa tamaˈi no te haaparare i te haapaoraa a te Peropheta”.
Oia mau, e ere noa te haaparareraa i te haapaoraa o te aratai noa ra ia ratou. Te faahiˈopoa nei te buka ra Te fanauraahia mai o Europa e, no te rahiraa o te feia no Europa, “te pûpû mai nei [te mau tamaˈi faaroo i te ravea ia noaa mai te hanahana aore ra te haapueraa i te mau taoˈa rahi moni mau, tae noa ˈtu i te roaa mai i te tahi mau hau apî, ia faatere atu i te mau tuhaa fenua atoa. Te manaˈonaˈo noa ra vetahi e e ape i te ohipa matauhia i te mau mahana atoa no te ite i te mau tupuraa hanahana mau”. Ua ite atoa te feia hoo taoˈa no Italia i te ravea no te haamau i te mau tapi hooraa i roto i te mau fenua no Mediteranea i te pae hitia o te râ ma. Teie nei râ, noa ˈtu e eaha ta ˈna mau opuaraa, mai te huru ra ïa e ua ineine vetahi ia pohe no ta ˈna haapaoraa — te mau melo o te amuiraa faaroo kerisetiano i roto i te hoê tamaˈi “tia”, te mau mahometa i roto i te hoê “jihad”.
Mau faahopearaa manaˈo-ore-hia i te faaohiparaa i te ˈoˈe
Te taiohia ra teie mau parau i roto i te Buka parau paari no nia i te haapaoraa (beretane) e: “Noa ˈtu e ua faaohipahia te mau tamaˈi faaroo no te aro atu i te mau mahometa i te pae Hitia o te râ, ua faaohipa-atoa-hia te itoito o te feia i faaô ia ratou i roto i te aroraa no te patoi i te mau ati Iuda o tei ora i roto i te mau fenua i reira te feia o tei faaô ia ratou i roto i te aroraa i tihepuhia mai, oia hoi i Europa ma. Ua riro te tahooraa i te pohe o Iesu ei hororaa faahiti-pinepine-hia e te feia tei faaô ia ratou i roto i te aroraa, e riro atura ïa te mau ati Iuda i te aro-matamua-hia e ratou. I te matahiti 1096, ua haamata ˈtura te hoê hamani-ino-raa i nia ia ratou i Rouen, tei apeehia e te mau taparahiraa taata i Worms, i Mayence e i Cologne.” Ei haamataraa noa ïa te reira i te mataˈi no te hamani-ino-raa i te mau ati Iuda o tei pupuhi i muri iho i nia i te Helemani nazie i te mau mahana o te Holocauste.
Ua faarahi atoa te mau tamaˈi faaroo i te mau au-ore-raa i rotopu i te pae Hitia o te râ e te pae Tooa o te râ, e ua rahi noa ˈtura taua mau au-ore-raa mai te matahiti 1054 i to te patereareha ra o Michel Cérulaire e te karadino ra o Humbert tiavaruraa te tahi e te tahi, no roto raua i te mau Ekalesia no te pae Hitia o te râ e te pae Tooa o te râ. A taui ai te feia o tei faaô ia ratou i roto i te mau aroraa, i roto i te mau oire o ta ratou i haru mai, te upoo faatere heleni na roto i te mau epikopo latino, ua haamata ˈtura te tuea-ore-raa manaˈo no te pae Hitia o te râ i te ô atoa i roto i te nunaa.
Ua haamata aˈera te faataa-ê-raa i rotopu i na Ekalesia e piti i roto i te roaraa o te maharaa o te aroraa i te taime, ia au ia Herbert Waddams, perepitero tauturu epikopo no Cantorbéry, i tataipiti te huru raveraa a te pâpa Innocent III: I te hoê pae, ua inoino roa ˈˈe oia no te eiâraahiaa o Kotatinopoli (hiˈo te tuhaa i te api 24), ua papai oia e: “Nafea e nehenehe ai e tiaturihia e ia hoˈi mai te Ekalesia heleni i te faaohiparaa i te pae faaroo i te pu a te mau aposetolo i te mea e ua ite oia i te mau Latino o tei vaiiho i te hoê hiˈoraa ino e tei faatupu i te hinaaro a te Diabolo? No reira hoi, i teie nei iho â, ua rahi aˈe to te Heleni riri no te mau Latino i te mau urî.” I te tahi aˈe pae, ua oioi noa o ˈna i te haafaufaa i taua huru tupuraa ra, ma te patu ia Kotatinopoli, te hoê Hau emepera latino arataihia e te hoê patereareha no te pae Tooa o te râ.
I muri aˈe e piti senekele aroraa e aita e faaearaa, ua paruparu roa ˈˈera te Hau emepera byzantin, aita ˈtura ratou i nehenehe e patoi atu i te mau aroraa a te feia no Turetia ottomans, o tei haru aˈera i te pae hopea, i te 29 no me 1453, ia Kotatinopoli. Ua roohia te hau emepera i te hoê tairiraa o tei pohe, na roto i te ˈoˈe o te mau mahometa e i ta to ˈna iho tuahine, te Ekalesia no Roma. I te tahi aˈe pae, ua faaitoito te mau amahamaharaa i roto i te amuiraa faaroo kerisetiano i te haaparareraa i te haapaoraa mahometa i Europa ma.
Te mau ˈoˈe o te politita e o te hamani-ino-raa
Na te mau aroraa i haapaari i te tiaraa o te pâpa ei upoo faatere haapaoraa e politita. Ia au i te parau a te taata papai aamu ra o John Mundy, ua “horoa te reira i te pâpa te mana i nia i te politita no Europa ma”. Mea maoro “to te Ekalesia i riro mai ei faatereraa hau aˈe i te puai no Europa (...), [o tei nehenehe] e faaohipa i te hoê mana politita rahi aˈe i te mau faatereraa atoa no te pae tooa o te râ”.
Ua faatiahia aˈera taua tapaeraa i nia i te parahiraa e te toparaa o te Hau emepera no Roma no te pae Tooa o te râ. O te Ekalesia anaˈe te puai no te tahoê i te pae Tooa o te râ, e ua haamata aˈera râ oia i te faaohipa i roto i te totaiete i te hoê mana politita hau aˈe i te itoito i te Ekalesia no te pae Hitia o te râ, i taua tau ra, o tei raro aˈe noa i te faatereraa o te hoê upoo faatere puai mau no rapae mai i te haapaoraa, te emepera byzantin. Na te faufaa politita a te Ekalesia no te pae Tooa o te râ i haafaufaa i te tooma e tei te parahiraa matamua te pâpa, tooma ta te Ekalesia no te pae Hitia o te râ e patoi ra. Ma te farii noa e e tia ia faahanahanahia te pâpa, aita râ te reira i farii e tei ia ˈna ra te mana taatoa i te pae o te mau haapiiraa aore ra i te pae o te ture.
Ua turai te mana politita e te mau tiaturiraa i te pae faaroo hape a te Ekalesia katolika no Roma ia rave i te ˈoˈe no te tapea i te patoiraa. Ua riro atura ïa ei hopoia na ˈna i te paimiraa i te hairesi, oia hoi te feia tei ore i farii i te haapiiraa katolika. Te faataa ra o Miroslav Hroch e o Anna Skýbová, orometua no nia i te tuatapaparaa i te Fare haapiiraa tuatoru Karls, i Prague (Tchécoslovaquie), e mea nafea te Tiribuna rahi katolika, te tiribuna rahi a te mau ekalesiatiko no te haava i te hairesi i faaohipahia: “I te taa-ê-raa i tei matauhia, aita i faaitehia (...) te mau iˈoa o te feia e tihotiho parau ra. I te matahiti 1252 ra, ua faatia te pâpa Innocent IV te haamauiuiraa i roto i te haapueraa ture “Ad extirpanda”. “Te ravea i faaohipa-pinepine-hia, o te haapoheraa ïa na roto i te taninaraa i te auahi i te omuaraa iho â o te XIIIraa o te senekele no te haapohe i te hairesi. E tumu iho â to teie ravea (...) i faaohipahia; te parau nei oia e e aita e utua faatahe toto i nia i te Ekalesia.”
Ua haapohe aˈera te mau haava o te tiribuna rahi a te katolika, te tahi tau ahuru tausani taata. Tau tausani tei taninahia i te auahi, ua turai te reira i te taata papai aamu ra o Will Durant ia parau e: “Na roto i te aanoraa o te feruriraa tei faahepohia i te hoê taata papai buka e tei faatiahia i te hoê kerisetiano, e tia râ ia tatou ia faanaho te Tiribuna rahi a te katolika (...) i rotopu i te mau viivii ino roa ˈˈe o tei tapao i te aamu taata e o tei faaite i te hoê ino hohonu tei ore e itehia i ǒ te mau animala.”
Aita ïa e vairaa to te mau tupuraa o te Tiribuna rahi a te katolika mai te peu e aita e haamanaˈohia teie mau parau a Blaise Pascal, taata philosopho e aivanaa farani no te XVIIraa o te senekele: “Aita i itehia aˈenei e ia ravehia te ino ma te taatoa e ma te oaoa mai te peu e e ravehia te reira ma te taa maitai.” I te parau mau, mai te taparahiraahia o Abela e Kaina, ua vai noa mai te faaohiparaa i te ˈoˈe no te hamani-ino-raa no te aro atu i te feia no roto i te haapaoraa ěê ei haerea tei tano maitai i te haapaoraa hape. — Genese 4:8.
Roohia e te ˈoˈe o te amahamaharaa
I muri aˈe i te amahamaharaa i te pae o te nunaa e te mau faaohiparaa politita, ua tauihia aˈera te nohoraa o te pâpa i te matahiti 1309, mai Roma i Avignon. Ua haamau-faahou-hia ˈtura oia i Roma i te matahiti 1377, e ua faatupu iti noa ˈtura te maitiraa i te pâpa apî o Urbain VI i te tahi mau aroraa. Ua maiti atoa taua noa iho pûpû karadino o tei maiti ia ˈna i te hoê pâpa ěê, Clément VII, o tei faaea i Avignon. Ua riro roa ˈˈe te huru tupuraa i te pouri roa ˈtu â i te omuaraa o te XVraa o te senekele, i reira, i te hoê taime poto noa, ua faatere aˈera e toru pâpa i te hoê â taime.
Ua faaore atura te apooraa no Constance i taua ohipa ra, piihia faataa-ê-raa manaˈo rahi aore ra faataa-ê-raa manaˈo no te pae Tooa o te râ. Ua faahiti aˈera oia i te haapiiraa a te apooraa, o tei parau e na te apooraa rahi e amo i te mana ekalesiatiko rahi, e ere râ na te pâpa. No reira, i te matahiti 1417, ua nehenehe atura taua iho apooraa e maiti ia Martin V ei pâpa. Ua paruparu ino roa râ te Ekalesia, o tei tahoê-faahou-hia. Teie râ, noa ˈtu to ˈna mau pepe, ua patoi te pâpa ia farii i te hinaaro o te hoê noa ˈˈe tauiraa. Ia au i te parau a John Boojamra, no te fare haapiiraa epikopo orthodoxe no nia i te haapiiraa i te Atua no Saint-Vladimir, “e haamatara mai [taua patoiraa ra] i te eˈa o te Faatitiaifaroraa o te XVIraa o te senekele”.
Ua ora anei ratou i ta ratou haapaoraa?
Ua faaue te Taata i haamau i te kerisetianoraa i ta ˈna mau pǐpǐ ia faariro i te taata ei pǐpǐ, aita râ oia i parau e na roto i te puai. Inaha, ua horoa oia i teie faaararaa ma te feaa ore e: “O te rave hoi i te ˈoˈe ra, e pohe ïa i te ˈoˈe.” Aita atoa oia i faaue e ia haamauiuihia i te tino o te mau taata e ore e farii maitai ra. E tia râ ia ratou ia pee i teie faaueraa tumu kerisetiano: “E ore hoi te tavini o te Fatu nei e tia ia mârô; ia mǎrû râ oia i te taata atoa nei, e te au hoi ia haapii ia vetahi ê, e te faaoromai maite i te ino, ma te haapii mârǔ maite i te feia i mârô maira.” — Mataio 26:52; Timoteo 2, 2:24, 25.
Ma te faaohipa i te ˈoˈe mau aore ra, te ˈoˈe taipe, o te politita e o te hamani-ino-raa ra, ua faaite tahaa te amuiraa faaroo kerisetiano e aita oia e faatura ra i te aratairaa a te Taata ta ratou e parau ra e na ˈna i haamau i te reira. No te mea e ua î roa hoi te amahamaharaa i roto, fatata roa oia i te topa roa. Ua riro te haapaoraa katolika no Roma ei “haapaoraa o te hinaaro i te hoê faatitiaifaroraa”. Teie nei râ, e tae mai anei te Faatitiaifaroraa? Mai te peu e, e, mea nafea ra, e na vai? E ite ïa outou hau atu â ia taio outou i te tuhaa i muri noa mai.
[Tumu parau tarenihia/Hohoˈa i te api 19]
Te tamaˈi nehenehe mau a te kerisetiano?
Ua riro anei te mau tamaˈi faaroo ei tamaˈi nehenehe mau tei faauehia i te mau kerisetiano ia rave? — Korinetia 2, 10:3, 4; Timoteo 1, 1:18.
Ua tapae te tamaˈi faaroo matamua (1096-1099) i te patu-faahou-raa ia Ierusalema e i te haamau-faahou-raa i na Hau latino e maha no te pae Hitia o te râ: te basileia latino no Ierusalema, te faatereraa matamua no Anetiohia, te tuhaa fenua no Edesse e no Tripoli. Ma te faahiti i te hoê taata mana no taua ohipa ra, ua parau te taata papai aamu ra o H. G. Wells no nia i te haruraahia o Ierusalema e: “Ua riro ei taparahiraa taata ino mau; ua tahe te toto o te feia tei taparahihia mai te hoê taheraa pape i roto i te mau aroa, e tae roa i te taime i pee haere i nia i te mau faehau. A topa ˈi te rui, ua haere aˈera te mau Taata aro, ‘e ua faataˈi hoi te rahi o te oaoa ia ratou’, rohirohi roa ˈˈera no te ohipa faatahe toto, i mua i te Sépulcre Moˈa, e tapiri aˈera to ratou rima e topatapata noa ra i te toto no te faahiti i te hoê pure.”
Te pitiraa o te tamaˈi faaroo (1147-1149), na te haruraa o te tuhaa fenua no Edesse e te mau mahometa no Suria i faahamata i te reira i te matahiti 1144; ua hope oia a patoi ai te mau mahometa i te “feia taiva” o te amuiraa faaroo kerisetiano.
Te toruraa o te tamaˈi faaroo (1189-1192), ua haamatahia ïa i muri aˈe i to Ierusalema haruraahia e te mau mahometa. E o te arii no Beretane o Richard Ier “Cœur de Lion” te hoê o te mau upoo faatere. Ia au i te Buka parau paari no nia i te haapaoraa (beretane), “ua hope [oioi] roa ˈtu [taua aroraa ra] no te rohirohi o te feia aro, te mau faataa-ê-raa e te ereraahia i te autahoêraa”.
Aita te maharaa o te tamaˈi faaroo (1202-1204) i tapae i to ˈna tapao, no te mea aita te moni i navai e ua ape atura te feia aro ia Aiphiti no te haere atu i Kotatinopoli. Ua tǎpǔhia e e roaa ia ratou te hoê tauturu i te pae materia mai te peu e e turu ratou ia Alexis i te haruraa i te faatereraa, te hoê Byzantin tei hopoi tîtîhia o tei hinaaro ra i te mana arii. “Aita roa ˈtu i moehia i te haapaoraa orthodoxe no te pae hitia o te râ e aita atoa oia i faaore i te hara no te eiâraahia o Kotatinopoli e te feia aro” o te faahopearaa ïa te reira, ta te Buka parau paari no nia i te haapaoraa e faataa ra. E te parau faahou ra e: “Mai te peu e e tia ia haamanaˈo i te hoê noa ˈˈe taio mahana e tupu ai i te faataa-ê-raa, te taio mahana tano roa ˈˈe — no nia i te pae o te manaˈo hohonu o te hoê taata — o te matahiti 1204 ïa.”
Ua faatupu te tamaˈi faaroo a te mau tamarii (1212) i te pohe o te tahi tausani tamarii helemani e farani. Ua pohe aˈera ratou hou ratou i tapae ai i te vahi ta ratou i opua.
Te paeraa o te tamaˈi faaroo (1217-1221), te tupuraa hopea i raro aˈe i te parururaa a te pâpa, eita te reira i manuïa no te hoê nahonaho-ore-raa e te faaôraa te upoo faatere haapaoraa ia ratou i roto.
Te onoraa o te tamaˈi faaroo (1228-1229) ua arataihia te reira e te emepera o Frédéric II no Hohenstaufen, o tei tiavaru-noa-hia ˈtura e te pâpa Grégoire IX.
Te hituraa e te vauraa o te tamaˈi faaroo (1248-1254; 1270-1272), ua arataihia te reira e te emepera Louis IX [Saint Louis], arii no Farani, ua hope râ te reira a pohe ai oia i Afirika Apatoa.
[Hohoˈa i te api 18]
Te hoê haamanaˈoraa o te tamaˈi faaroo matamua: te menema ati iuda no Worms (R.F.A.).