O vai ma te Feia ino mau?
TE HAAPII maira te Bibilia e e huru taa maitai te haavare no Satani. Ia Iesu i haere mai i nia i te fenua nei, ua faaino te mau melo o te mau upoo faatere haapaoraa ati iuda ia ˈna. I teie mahana, aita roa ˈtu ïa i taui. — Ioane 8:44.
Eita te mau enemi o te mau Ite o Iehova e haamarirau i te faaohipa i te haavare e te faaino no te haafifi i te ohipa pororaa ta ratou e rave nei. I roto i te mau fenua socialistes, e faarirohia te mau Ite o Iehova mai te mau mutoi no te C.I.A. O te pariraa ïa aita roa ˈtu e tumu papu ta te hoê katolika i taora mai i te hoê taata e papai i te A ara mai na! e parahi noa ra i pihai iho ia ˈna i roto i te manureva i roto i te hoê tere mai Lonedona e tae atu i New York. Inaha hoi, te mau taata atoa i ite maitai, ua papu ia ratou e eita te mau Ite e faaô ia ratou i roto i te ohipa politita. — Ioane 17:16; 18:36.
I roto i te mau fenua katolika, e faaohipahia te tahi atu â mau haavare. No reira, e parauhia na e e mau mutoi communistes te mau Ite. Aita i maoro aˈenei, i Caracas (Venezuela), ua parihia vetahi o ratou i te hoê pariraa tano ore mau. Ua nehenehe hoi e taiohia i roto i te vea Ultimas Notícias e ua haruhia te hoê vahine Ite e ua taparahi-pohe-roa-hia hoi e e toru na Ite i roto i te hoê oroa peu satani. Ua tuu te hoê peresibutero i te hinu i nia i te auahi e ua na ô atura i to ˈna mau melo e: ‘Tera te huru o te mau Ite o Iehova.’ Eaha mau na hoi te parau mau?
Ua pohe taua vahine nei i te maˈi tapahi i roto i te roro, e ua manaˈo noa ˈtura te mau taata manaˈo ino e ua haruhia teie vahine. I muri aˈe, ua nenei taua iho â vea nei i te hoê uiuiraa manaˈo e apeehia mai e te hoê parau no te haapapuraa i te parau mau.
Eaha te ohipa i roohia i nia i teie peresibutero i faaohipa i taua haavare ra? I te mahana iho i haapapuhia ˈi te parau mau, ua uiuihia oia na roto i te afata teata. No nia i te aha? Ua itehia o ˈna e tamata ra i te faahaere i te fenua Paniora e 21 kilo cocaïne (raau taero). E ere a tahi ra o ˈna e rave ai i teie ohipa. Ua faaite o ˈna e i te taime matamua ua rave o ˈna i te ohipa faahaere raau taero i te matahiti 1984 ra, ma te tauturuhia e te hoê peresibutero tahito, e taata hoo raau taero atoa hoi. Ia au i te vea ra Auténtico, te mǎtaˈu ra te mau mutoi e ia tuuhia te peresibutero e ia nehenehe o ˈna e faarue mai i te fenua mai to ˈna hoa. “Ua faatiahia [o ˈna] e haere ê e haere roa ˈtu ai i Miami [Etats-Unis], i reira to ˈna hooraa mai i te hoê fare e te moni i noaa mai e te raau taero.”
Eaha ïa te manaˈo o te arii epikopo no Caracas, o te karadino Lebrún, i te huru o taua peresibutero peu iino ra? “E hopoia na ˈu i te faaiteraa e e ere te metua o José Luis Gil i te hoê taata ohipa ino”, ta ˈna ïa i parau. E ere râ hoi te reira te manaˈo o te ture, tei faautua i te peresibutero i te maororaa e 20 matahiti i te fare auri. Te haapapu atoa maira te Bibilia iho eaha mau na te hoê taata ohipa ino: “Aore anei outou i ite e, e ore te basileia o te Atua e noaa mai i te feia parau-tia ore? Eiaha e vare: E ore hoi te poreneia, (...) e te eiâ, e te piri taoˈa, (...) e te haru, e ore anaˈe ïa e parahi i te basileia o te Atua.” “Eiaha roa râ te hoê no outou ia pohe, mai te mea e taparahi taata outou, e te eiâ, e te faaino.” — Korinetia 1, 6:9, 10; Petero 1, 4:15 (V.C.J.S.).
Mai ta te mau ohipa ino i ravehia aita i maoro aˈenei e te mau peresibutero i nia i te mau tamarii i te mau Etats-Unis, ia rave te hoê peresibutero i te hoê ohipa ino, e pinepine o ˈna i te tonohia ˈtu i roto i te tahi atu paroita. Inaha, ia au i te Bibilia, e tiavaruhia te mau taata peu iino e ore e hinaaro e tatarahapa e e taui te haerea. I reira noa te amuiraa kerisetiano e nehenehe ai e vai mâ mai, ia tiavaruhia te mau taata ohipa iino e ore e tatarahapa. — Korinetia 1, 5:11, 12.