Ua moehia i te mau ekalesia i ta ratou “hopoia matamua”

UA PARAU o Iesu e te hopoia matamua a te mau kerisetiano o te pororaa ïa i te “evanelia o te basileia nei”. (Mataio 24:14.) Maoti hoi i te na reira, e pinepine te mau Ekalesia o te ao nei i te faaitoito i ta ratou mau taata ia tahoê atu i te tahi mau pǔpǔ politita. Na roto i te mau aˈoraa i roto i te mau fare pure aore ra i te mau ravea haapurororaa parau apî, e tae noa ˈtu hoi i te mau rata a te mau orometua, te faaitoito nei te mau upoo faatere haapaoraa i te mau taata ia turu i te mau tamaˈi e i te mau pǔpǔ orure hau. Te tuu nei ratou i te tapao i nia i te apiti-atoa-raa ˈtu i roto i te mau patoiraa e te mau faahuehueraa no te turu i tera aore ra tera ohipa politita.

Ua faaô rahi roa te mau Ekalesia ia ratou i roto i te ohipa politita, e no reira ˈtura te vea néerlandais ra Kerk en Theologie (Ekalesia e haapiiraa no nia i te Atua) i faˈi ai e ua tuu ratou i ta ratou hopoia matamua i nia i te piti o te parahiraa. Teie hoi ta ˈna i faataa i roto i ta ˈna parau haapotoraa no nia i te buka ra Alles is politiek, maar politiek is niet alles (E politita anaˈe te mau mea atoa, e ere râ te politita i te mea faufaa roa ˈˈe): “E tia i te Ekalesia (...) ia mâmû roa i te pae no te faahitiraa i te mau parau politita. (...) Ta ˈna hopoia matamua o te faaiteraa ïa i te Evanelia i te taata.”