Ua paiuma vau i nia i te mato rahi roa ˈˈe o te ao nei

Na to matou taata papai vea i te fenua Auteralia

UA HAU ê to ˈna huru mau i te mea o ta ˈu i taio aore ra i ite no nia ia ˈna, e inaha, te tia noa ra oia ma te faahiahia mau, i roto i te maramarama o te toparaa mahana. Ua tiai noa na hoi matou i taua taime poto roa ra. Ma te maere rahi, mataitai noa ˈtura matou i teie mato rahi i te tauiraa i te peni, te tarona maramarama i te omuaraa e te vareau puai roa i muri iho, e i te pae hopea, te uteute pao roa. Te tiai noa ra vau i taua peni nei. Pata ˈtura vau i ta ˈu hohoˈa hopea.

Ua pata atoa tau hanere mau taata na pihai iho ia ˈu nei i te hohoˈa. Ua faahiahia roa te mau ratere no te mau vahi atoa o te ao nei i to ratou tiai-noa-raa e ua pata ratou i te hohoˈa o te hoê mea otahi roa. O te Ayers Rock ïa, te mato rahi roa ˈˈe o te ao nei, e vai ra i ropu i te fenua Auteralia. Inaha, a tahi ra ïa to ˈu mata a ite ai i taua ohipa faahiahia mau ra a te Atua.

No te aha hoi e ohipa faahiahia roa?

I roto i ta ˈna buka Auteralia nehenehe mau ra ma to ˈna mau peni huru rau (beretane), te faataa ra o John Ross ia Ayers Rock mai “te mea i riro ei mataitairaa na te mau ratere, te mea nehenehe roa ˈˈe o taua fenua ra, te hoê puai faaora i roto i te hoê fenua tahito e te mârô atoa hoi”.

Parau mau, mea faahiahia roa o Ayers Rock no to ˈna rahi, teie râ, na to ˈna mau peni tauiui noa e haamaere roa i te feia mataitai. E 348 metera te teitei o taua mato rahi ra e 3,6 kilometera te roa e e 2 kilometera te aano, e te tia noa ra oia i ropu i te medebara. Taa ê atu i te mau peni huru rau e itehia ia au i te vairaa o te mahana, e faahiahia roa outou ia ite atu outou i te maramarama anaana i te toparaa i nia i te mato i muri aˈe i te ûa.

E 470 kilometera te atearaa o Ayers Rock ia Alice Springs, i te pae apatoa-tooa o te râ o teie oire pu no te ropuraa o te fenua Auteralia. No roto mai to ˈna iˈoa i to Henry Ayers, te hoê taata tuiroo no te fenua Auteralia apatoa, teie râ, mai te mau senekele mai â to te mau aborigènes (nunaa tumu no Auteralia) piiraa ia ˈna e Uluru, te hoê parau aita i papu-maitai-hia te auraa i teie nei mahana.

Te ru nei matou i te paiuma i nia i te mato

E tupu mai i roto i te feia atoa o te ite ia Ayers Rock no te taime matamua, i te hinaaro puai mau e haere roa ˈtu e hiˈo i taua ohipa maere mau ra. E tapiri atu vetahi pae i te mato na nia i te manureva, area vetahi ra, e haaati ïa ratou ia ˈna na nia i te pereoo — oia hoi te hoê atearaa fatata e 9 kilometera. O vau râ, te opua nei au e paiuma roa ˈtu i nia i te mato. Te hinaaro atoa ra anei outou e apee mai ia ˈu?

E nehenehe te mato ta matou e paiuma ˈtu, e faaauhia i te tua menemene o te hoê animala rahi e taoto noa ra. Ua haamata matou i te paiuma ia au i teie faaauraa oia hoi, e piti tuhaa o te tino o te animala mai te aero atu. A hiˈo na i teie fǐfǐ i tamauhia i nia i te mau auri i patiahia i roto i te pǎpǎ e ta te taata e nehenehe e tapea ia paiuma ratou. Mea faufaa roa teie fǐfǐ, no te mea te haere ra te eˈa na nia i te tupuai ma te vahi topa tarere na te hiti. Ua tupu aˈenei vetahi mau ati, no te mea aita te taata paiuma haapao ore i tâuˈa i teie fǐfǐ. Ua haamanaˈo ihora matou i te tapao ta te taata aratai i faaite mai hou matou e paiuma ˈi. Te faaitehia ra te tabula o te mau ati pohe no teie roa nei tei roohia i nia i te mau ratere no te mau huru fenua atoa. Te tumu o te ati, oia ïa te mau mataˈi e puhi taue noa mai, o te faatopa ˈtu i te taata ori haere. A tapea maitai ïa i te fifi; e nehenehe hoi te reira e faaora ia outou!

Mai te rahiraa o te feia paiuma matau ore, ua haamata matou i to matou tere ma te manaˈo itoito maitai, i muri aˈe râ tau ahuru minuti, ua faataere rii mai matou e ua haere atura ia au i te hoê tere au noa. I muri noa iho, ite atura matou i to matou pereoo uta taata i raro mai e mea nainai roa hoi. E piti ahuru minuti to matou paiuma-noa-raa, papu atura ia matou e e ere matou i te mea pautuutu maitai mai ta matou i manaˈo noa na, e inaha, faaea tamau noa ˈtura matou. Ia tapea anaˈe matou, e mataitai ïa matou i te hohoˈa fenua nehenehe mau, o te aano noa ˈtura a paiuma noa ˈi matou. I te pae aui, e ite-maitai-hia te mau mouˈa teitei ra Olga, vetahi mau mato rahi mai te huru ra ïa e ua tahoêhia mai ratou e te rima o te hoê taata rarahi. Te mouˈa teitei roa ˈˈe o te mouˈa Olga ïa, e 546 metera hoi te teitei i nia i te peho. Ua hiˈo atura matou i te atea ê e ua ite atura i te pae atau, i te hotela rahi i reira te mau ratere e noho ai e tei tuatihia i te hoê tauraa manureva iti tei î roa i te taata. E i muri roa mai, te vai ano noa ra ïa te fenua mahorahora no te tuhaa ropu o te fenua Auteralia.

Te haamanaˈo ra vau i to ˈu tia-noa-raa i pihai iho i te pereoo uta taata, ma te hiˈopoa maite atu i te hoê mea e au ra i te mau hanere ro ru mau, i te haereraa ˈtu e te hoˈi-faahou-raa mai i to ratou ofaaraa, i raro mai i te mato, e tae atu i te vairaa maa, i nia i te tupuai mouˈa. Ia hiˈohia mai na raro mai, o matou atura ïa te faaauhia i te ro.

E manuïa anei matou?

Ua tamau noa ˈˈera matou i te paiuma i te vahi teitei. Auê râ to matou avae i te mauiui e! Ua moe oioi noa râ to matou mauiui i to matou iteraa ma te maere hoi i te mau vahi pape na nia i te hiti mato. Inaha, te au noa ra te mau mea iti ora i roto, oia hoi te mau oura iti! Tera anaˈe hoi te mau mea ora ta matou i ite i nia i taua mato mǎrô nei aita hoi hoê aˈe mea i nia iho.

Ia au i te parau a to matou taata aratai, ua tae matou i te afaraa o te tere. Tera anaˈe iho! Auaa râ, ua mahemo te tuhaa fifi roa ˈˈe, e aita e faufaa faahou to te fǐfǐ parururaa. I teie nei, mea mǎrû aˈe te vahi pahee, e na te hoê noa reni i penihia i ropu i te eˈa e aratai ra ia matou. E paiuma te eˈa e e haapou atu ai i raro ma te tipuu haere noa no te ape i te mau haafifiraa e no te faaau i te mau vahi rii afaro ore o te fenua. Ua uiui ihora matou e e tapae anei matou i nia i te tupuai mouˈa.

Auê hoi e, ua tapae matou! Ite ihora matou i te tupuai o te mato Ayers Rock e te tahi atu hiti. Inaha, e tia mau â ia ite i taua hohoˈa fenua ra. Mai te huru ra ïa e ua nanaˈohia te mau hiti mato, o te tauiui haere noa hoi, ia au i te mau nanaˈoraa huru ê roa. I ǒ nei, i nia i te tupuai mato, te vai ra te hoê cairn, oia hoi te hoê paepae no te faaite i te eˈa e te hoê vahi no te papai i to matou iˈoa no te haapapu e ua paiuma matou i nia i te Ayers Rock.

Eaha ˈtura no te pouraa mai?

Mai te rahiraa o te taata, ua manaˈo atoa vau e e riro te haapouraa ei ori-haere-raa ohie roa e e tia noa ia pou mǎrû noa ˈtu, ma te rohirohi ore. E manaˈo hape roa hoi te reira! Tau minuti i muri iho, ua mauiui roa to ˈu avae. Mai te huru ra hoi e mea mauiui roa ˈˈe teie taahiraa avae i to na mua ˈtu. Ua tapea pinepine matou, e ua tapae atura matou i raro.

E tiâ ia rave i te hoê tutavaraa rahi hopea no te haere atu na nia i te fenua papu i te vahi i pihai noa ˈtu, tei reira to matou pereoo. I to matou tapaeraa ˈtu, mataitai faahou atura matou i teie mato rahi o te medebara ra, e te paiuma noa ra te taata e au i te “ro”, na te hiti.

Mea faahiahia roa e mea maere roa atoa ia ite roa ˈtu i te hoê o te mau ohipa nehenehe mau i poietehia e te Atua! Ua rohirohi roa to matou tino, area to matou feruriraa ra, ua itoito roa ïa. I to ˈu aˈe pae, ua faatae roa ˈtu vau i te hoê pure poto noa ia Iehova no te haamauruuru ia ˈna i to ˈna horoaraa mai i te puai ia nehenehe vau, e 61 matahiti hoi to ˈu, e paiuma i nia i te mato rahi roa ˈˈe o te ao nei.

[Hohoˈa fenua i te api 22]

Auteralia

Alice Springs

[Hohoˈa i te api 23]

Te eˈa na nia ia Ayers Rock.