Te hauti e te tupu-maitai-raa o te tamarii

No taua tamahine iti nei, ua tae ïa i te tau no te iteraa i te mau mea apî. No to ˈna hinaaro e maimi haere, e tapeapea ïa o ˈna i te mau taoˈa atoa i roto i te fare. Mai te peu e aita te fare i faanahonahohia ia ore te tamarii e roohia i te fifi, e tamau noa ïa te metua vahine i te parau e: “Aita, aita!” e a tairi atu ai i te mau rima iti nainai o ta ˈna tamahine no te faaiti mai i to ˈna hinaaro e maimi haere. Area ra, o taua hinaaro mau ra hoi ia ite i te mea apî, o te tauturu atu ia ˈna a muri aˈe, ia manuïa oia i te fare haapiiraa e i roto i to ˈna oraraa iho. A paruru atu ïa i ta outou tamarii, tera râ, eiaha e tapeapea rahi roa mai ia ˈna. E rahi atu â to ˈna oaoaraa i roto i te hoê aua faafaaearaa, i reira te hoê auri rahi e riro mai ai ei eˈa i heruhia i roto i te mouˈa, aore ra ei ana no Mama daba e no ta ˈna fanaua.

E tau matahiti i muri aˈe, ua ieie maitai te feruriraa o taua tamahine nei. E riro mai te hoê afata ei fare, te hoê parahiraa ei parahiraa no te taata faahoro pereoo, te poro purumu mai te hoê puaahorofenua etaeta maitai no te horo e tauturu i te tahi taata. Mea rahi hoi te mau ohipa e nehenehe e ravehia e te tahi haapueraa one, te mau farii e te hoê patete pape. Mea faufaa iho â ïa ia haapao maitai te mau metua i ta ratou mau tamarii i te taime ratou e hauti ai, ma te ore râ e faanahonaho atu i te mau mea atoa; mea hau aˈe ia vaiiho e na ratou iho e maiti i ta ratou hauti ia au i to ratou huru i te reira taime. E nehenehe ta ratou e taui haere i muri aˈe i te afa hora, e a hauti atu ai i te taura marei, i te pairati manureva, i te taote e te vahine tuati maˈi, ia papa e ia mama, i te mau taata e haere i nia i te avae e i te mau taata faahoro bulldozer.

Mea faufaa roa te hauti no te tupu-maitai-raa o te mau tamarii. Mai te peu e eita e vaiiho-rahi-hia i te taime no ratou e aita hoi e horoahia ˈtu i te mau hauti e tano, e haafifihia ïa to ratou tupu-maitai-raa i te pae tino, i te pae no te feruriraa e i te pae no te here.