Na to ˈna faaroo i turai ia ˈna ia ohipa

I ROPU i te ooa no Peresia e te oire no Bagdad, te vai ra te hoê rahiraa mau pereti araea e apapa noa maira mai te hoê tiai moemoe ra te huru i rotopu i te hoê medebara aano e te hotu ore. Tairihia e te mau vero one, e ua marô oia i nia i te mahana veavea mau, te tia noa maira teie mau puea parari mehameha ma te mamû noa e i te tahi râ mau taime e faaroohia te uuru a te hoê animala no te po. Tera te mea e toe ra i te oire puai mau no Ura.

E hoˈi anaˈe râ tatou e maha tausani matahiti i muri. Ua patuhia te oire o Ura i te hiti atau o te anavai no Eupharate; e oire ona e te ruperupe teie. I te pae o te mau purumu e tioioi haere noa ra, te vai ra te mau toa e te mau fare mauouo roa. I te mau vahi hooraa taoˈa, te faaau ra te taata hoo taoˈa e te feia e hoo maira, i te tino moni hoo no nia i te hoê taoˈa. I te po e te ao, te nino ra te feia rave ohipa i te mau potaro huruhuru mamoe uouo. Ua fefe roa te mau eˈa maniania o te mau pahi i raro aˈe i te mau taoˈa moni rahi e te teiaha hoi ta te mau tîtî e tietie ra.

Te faaroohia ra teie maniania i te hiti o te pare parauhia ziggourat, e tia maira i roto i te oire. E haere mai te feia e haamori i te atua o te avae ra o Nanana (aore ra o Sin) i roto i te hiero no te faahanahanaraa ia ˈna, no te mea te tiaturi ra ratou e o o ˈna te tumu o te ruperupe o Ura.

No te hoê râ taata, e mea faufau mau ïa te hauˈa o te mau tusia e pûpûhia ˈtu i nia i teie pare rahi. Teie to ˈna iˈoa: o Aberama (i tauihia i muri iho ei “Aberahama”). Peneiaˈe, i mutaa ihora, ua haamori atoa o Tera to ˈna metua tane i te mau idolo (hiˈo Iosua 24:2, 14, 15). I teie nei râ, ua haapii o Aberama o vai mau na te Atua mau ra o Iehova. Maoti ïa o vai? Ma te papu maitai na roto ïa ia Sema, te hoê taata paari, tei ora mai mai roto mai i te diluvi.

Aita o Aberama i haamarirau i te faaite e e ere to ˈna faaroo ia Iehova i te mea pohe. Na roto râ i te tahi ravea, ua ‘faaite’ mai te Atua ia ˈna ia Aberama. (Ohipa 7:2-4.) Ua faaue atura oia ia ˈna e: “I parau mai hoi Iehova ia Aberama, E haere ê mai oe i to fenua na, e to fetii, e te utuafare o to metua na, i te fenua na ˈu e faaite atu ia oe na: e faariro hoi au ia oe ei nunaa rahi; e e haamaitai au ia oe, e faarahi atu vau i to oe iˈoa, e e riro oe ei maitai: e o tei haamaitai ia oe ra, o ta ˈu ïa e haamaitai; e o tei faaino ia oe ra, o ta ˈu ïa e faaino: e ei ia oe e maitai ai te mau fetii atoa o te ao nei.” — Genese 12:1-3.

Ua auraro oia i te faaueraa

Oia mau, ua ani maira te Atua ia ˈna e e faarue ia Ura i Kaladaio, taua oire ruperupe mau e te ona ra. E mea nehenehe mau vetahi mau fare tahua hoê, hamanihia e te pereti araea, e naeahia 14 mau piha e haaati ra i te hoê aua tahua ofai e vai ra i ropu. E ere ïa i te mea maere, e ua manaˈo noa o Henri Gaubert, taata tuatapapa aamu farani, e taata ratere noa o Aberama, e e ora noa hoi oia i raro aˈe i te mau fare ie, no te mea eita roa ˈtu o ˈna e nehenehe e faarue i to ˈna “fare i Ura, e to ˈna mau piha e te mau roi e te mau turua tei apapahia i nia iho, to ˈna faaearaa haumǎrû i te tau veavea, mahanahana i te tau toetoe, ta ˈna vairaa maa î maitai, e ta ˈna pape pihaa noa”. Oia mau, te faarueraa i teie mau mea atoa no te ora ˈtu i raro aˈe i te mau fare ie, e ere roa ˈtu ïa i te mea ohie ia tiaturi i te reira.

Hau atu, e faarue atoa o Aberama vetahi o to ˈna mau fetii. I te pae Hitia o te râ ma, no te puai o te mau auraa fetii, ia faarue-anaˈe-hia te hoê melo, e au ïa te reira i te hoê utua pohe. Nafea hoi o Aberama e nehenehe ai e faarue i teie mau mea atoa no te tahi noa mau parau tǎpǔ? Inaha, nafea hoi te Atua ia faariro i teie taata — aita hoi ta ˈna e tamarii — “ei nunaa rahi”? Eaha taua fenua i tǎpǔhia ra?

Noa ˈtu teie mau mea, e taata faaroo mau o Aberama, no te mea te faaroo “o te tiaturi ïa i te mau mea e tiaihia nei”. (Hebera 11:1.) No te mau ohipa i tupu i mutaa ihora — mai te diluviraahia te ao nei — no reira oia i tiaturi ai e e tupu mau iho â te parau a te Atua. Aita hoi i papu maitai ia ˈna e nafea râ, anafea e i hea râ te mau parau tǎpǔ a te Atua e tupu ai, eita râ hoi te reira e haafifi ra ia ˈna. No ˈna, e mea faufaa aˈe te faahoaraa ˈtu ia Iehova i te hoê fare nehenehe, te hoê oraraa papu e tae noa ˈtu te mau taairaa fetii. No reira, no Aberama, te opuaraa hoê roa te tia ia ˈna ia rave, te auraroraa ïa i te Atua e te faarueraa ia Ura.

Te turai atoa ra anei to outou faaroo ia outou i te ohipa? E pinepine tatou i te faaitoitohia mai ia apiti rahi atu i roto i te ohipa pororaa. Te pahono ra vetahi o te mau kerisetiano i taua tiaororaa nei na roto i te riroraa mai ei feia poro no Basileia ma te taime taatoa. Te tapea noa ra anei vetahi mau kerisetiano ia ratou no te mea aita ratou e tiaturi hohonu mau ra e e nehenehe te Atua e horoa mai i te mau mea e hinaaro-mau-hia ra e te feia e imi ra na mua i te Basileia ia au i ta ˈna i tǎpǔ ra (Mataio 6:33)? Na to Aberama faaroo i turai ia ˈna ia ohipa. Ua faaau o ˈna i to ˈna oraraa i nia i te mau parau tǎpǔ a te Atua.

Mai Ura i Harana

Eita o Aberama e reva o ˈna anaˈe. Mai te rahiraa o te mau Ite no Iehova i teie nei mahana, eita e ore e ua faaite mau â oia i te mau parau mau a te Atua i to ˈna utuafare fetii. Eita ˈtura ïa e maerehia e ua ineine atoa o Sari raua o Lota, ta ˈna tamaiti fetii otare, ia auraro mai i te faaueraa a te Atuaa. Ua apee atoa mai to ˈna iho metua tane o Tera — ta vetahi pae e parau ra e te hamani ra oia i te idolo —, ia ratou! — Genese 11:31.

E ua tae atura o Aberama e to ˈna utuafare fetii e ta ratou mau nǎnǎ i rapaeau mai i te mau patu o te oire no Ura. E horoahia te tapao no te faarevaraa, e ua tere atura ratou paatoa. Ma te haere atu na te hiti o te pae hitia o te râ o Eupharate, ua tere atura ratou i raro aˈe i te mahana puai mau. Mea papu maitai e te haere avae noa ra ratou e aore ra na nia i te mau kamela ma te apeehia e te mau ǒe e pate noa ra, e o tei taamuhia i nia i to ratou afii.

E haere tia ˈtu ratou na te pae apatoerau-tooa o te râ, ma te apee atu i te eˈa o Eupharate. I muri aˈe e rave rahi mau mahana, ua naeahia ia ratou 960 kilometera. Ua oaoa roa hoi te mau ratere tei rohirohi roa, i te iteraa ˈtu i te mau fare i hamanihia ia au i te hohoˈa o te mau fare manu meli e haaati ra i te oire o Harana. I reira te feia ratere amui ra e tapea ˈi e e faaea maoro atu ai.— Genese 11:31.

Te tereraa i te tahi atu pae no Eupharate

E faaea mai o Aberama i Harana, eita e ore no Tera, to ˈna metua tane tei ruhiruhia roa. Ma te haamaitaihia mai e Iehova, ua noaa maira ta ˈna taoˈa e rave rahi (hiˈo Koheleta 5:19). I teie mahana, e pinepine te Atua i te horoa mai i te mau mea materia e hinaarohia ra e te feia e ‘faarue ra i to ratou fare, i to ratou mau taeae aore ra mau tuahine’ no te Basileia. — Mareko 10:29, 30.

I Harana, ua ‘fatu [o Aberama] i te mau taata atoa i noaa ia ˈna’ — te mau tavini (Genese 12:5). Te parau ra te Targum no Ierusalema e te Tatararaa parau kaladaio e ua faariro oia ia ratou ei mau taata faaroo, ‘tei haapao i te parau a Iehova’. (Hiˈo Genese 18:19.) Oia mau, ua turai to ˈna faaroo ia ˈna ia haere e poro, o ta te mau Ite no Iehova atoa hoi e na reira nei i teie mahana.

“E to Tera pue matahiti i te ao nei ra, e piti ïa hanere, e pae tiahapa; pohe ihora Tera i Harana.” (Genese 11:32). Ua peapea roa o Aberama a pohe ai to ˈna metua tane. Ia hope râ te tau hevaraa, ua faaineine faahou aˈera oia no te reva. “A hitu aˈera o Aberama ahururaa i te matahiti e pae tiahapa, i reva ˈtu ai oia mai Harana ˈtu.” — Genese 12:4.

“Ua aratai atura Aberama i ta ˈna vahine ia Sari, e te tamaiti a tana tuaana ia Lota, ma te mau taoˈa atoa i noaa ia raua, e to raua mau taata atoa i noaa i Harana ra; haere atura ratou i te fenua ra o Kanaana; e tae atura i taua fenua ra o Kanaana.” (Genese 12:5). I muri aˈe i to ratou tereraa fatata e 90 kilometera mai Harana mai e tae tia ˈtu i te pae tooa o te râ, tapea ihora o Aberama peneiaˈe i te hiti pape o Eupharate i mua noa mai ia Carkémisch, te hoê oire tuiroo i te pae tapi hooraa taoˈa no te tau Tahito ra. I taua vahi ra hoi te feia e tere amui ra e na roto atu ai i te anavai no Eupharate.

I te 14 no Nisana i te matahiti 1943 hou to tatou nei tau, ua na roto atura o Aberama i taua anavai ra. E 430 matahiti i muri iho, i taua iho mahana ra, e faaorahia mai ai to ˈna mau huaai i te faatîtîraa a to Aiphiti (Exodo 12:40, 41). E piti tausani matahiti i muri iho, i taua iho mahana ra, o Iesu Mesia, to ˈna Huaai, e faaau ai i te hoê “faufaa (...) no te hoê basileia” e i raro aˈe hoi taua faatereraa ra e maitai ai “te mau fenua atoa o te ao nei” — Luka 22:1, 28, 29.

Na roto i taua ohipa faaroo ra — te na rotoraa ˈtu o Aberahama ia Eupharate no te haere atu i te tahi pae — e haamata ˈi te mau parau tǎpǔ a te Atua i te tupu. E nehenehe ïa Aberama e manaˈo i “te oire mau ra”, te hoê faatereraa parau-tia i nia i te huitaata nei. Inaha hoi, na nia noa i te tahi mau haamaramaramaraa, o Aberama e taa ˈi i teie nei i te mau tuhaa faufaa roa o te opuaraa a te Atua oia hoi te faatiamâraa mai te mau taata mai roto mai i te pohe. Ua horoa ˈtura hoi te mau parau tohu na ˈna i te tahi tiaturiraa. — Hebera 11:10.

I to tatou nei tau, mea aano aˈe te niu o te faaroo o te mau Ite no Iehova ia faaauhia i te tau o Aberama. E rave rahi mau haapapuraa e faaite maira e e mea mau â i teie nei “te oire” ta Aberama e tiai ra, oia hoi te Basileia i te raˈi ra. Teie râ, te turai ra anei to outou faaroo i taua Basileia ra ia outou ia haere e poro ma te itoito? ia pee i te faatereraa a te Atua? ia titau i te mau tapao i te pae varua maoti hoi i te imi i te oraraa fanaˈo i te pae materia? Ia nehenehe na outou e pahono mai e e, i taua mau uiraa nei, ia faaite mai ia Aberama i te faaroo e turai i te ohipa!

[Nota i raro i te api]

[Hohoˈa fenua/Hohoˈa i te api 29]

(Hiˈo i te papai)

Te tere o Aberahama

Ura

Harana

Carkémisch

KANAANA

Miti Rahi

[Faaiteraa i te tumu]

No roto mai i te hoê tabura fenua copyright Pictorial Archive (Aamu i te pae Hitia o te râ ma) Tuatapaparaa no nia ia Iseraela.

[Hohoˈa]

Te Euphrate, i pihai aˈe ia Ura

[Hohoˈa]

Harana, te oire apî

[Hohoˈa]

Te Euphrate, i pihai iho ia Carkémisch