Te mau Urus—Feia no te mau motu o te roto no Titicaca
TE ROTO Titicaca, te nohoraa ïa o te mau Inidia urus, i te otia fenua no Pérou i te pae tooa o te râ, e no Bolivia i te pae hitia o te râ. I roto i to matou tere i Pérou, ua haere atoa matou e farerei i teie nunaa taata inidia e ora ra i nia i te mau motu e painu haere ra i nia i te mau vahi teitei o te mau Andes.
Ua naeahia ia matou te roto Titicaca i te poipoi roa. Te faahoˈi ra te pape manina o te roto, i te rahi aita e faaauraa o te raˈi ninamu e ua putapû roa matou i mua i te reira. Ua ite matou e tei te hoê teiteiraa e 3812 metera oia e o oia hoi te roto teitei roa ˈˈe o te ao nei e terehia ra e te mau pahi, ua hitimahuta râ matou i to ˈna rahi: fatata 190 kilimetera te roa e 80 kilometera te aano.
Ua haere aˈera matou e mataitai i te hoê oire iti uru tei patuhia i nia i te hoê motu painu, hamanihia i te opaero. Ia pe anaˈe te mau opaero e vai ra i raro aˈe, e tâpû mai ïa te mau Inidia i te mau opaero apî no te hamani i te tahi tahua apî no to ratou motu mai i te rimu ra te huru. Ua tere matou na nia i te hoê poti iti hamanihia e te aeho e ua maere roa matou i te papu o taua mau poti ra. Ia hoˈi atu matou i nia i te motu, ua horoa ˈtura matou na te mau tamarii i te tahi mau faraoa iti, e aita hoi ratou i matau i teie huru maa, ua au roa râ hoi ratou. Ei faahoˈiraa, ua farii maira ratou e ia pata matou ia ratou i te hohoˈa i nia i to ratou motu hau mau.
Ia au i te hoê aai ta ratou, i nia i te roto Titicaca te hiti-matamua-raa te mahana i muri aˈe i te diluvi i tupu i roto i te ao taatoa nei. E ere anei i te mea maere ia ite tatou i te aamu o te diluvi i rotopu i teie mau Inidia urus, i nia i te tupuai o te mau Andes, tei atea roa hoi i te Mésopotamie? (Hiˈo Genese pene 6 e tae atu i te 8.) — Na te hoê o to tatou mau taata taio.