Te feia aita e faaearaa to ratou—E ati mau â

I ROTO I te mau vahi atoa, e rave rahi mirioni mau taata teie e ora nei i roto i tei matauhia i te parau e, te mau vahi faaearaa reporepo mau. Ia au i te hoê buka a te mau Hau amui oia hoi Patu no te feia aita e faaearaa (beretane), i roto i te mau fenua e haere ra i mua i te pae no te faanavairaa faufaa “tae roa ˈtu i te 50 % o te huiraatira o te oire — fatata 80 % i roto i vetahi mau oire — teie e ora nei i roto i te mau fare veve roa e te mau nohoraa tei faaruehia”, e aita ta ratou e pape e aita atoa e uira, aita e vahi haumitiraa e aita atoa hoi ta ratou mau vahi faataahia no te mau pehu. Eaha ˈtura ïa te hohoˈa o te oraraa i roto i taua mau vahi ra? Teie vetahi mau manaˈo i ohihia mai e te mau taata e papai na te A ara mai na!.

Bombay, fenua Inidia: I te pae ropu no Bombay, mea riaria mau â te veavea o te tau veavea. I raro aˈe i te hoê tumu suke banian rahi, te taoto ra te hoê tane, te hoê vahine e te hoê aiû, i nia i te vahi haereraa taata. Te tahi noa maa vahi taotoraa iti, te tahi tau pani no te tunu i te maa e te mau rehu o te hoê auahi iti, te haapapu maira e ua faariro taua utuafare nei i taua vahi iti o te vahi haereraa taata ra, ei nohoraa no ratou maa taime iti noa. Aita e parahiraa no ratou i te tahi atu vahi. E na mua noa mai hoi te mau taata e haere ra e hoohoo haere e tae noa ˈtu te mau taata toroa i te pae tapihooraa tauihaa ia ratou, mai te huru ra ïa e aita roa ˈtu e tâuˈa maira. E rave rahi mau ahuru tausani mai ia ratou i roto i te oire taatoa. I roto i te hoê fenua i reira fatata e 25 mirioni nohoraa hau atu e titauhia ˈi, e ohipa matauhia te mau taata e ora haere noa na nia i te purumu.

Aita i atea roa ˈtu i reira, i nia i te mau fenua aita e fare i nia iho e tae noa ˈtu na te hiti i te mau aroâ e te mau vahi tereraa pereoo auahi, ua itehia mai te tahi mau puhapa haihai mau. E rave rahi mau taata veve tei haaputu noa i raro aˈe i taua mau vahi ra i hamanihia i te pute tahito roa e tae noa ˈtu hoi i te mau ahu tahito. Ia ore te mau tia mana e tiahi ia ratou mai taua mau vahi ra, e fâ mai ïa te mau fare rii aita e haamaramarama, i patuhia e te tahi mau materia i ohi-noa-hia mai. No te feia e ora ra i ǒ nei, ua riro ïa te paimiraa i te pape ei tapitapiraa no te mau mahana atoa. Ua riro te mau tereraa pereoo auahi e tae noa ˈtu hoi te mau vahi faarueraa pehu ei vahi haumitiraa. Ei faaauraa, mea faahiahia aˈe te oraraa o te feia e ora ra i roto i te mau fare veve roa “tamau”, inaha i reira te vai ra ïa te tahi mau robine pape e tae noa ˈtu i te mau vahi haumitiraa.

Johannesburg, Afirika Apatoa: Mai te peu e te vai ra ta ˈna te mau ravea no te faaruru i te hoo e rahi noa ˈtura no te aufauraa i te moni fare, eita roa ˈtu te hoê taata uouo no Afirika Apatoa e fifi rahi i te pae no te nohoraa. Tera râ, ia au i te buka matahiti a te hau Afirika Apatoa 1986 (beretane), “te tapao ra te fenua Afirika Apatoa i teie mahana, i te hoê taereraa rahi mau i te pae no te mau nohoraa o te feia Ereere, i roto iho â râ i te mau oire”. I te mea hoi e te tiai nei e rave rahi tausani taata i te nohoraa no ratou, e itehia i te tahi taime e e tia i na utuafare e toru ia ora i roto i te hoê fare e maha piha, aore ra e toru aore ra e maha melo i roto i te hoê noa iho piha. Ia faaipoipo te hoê o te mau tamarii tamaroa, e tapao ïa o ˈna i to ˈna iˈoa i nia i te tabura o te feia e tiai noa ra, ma te tiaturi e e vata mai te hoê fare no ˈna i roto i te piti aore ra te toru matahiti. A tiai noa ˈtu ai, hoê â ïa piha to na taata faaipoipo apî nei e te mau metua aore ra e hamani raua i te tahi maa fare iti punu i roto i te âua, mai te peu e te vai ra te âua.

I roto i te tahi mau vahi, e patu na te tahi mau fatu fare i te tahi mau fare mai te reira te huru ta ratou e horoa tarahu i te hoê tino moni rahi roa. E farii noa hoi te mau fare oire i taua huru tupuraa ra no te mea aita ta ratou e nehenehe e faaruru atu i te mau aniraa i te pae no te nohoraa. E te faahopearaa, o te mau fare veve roa iho â ïa e te rahi-roa-raa te ohipa taparahi taata e te maˈi. Ua faaite te radio e 136 aiû i nia i te 1 000 te pohe no te tahi mau tupuraa ino mau i te pae no te vai-mâ-raa mai to ratou mai â fanauraahia — te oreraa te pape, te hoê vahi haumitiraa no fatata e maha aore ra e pae utuafare. E û atoa hoi taua ati ra i nia i te mau tamarii paari aˈe. E oioi roa ratou i te haapii nafea ia eiâ e te faataero ia ratou i te raau taero, e e rave rahi o ratou te topa nei i roto i te inu-hua-raa i te ava.

Shanghai, fenua Taina: No te horoa i te hoê nohoraa maitai no na hau atu i te ahuru ma piti mirioni taata o taua oire ra, te oire rahi roa ˈˈe hoi o te fenua o te ao nei mea rahi te taata i reira, ua riro ïa ei fifi rahi mau. Noa ˈtu â ïa e te faaitoito nei te faatereraa no te patu i te mau vahi faaearaa apî, te ora noa nei â te rahiraa o te mau taata i roto i te mau fare rii nainai roa e faaauhia i te mau fare o te mau pepe haavare, tei hamanihia i roto i te mau matahiti 30 e 40. Ma te piripiri hoi te tahi i pihai iho i te tahi e ma te riro ei mau tuhaa anairaa fare rarahi, e nehenehe noa e tapae atu i reira na roto i ta te mau taata no Shanghai e parau ra e e mau aroâ iti. E rave rahi o taua mau fare ra, aita e pape, aita atoa hoi e vahi tunuraa maa, aita e vahi haumitiraa i roto mai e aita hoi e haaveaveahia ra, noa ˈtu â ïa e e topa roa mai te anuera i te tahi taime i raro aˈe i te faito aore i te tau toetoe. I roto i te tahi mau vahi farani e beretane tahito, e pinepine te mau fare faufaa roa ˈˈe i te tatuhaahia: te hoê utuafare hoê piha, te vahi tunuraa maa e te vahi haumitiraa hoê â ïa. E pinepine te itehia e toru ui ia ora i roto i te hoê noa piha.

Te haamaitairaa i te mau huru tupuraa i te pae no te nohoraa, o te hoê ïa o te mau ohipa matamua e titauhia e te fare oire. I teie nei, ua tapaohia e e 4 e tae atu i te 5,50 metera tuea e nehenehe e faaeahia no te taata tataitahi. Tei raro mai ïa i te tapao e titauhia oia hoi e 6 metera tuea ta te faatereraa i manaˈo. I Shanghai, ua patuhia e 6 000 mau nohoraa apî i te matahiti 1985 ra e ua horoahia e 760 mirioni farane farani (fatata 15 200 mirioni farane) i te pae no te paturaa i te fare i te matahiti 1986 ra. Teie râ, te tapaohia râ hau atu i te 100 000 taata i nia i te mau tabura o te mau taata e tiai ra e aita e nehenehe e parau e e hia ˈtu â rahiraa teie e imi atoa nei i te nohoraa no ratou.

São Paulo, Beresilia: I ǒ nei, tei te mau vahi atoa te mau fare veve roa. Ma te ore e taa faahou e nafea râ, te haere nei te feia aita e nohoraa to ratou i nia i te mau fenua e fatu hoi to taua mau fenua ra, aita râ e taata i reira e tae noa ˈtu i nia i te mau fenua aita e fare to nia iho, i reira ratou e haamau ai i te tahi mau vahi nohoraa papu ore e hamanihia i te punu, e i te tahi taime i pihai noa ˈtu i te tahi mau fare nehenehe roa e mau fare hamaniraa apî. E rave rahi mau fare fetii tei tatuhaahia ei nohoraa haihai roa hoê piha, hoê piha hopuraa pape e pinepine i te faaohipahia e te tahi tau pae ahuru taata.

I te avae eperera 1987, ua ino roa ˈtu â te huru tupuraa a faauehia ˈtu ai te mutoi a te nuu e ia tiavaru i te mau taata i haamau i to ratou puhapa i te hoê vahi no São Paulo. Ia au i te vea ra O Estado de São Paulo, ua taparahihia te tahi mau taata paari roa, ua huti-noa-hia te tahi mau vahine ma to ratou mau rouru e ua taorahia te mau tamarii i raro. E rave rahi tei ino roa i te pae no te hutiraa i te aho, te tumu, no te tahi ïa mau paura i taorahia ˈtu i roto i te mau vahi faaearaa veve.

No te taata i ore aˈenei i ora i rotopu i te feia e faaea ra i roto i te mau vahi veve mau, te mau fare aita e taata aore ra te mau fare e tupararihia e te mau fare aita e haapaoraa, mea fifi roa ia ite eaha mau na te auraa o te veve, te ereraa i te tahi mau mea e te oreraa e ite e nafea râ. No te mau hanere mirioni taata e erehia ra, e mau huru tupuraa mau anaˈe hoi teie e farereihia nei e ratou i te mau mahana atoa.