Nafea outou e ite maitai ai i te hoohoo?

AITA aˈenei te ite-maitai-raa i te hoohoo i riro ei mea faufaa roa ˈˈe mai to teie anotau no te mea mea moni roa te oraraa e te maraa noa ˈtura te moni hoo i roto e rave rahi mau fenua. Fatata i te mau vahi atoa, ua maraa te moni o te hoo ma te atâata mau, eita roa ˈtu tatou e nehenehe e tiaturi e e topa te moni o te hoo i te mau matahiti i mua ia tatou. I roto e rave rahi mau utuafare, e tia i te metua tane e te metua vahine ia rave raua toopiti atoa i te ohipa no te faanavairaa. E mea faufaa roa ïa ia ite maitai e mea nafea, e hia roa e anafea e hoo ai, e ia ite atoa tatou i te ravea maitai aˈe no te haamauˈaraa i te moni.

Ia ite tatou i te faufaa o te mau taoˈa

No te ite-maitai-raa i te hoo haere, e mea titauhia ïa ia ite tatou i te faufaa o te mau taoˈa. Ia hoo mai tatou i te hoê taoˈa i te vahi hoo-mama-raa — te ahu, te matini aore ra te maa — eita ïa tatou e faufaahia mai te peu e e ere te mea maitai, e tia ia tataaihia e aore ra i te pae hopea eita tatou e faaohipa i te reira.

Ei hiˈoraa, ia hoo anaˈe outou i te hoê ahu, a uiui ia outou iho: E mea maitai anei te ahu? Mea nira-maitai-hia anei? E faanainai anei, e haapoto anei? E oomo pinepine anei vau i te reira? E tano anei tera faito ahu no te mau taime atoa? Mea ohie anei ia pua? Te ahu o te afaihia i te vahi puaraa ahu e pau rahi ïa te moni i te ahu e nehenehe e puahia i te fare noa ˈtu e mea moni rahi aˈe. E tia ia haapao-maitai-hia te atuaturaa. E faufaahia tatou mai te peu e e hoo mai tatou i te mau ahu tano maitai e te au hoi i te tino, o ta tatou ïa e oomo e e au e rave rahi matahiti.

Hoê â huru no te hooraa mai i te mau tauihaa fare e te mau matini, mea apî aore ra ua faaohipa-aˈena-hia. Mea maitai anei? Te tere maitai ra anei te matini? E nehenehe anei outou iho e tataai i te reira? I te pae hopea, e fea moni e pau? I te faatupuraa i taua uiuiraa ra, i te taime iho â outou e hoo ai i te vahi hoo-mama-raa aore ra i te vahi e hoohia ˈi te mau tauihaa i faaohipa-aˈena-hia, eita ïa outou e hoo noa i te hoê taoˈa faufaa ore, e e faaherehere ïa outou i ta outou moni.

Ia faufaahia outou i te hooraa mai i te hoê matini, ia ite ïa outou e hia moni e pau no te faatere ia ˈna. E nehenehe to ˈna moni e maraa roa mai te peu e mea moni te atuaturaa ia ˈna e mea rahi te ito ta ˈna e amu. A feruri maitai i hea tatou e tuu ai te matini. Ei hiˈoraa, mai te peu e e tuuhia te hoê matini faahaumaruraa i nia i te hoê haamaramaramaraa e hitihia mai e te mahana, e amu rahi ïa o ˈna i te uiraa ahiri o ˈna e tuuhia ˈtu i nia i te hoê haamaramaramaraa e vai ra i te vahi marumaru. Te rahiraa ito e amuhia e te hoê matini, e i te pae hopea te rahiraa moni haamauˈahia, tei nia ïa i te roaraa o to ˈna tereraa e to ˈna atoa rarahi, to ˈna matahiti e to ˈna faufaaraa.

Ia ite tatou e anafea e hoo mai ai

I te tahi mau taime e mea faufaa aˈe ïa ia faataa i te tau e hoo ai tatou i te hoê taoˈa i te maitiraa i te hoê fare toa. No te mau ahu haumǎrû, i te rahiraa o te taime e hoonahia tatou ia hoo mai i te hopea o te tau veavea, no te mea e hoo mama te rahiraa o te mau fare toa i te taatoaraa o ta ratou mau ahu i taua taime ra no te vaiiho i te vairaa no te mau ahu no te tau toetoe. Hoê â huru no te mau ahu mahanahana. E iti mai ïa te moni ia hoo mai i te reira i te hopea o te tau toetoe, na mua noa ˈˈe e tae mai ai te mau ahu no te tau faatupuraa raau. Parau mau, e iti mai paha te ahu ta tatou e nehenehe e maiti, ua navai noa ra.

I te mea hoi e eita te faito o te mau pereoo e tauiui noa i te mau matahiti atoa, e faaherehere ïa outou i te moni ia hoo mai outou i te hoê pereoo apî i te hopea matahiti, ia hoo rû anaˈe te feia hoo pereoo i te taatoaraa o ta ratou mau pereoo, no te vaiiho i te vairaa no te mau faito pereoo apî. Eiaha e mǎtaˈu ia uiui atu no nia i te mau parau parururaa e no nia i te mau atuaturaa e fanaˈohia e outou na roto i te hooraa mai i te reira. I muri iho, e nehenehe ïa te reira e riro mai ei mea faufaa aˈe i te pereoo iho.

A hoo noa mai i te mea e titauhia

No te oreraa e hoo mai i te mea titau-ore-hia, e tia ia haavî tatou ia tatou iho. E parau mau iho â te reira, ia hoohoo anaˈe tatou i roto i te mau fare toa hooraa maa, te hoê o te mau vahi e pau rahi ai te moni o te utuafare.

I taua taime noa ra, e nehenehe tatou e faaiti roa mai i te mau haamauˈaraa no nia i te maa na roto i te feruri-maite-raa. Ia ara maite tatou i te reira, e ia faatura atoa ˈtu tatou i teie ture tumu: Eiaha roa ˈtu e haere e hoo i te maa mai te peu e te poia ra outou. Eiaha roa ˈtu. Eita e ore tatou i te hoo mai i te mau maa (mea pinepine e monamona) o ta tatou hoi e ore roa ˈtu i matau i te hoo mai. Aita anei outou i ite aˈenei i te reira?

Teie atoa te tahi atu titauraa ia navai ta tatou moni haamauˈaraa, maoti râ ïa te tapaopaoraa ïa i te maa o ta tatou e hoo mai e te faaturaraa i te reira. Mai te peu e eita tatou e na reira, i te mau taime atoa e haere ai tatou i te fare toa ia haere mai anaˈe tatou i rapae, e rahi roa ïa ta tatou mau mea i hoo mai i ta tatou e hinaaro ra. Ia au i te mau maimiraa o vetahi, no te hoê vahine i manaˈo e hoo mai e 3 aˈe mea i roto i te hoê fare toa rarahi, e aita ta ˈna e tabula, e rave mai ïa o ˈna e 8 e tae atu i te 10 mau mea, e no te hoê tane e hau atu ïa i te piti ahuru. Parau mau, e imi iho â te mau fare toa i te ravea ia hoo rahi mai te taata. Nafea ïa?

E tuuhia te mau maa hinaarohia i te mau mahana atoa, mai te û, te inai e te mau pota i te atea roa i te mau vahi aufauraa. E tia ia tatou ia haere na mua mai e rave rahi mau paepae tauihaa no te haere atu e tii i te reira, e hou tatou e tae atu ai i reira ua fatata ïa te pereoo vairaa maa i te î roa. Ma te feaa ore, e mea titau-mau-hia te hoê parau tapaopao no te faaiti mai i te hoo i te mau mea faufaa ore.

Hou tatou a haere ai e hoohoo, e tia atoa ia tatou ia hiˈopoa i te mau parau faaiteiteraa no nia i te mau hoo-mama-raa. E nehenehe ïa tatou e hoo i te maa-hinaaro-hia e e feruri i te maa o ta tatou e amu i roto i te hebedoma, ia au i te moni e vai ra ia tatou. Mai te peu e ua matau maitai tatou i te tino moni o te mau maa, e ape ïa tatou i te mau hoo-mama-raa haavarevare, maoti ra te hoo-rahi-raa i te hoê maa ma te ore roa e faatopa mai i te tino moni i raro. E mea tano, ia haere e hoohoo i te ropuraa o te hebedoma. No te mea, aita ïa e rahi roa te taata i roto i te fare toa eita ïa tatou e rû noa, e e nehenehe â tatou e fanaˈo i te mau hoo-mama-raa. A haamanaˈo na e hoonahia tatou ia hoo anaˈe tatou i te mau maa hotu e te mau pota no te reira iho tau. E mea moni mama roa ratou, e e nehenehe atoa tatou e rapaau i te reira. E mea faufaa mau ia feruri maite tatou i te mau mea o ta tatou e hoo mai.

Mea maitai paha ia ore e afai i te tamarii na muri iho ia tatou ia haere anaˈe tatou e hoohoo. Eaha te tumu? No ratou aˈe e nevaneva tatou, e no te mea atoa hoi e hinaaro ratou e hoo mai i te mea o ta ratou i ite i roto i te afata teata. No to te tamarii aniani-onoono-raa, e hoo mai ïa e rave rahi mau metua vahine i te mau hauti faufaa ore e te mau monamona e vai ra i pihai iho i te vahi aufauraa e mea ohie hoi na te tamarii te haru mai i te reira. Te faˈi nei te hoê metua vahine marite e eita ta ˈna e nehenehe e haere e hoohoo “ma te ore e hoo mai” i te tahi atu â pereoo faauta taoˈa apî e aore ra te tahi atu â pereoo iti no ta ˈna tamaroa. Mai te peu e, tera to tatou fifi, ia tutava ïa tatou no te faaiteraa i te hoê huru aueue ore tei î i te aroha i nia i ta tatou mau tamarii ia apee anaˈe ratou ia tatou i te fare toa.

I te mea e tuhaa moni haihai ta tatou, mea tano iho â ia hoo tatou i te mea titauhia i te pae iho â o te ahu. Auaˈa e nehenehe tatou e haavî, e faaiti e tae roa ˈtu i te faaore roa no te hoê noa taime te mau haamauˈaraa i te pae no te ahu. Nafea ïa? A tahi, na roto ïa i te horoaraa ˈtu i to te tahi mau ahu no te tahi atu melo o te utuafare iho. Eita vetahi mau tamarii e au ra i te reira, eita ratou e rave i te mau ahu o tei oomo-aˈena-hia, ahiri ra e faataahia ˈtu ia ratou e ia tahoê ratou e hoonahia atoa ïa te taatoaraa o te utuafare, e nehenehe ïa ratou e taui. Mai te reira iho â ia ite anaˈe ratou e auaˈa taua moni i faahereherehia ra, e nehenehe ai e faanahohia te tahi mau oriori-haere-raa, e te revaraa i te tau faafaaearaa haapiiraa e aore ra te faatupuraa ˈtu i te tahi mau opuaraa i roto i te utuafare.

E nehenehe atoa e faanahohia i rotopu i te mau hoa e aore ra te feia tapiri mai te mau putuputuraa no te tauiraa ˈtu te mau ahu e te mau matini. E nehenehe te hoê ahu au-ore-hia e te hoê vahine no to ˈna peni e tano no te tahi atu. E nehenehe e oomohia te tahi mau tiaa nainai aore ra aano roa e aita hoi hoê noa ˈˈe taata e faufaahia i te reira. E nehenehe atoa e horoahia ˈtu te tahi mau matini o te ore roa e faaohipahia i ǒ te tahi atu e mea farii-popou-hia ra e vetahi ê. Te mea faahiahia ra, e ravehia taua mau tauihaa ra e aita e aufau-noa ˈˈe-hia te moni; e ere anei te reira te moemoeâ o te feia hoohoo atoa?

A faau atu i te moni hoo

E nehenehe atoa tatou e faaherehere i te moni na roto i te faaauraa i te tino moni o te hoê taoˈa i roto i te mau fare toa taa ê. Ia hoo faarahi anaˈe tatou i te tahi mau taoˈa, e imi ïa tatou i hea ra tatou e fanaˈo ai i te haamamaraa faufaa roa ˈˈe. Ei hiˈoroaa, e haamama mai vetahi mau fare toa 10 % mai te peu e hoo mai tatou 15 kilo peni hoê â huru peni. E nehenehe e rave rahi taata e tahoê no te tuha i te mau taoˈa, e tae noa ˈtu i te moni faahereherehia.

E nehenehe atoa tatou e na reira no te hooraa mai i te maa. A hiˈopoa i te vea o te fenua iho no te iteraa i te mau hoo-mama-raa e vai ra i roto i te mau fare toa taa ê e, i muri iho, haere atu ai e hoo ma te haapao atu i te reira. Eiaha tatou e rave i te maa na nia noa i te iˈoa o te fare hamaniraa. E nehenehe e hoo-rahi-hia te mau maa no te hoê fare hamaniraa tuiroo e aita hoi to ˈna e maitai hau aˈe i to te tahi. I te rahiraa o te taime, mea moni aˈe te maa no te mau fare hamaniraa tuiroo no te aufauraa ïa i te moni i haamauˈahia no te mau faaiteiteraa e no te puohu o te maa. E mea maitai atoa hoi te mau maa no te fare toa iho.

E rave rahi mau matahiti i teie nei, e nehenehe ïa te taatoaraa e hoo mai i te mau maa i tuuhia i roto i te mau puohu haaviti ore. Eiaha râ tatou e faaoti rû noa ma te ore e tamata i te reira. Mea maitai atoa hoi te rahiraa i rotopu ia ratou e mea au atoa i to te mau maa no roto mai i te mau fare tuiroo, e mea moni mama aˈe ïa. I roto vetahi mau fenua, e hoohia te mau raau o te rave-pinepine-hia i roto i te mau fare toa rarahi. Hoê â to ratou huru e te mau raau no roto mai i te mau fare hamaniraa tuiroo, e e mea mama aˈe ïa.

Parau mau, ia ara ïa tatou ia faaau anaˈe tatou i te tino moni. Ia imi rû anaˈe tatou na roto i te oire te hoê e aore e piti aˈe taoˈa hoo mama e pau ïa ta tatou moni i roto i te faurao. E nehenehe atoa tatou e faaiti mai i te mau haamauˈaraa na roto i te hoo-tamau-raa i roto i te hoê â fare toa, no te mea ua ite ïa tatou i te mau tau hoo-mama-raa. Ua ite atoa hoi tatou i te mau paepae vairaa taoˈa eita atoa ïa to tatou taime e mauˈa. No te feia e rû ra, e mea faufaa atoa te reira i te faaherehereraa i te moni.

A ara i te mau marei!

Te imi ra te rahiraa o te mau fare toa rarahi ia hoo rû noa mai tatou i te tahi mea. E tia ïa ia ite tatou i ta ratou mau ravea paari ia tutava e ia haavî ia tatou iho ia nehenehe tatou e ape i teie mau faahemaraa.

Te hoê o te mau ravea e faaohipahia ra o te huru haviti ïa o te mau puohu. Ua tapao aˈenei â outou i te rahiraa puohu e te hohoˈa penihia o te maa e vai ra i roto. Mea uteute ïa te rahiraa e aore ra e mau papai uteute to nia iho. No reira e ere roa ˈtu ïa i te mea anaanatae na te taata te mau taoˈa e vai ra i roto i te mau puohu haviti ore: Eita iho â ïa te taata hoo e hinaaro i te reira!

A haapao maitai atoa i te tino moni i papaihia. A haamanaˈo e marei anaˈe ïa te mau titeti o te tapaohia 995 farane, 1495 farane, 2995 farane e to muri iho atu. Eiaha atoa tatou e manaˈo e tia iho â ia hoo tatou i te mau taoˈa faufaa ore no te mea noa e hoo-mama-hia ra e 1500 F e toru atoa ra.

E nehenehe atoa tatou e fifihia na roto i te huru anairaa o te mau maa i roto i te fare toa. I te hopea o te aroa, i reira te taata hoo e tapea ˈi, e ite-pinepine-hia te mau monamona e te mau taoˈa moni rahi i mua noa i te mata. A faaau atu ïa i to ratou tino moni e to te mau taoˈa e vai ra i nia aˈe e aore ra i raro aˈe i te mau paepae.

E nehenehe atoa te mau titeti hoo-mama-raa e faaiti mai i te mau haamauˈaraa, e turai atoa ra te reira i te hoo-rahi-raa. I te fenua Etats-Unis, ua neneihia hau atu i te 90 milia titeti i te matahiti 1980 anaˈe ïa. E rave rahi te mau taata e hoo ra i te mau taoˈa no taua noa titeti hoo-mama-raa tei horoahia ˈtu. Eiaha e moehia ia outou e: e faaiti mai te mau titeti hoo-mama-raa i ta outou mau haamauˈaraa mai te peu e hoo mai outou i te mau taoˈa e hinaaro-mau-hia ra e outou e o ta outou e faaohipa tamau. E hoonahia outou i te hooraa mai i te hoê taoˈa — noa ˈtu te iti o to ˈna moni — mai te peu iho â râ mea faufaa mau no outou.

A ara ia haafatata ˈtu outou i te vahi aufauraa. Ua ape paha outou e rave rahi mau herepata, teie râ, e mau auri outou i teie nei: e tiai outou. Eaha te mea hiaai-rahi-hia o ta outou e ite ra? Te mau monamona, te mau vea e te mau hauti ta te mau tamarii e haru mai e e tuu ma te huna i roto i te pereoo vairaa tauihaa. E pinepine outou e ite i te reira e ua maoro roa. Peneiaˈe ua aufau aˈena outou i te reira, aore ra e faaruru atu outou i te hoê tamarii o te hinaaro mau ra i te reira. Ua manuïa ïa te fare toa!

E nehenehe atoa ra outou e manuïa. E nehenehe te feia tei ite maitai i te hoo e faatura i te moni ta ratou i faataa e tae roa ˈtu i te faaherehere i te moni. E tia anei ia outou ia taui i ta outou huru hooraa. A imi i te mau hebedoma atoa i te mau ravea apî no te hooraa mai ma te faaitiraa i te mau haamauˈaraa. E faufaahia ta outou utuafare e o outou atoa hoi.

[Tumu parau tarenihia/Hohoˈa i te api 14]

Ua ite anei outou:

I te rahiraa o te taime no te aha ua tuuhia te mau maa e hinaarohia i te mau mahana atoa i te atea roa i te vahi aufauraa?

Nafea te tamarii e haafifi ai i to ratou mau metua i roto i te mau fare toa?

Eaha te taime tano aˈe no te hooraa mai i te mau aahu?

[Hohoˈa i te api 15]

A faaau i te mau taoˈa e vai ra i raro aˈe e i nia aˈe i te mau paepae. Te mau taoˈa moni rahi roa ˈˈe tei mua noa ïa i te mata.