Eaha te ravea no te ora-maoro-raa?

E FEA maororaa matahiti ta outou e hinaaro ra e ora? E rave rahi mau taata no te mau fenua ona o te pahono mai e: “Ia raeahia te 70 aore ra te 80 matahiti.” “Ia raeahia fatata 100 matahiti”, te pahonoraa papu ïa a te huiraatira no te Repubilika rusia no Abkhazie (e parahi ra i te hiti o te miti Ereere) i nia i te hoê papai vea a te National Geographic.

Eaha te tahi o te mau tumu e tauturu ra i te ora-maoro-raa? Te manaˈo ra o Yuri Dadivanyan, faatere ohipa a te hau no te Rapaauraa i te ruhiruhia no Aramenia i te pae no te oraora-maitai-raa, te tumu rahi o te ora-maoro-raa o te mea ïa ta to tatou mau tupuna i horoa mai no tatou. Tera râ, te faahiti ra o ˈna i te tahi atu â tumu. “E mea faufaa roa ia rave tamau i te ohipa, ta ˈna ïa i parau. Te rahiraa o te feia matahiti rahi te tamau noa nei â ïa i te rave i te ohipa ia au i te tia ia ratou i muri aˈe i te mau tau faatuhaaraa, noa ˈtu e aita ratou e hepohepo ra i te pae no te moni.”

Te parau faahou ra o ˈna e: “Mea faatura-roa-hia te mau taata matahiti rahi i Aramenia. Mea haafaufaa-roa-hia te mea ta ratou i ite i roto i to ratou oraraa. (...) Te faaturaraa i te feia matahiti rahi e to ratou upoo uouo, e haapii ïa te taata taitahi i te reira i te tamarii-rii-raa ra, peneiaˈe na te reira e tauturu i te feia ruhiruhia ia tapea noa i to ratou tura e te feruriraa mai te taata apî ra te huru.”

Te faaite ra te hoê manaˈo anaanatae e vai ra i roto i te National Geographic i faahitihia i nia nei e: “I roto i teie e toru oire [i reira te faatupuraahia teie titorotororaa no nia i te ora-maoro-raa] aita i faahepohia te hoê matahiti no te faatuhaaraa; aita te feia ruhiruhia i vaiihohia i te hiti mai te ravehia ra i roto i te rahiraa o to tatou totaiete ona.”

Te parau ra te Bibilia no te oraraa i mua nei, te hoê oraraa maoro roa ˈtu â; te parau ra oia no te “mau mahana maoro e ore roa e mure ra”. (Salamo 21:4.) Te ora mure ore i nia i te fenua nei i roto i te mau tupuraa maitatai roa, ua fatata roa ïa i te tupu. — Apokalupo 21:1-4; Luka 21:10, 11, 25-33.

[Hohoˈa i te api 22]

E toru taata e rave tamau noa ra i te ohipa no te pu o te ao nei a te Totaiete Watch Tower, mai te 80, te 92 e te 88 matahiti.