Te faatuhaaraa: te hoê opani e aratai atu i te hoê ohipa rahi?

¹ Te tiai ru nei e rave rahi taata o te haa rahi ra i te mahana e matara ˈi ratou i te mau faaheporaa a te ohipa noa. E pinepine roa râ te faatuhaaraa i te tuea e te tâuˈa ore, te haumani e te ruhiruhia-oioi-raa. Aita anaˈe e ohipa faufaa, e nehenehe te feruriraa e hoˈi i nia i ta ˈna iho mau haapeapearaa. Ua faaite te hoê vea Beresilia e ua amuamu te tahi mau taata toroa faatuhaahia no nia i te mau fifi mai ‘te mauruuru ore, te riri, te panaˈonaˈo e te ereraa i te ihotaata e tae atu i te ahoaho e i te manaˈo e aita to to ratou oraraa e fa.’

² Area te mau Kerisetiano e rave rahi râ, te hiˈo ra ïa i te tuhaa apî o to ratou oraraa mai te hoê opani e aratai atu i te hoê ohipa pae varua rahi. Ua faahiti te hoê taeae o tei riro ei pionie e piti hebedoma i muri aˈe i te 65raa o te matahiti e: “Aita vau i ite aˈenei i te mau tau i haamaitai-mau-hia i na matahiti hoê ahuru a rave ai au i te taviniraa pionie.” Ua papai na hoa faaipoipo e: “Ua haamata ta mâua pue matahiti mau faufaa roa i to mâua riroraa ei pionie.” Oia mau, no e rave rahi, e ravea faufaa roa te faatuhaaraa no te faarahi atu â i ta ratou taviniraa e no te fanaˈo i te mau haamaitairaa e rave rahi a Iehova.

³ Te hoê ohipa rahi e te hotu: Ua paari te mau taata faatuhaahia e rave rahi ma te fanaˈo ore i te mau maitai apî o te oraraa no teie tau e ua haapii oioi roa i te haa puai. Noa ˈtu e aita to ratou e itoito faahou o te 20raa o to ratou matahiti, e mau rave ohipa hotu roa noa ratou. I roto i te tuhaa fenua a te hoê amaa, e 22 % o te mau pionie, fatata e 20 000 taeae e tuahine, e 60 matahiti e e hau atu to ratou. E tuhaa faufaa roa ta tera mau hoa ruhiruhia i roto i te pororaa. Te faufaahia ra te mau amuiraa i reira ratou e haa ˈi maoti to ratou aravihi e to ratou mau huru maitatai e au i te hinaaro o te Atua.—Iak. 3:17, 18.

⁴ Ma te haa rahi i roto i te taviniraa Kerisetiano, e fanaˈo tatou i te hoê ea e te hoê huru oraraa maitai aˈe. Teie ta te hoê tuahine e 84 matahiti, o tei haamata i te taviniraa pionie a faatuhaahia ˈi oia, i parau: “Te mea i tauturu ia ˈu ia ohipa noa i te pae feruriraa, o te aratairaa ïa e rave rahi haapiiraa bibilia. Aita to ˈu e pereoo, e mea na avae au i te haere rahi. E atuatu te reira i te ea.” Teie te tatararaa a na hoa faaipoipo pionie ruhiruhia: “Na te taviniraa e faaitoito noa nei ia mâua i te pae feruriraa e i te pae tino. O mâua noa. E ata pinepine noa mâua oia hoi, mea oaoa mâua.”

⁵ Te taviniraa i te vahi e hinaarohia ˈi te tauturu: Ua reva ˈtu te tahi mau Kerisetiano faatuhaahia, aita to ratou e fifi i te pae moni, i te vahi e hinaaro-rahi-hia ˈi te mau taata poro i te Basileia. Ua faarahi te tahi atu i ta ratou taviniraa ma te haa i te poro i te tahi atu pǔpǔ taata reo ê. Mai te aposetolo Paulo, ‘no te evanelia e na reira ˈi’ tera mau taata poro itoito rahi ‘ia noaa atoa ia ratou i ta te evanelia ra.’—Kor. 1, 9:23.

⁶ Ua rave na hoa faaipoipo i te taviniraa pionie i muri aˈe i to raua aupururaa i ta raua na tamaiti e piti. I muri aˈe tau matahiti i roto i taua taviniraa ra, haapii ihora raua i te reo Tinito. I teie mahana, hau atu i te 70 matahiti, aita i maoro aˈenei, ua oaoa raua i te iteraa i te pǔpǔ reo Tinito ta raua e apiti i roto i te pororaa i te riroraa mai ei amuiraa. E haamaitairaa mau te mau taata faaipoipo mai ia raua!

⁷ Aita e faatuhaaraa i roto i te taviniraa: A faaea ˈi te rahiraa o te taata i ta ratou ohipa noa, eita roa ˈtu te mau Kerisetiano e faaea i te tavini i te Atua. E mea titauhia ia taiva ore noa ratou paatoa “e tae noa ˈtu i te hopea ra.” (Mat. 24:13, 14) Parau mau, a mairi ai te mau matahiti, eita te tahi pae e nehenehe e ohipa hau atu â mai i mutaa ihora i roto i te taviniraa ia Iehova. E mea faaitoito mau râ ia ite ia ratou ia rave i tei maraa ia ratou ma to ratou aau atoa! Te haapapu ra te Parau a te Atua ia ratou e eita Iehova e haamoe i ta ratou ohipa e i to ratou hinaaro i to ˈna ra iˈoa.—Luka 21:1-4; Heb. 6:10.

⁸ Mai te peu e e fatata outou i te faatuhaaraa, no te aha e ore ai e feruri i roto i te pure e nafea outou e nehenehe ai e haafaufaa hope i te tauiraa o to outou oraraa? Maoti te tauturu a te Atua, e ite paha outou e te aratai atu ra te faatuhaaraa i te hoê opani i te hoê ohipa rahi o te arue ia Iehova e o te horoa i te mau haamaitairaa e rave rahi.—Sal. 148:12, 13.