Te mau maˈi horiaria noa — E mau riaria tei parare roa
“I to ˈu tomoraa ˈtu i roto i te piha taniuniuraa, ua tupu taue ihora te hoê manaˈo mehameha rahi i roto ia ˈu. E tia mau ia ˈu ia haere vau i rapae. Ua turai atura vau i te opani, e, i te mea râ e ua hape au i te pae ta ˈu i turai atu, aita ˈtura ïa te opani i matara. No to ˈu riaria rahi, ua haamata ihora vau i te paraˈu haere, i te tue e i te tuô. Aita vau e ite faahou ra i te ohipa ta ˈu e rave ra. Ua rûrû noa vau e mai te huru ra e ua pohe roa to ˈu avae. Tei roto vau i te hoê marei. I to ˈu hiˈoraa, mea maoro roa ïa taua ohipa nei i te tupuraa — te mea mau râ, aita hoi i raeahia e pae minuti to ˈu faaearaa i roto i taua piha nei.
“I to te hoê taata tatararaa mai ia ˈu, ua horo ihora vau e hiˈo i to ˈu taote. Ua rave ihora oia i te tahi mau tamatamataraa i nia ia ˈu e i muri aˈe, ua ite mai oia e e claustrophobie to ˈu, oia hoi te riaria i te mau vahi opanipanihia. Ua parau mai oia e ua roohia vau i te hoê mataˈu rahi taue o te ite-pinepine-hia. E maha matahiti i muri aˈe, te tutava noa râ vau i te aro atu i to ˈu maˈi horiaria noa, te hoê riaria tei riro ei tuhaa no to ˈu oraraa i teie nei.”
Phobie (maˈi horiaria): Te hoê mataˈu rahi roa i mua i te hoê tupuraa aore ra i te hoê taoˈa taa maitai. “E nehenehe e faataa-ê-hia te mau maˈi horiaria noa matau-noa-hia, oia hoi te mau mataˈu rahi roa i te mau mea ta te rahiraa o te mau taata e riaria nei, mai te pohe, e te mau maˈi horiaria noa taa maitai, oia hoi te mau mataˈu i te mau mea e ere iho â i te mea riaria, mai te mau vahi mahorahora maitai aore ra te mau ascenseurs. I roto i te rahiraa o te mau tupuraa, no roto mai te mau maˈi horiaria noa i te manaˈo tapitapi rahi. I te mea e te manaˈo ra oia e ua rave oia i te ‘ino’, riaria ˈtura ïa te taata e maˈi horiaria noa to ˈna, ia ‘roohia oia’ i te hoê mea. E pata ˈtu oia i to ˈna haapeapearaa i nia i te hoê tupuraa no rapae mai ia ˈna, ta ˈna e manaˈo e e tia mau iho â ia ˈna ia ape.” — Buka aratai no te pae rapaauraa hope roa (beretane), a B. Miller.
E NEHENEHE te riaria e te mataˈu rahi tei faatupuhia mai e te hoê maˈi horiaria noa, e riro ei mea mehameha roa, mai ta te faataaraa a teie vahine, o Hélène te iˈoa, e faaite maira. I roto i to ˈna fenua, te fenua Marite, fatata e 22 mirioni taata tei roohia i te mau maˈi horiaria noa, oia hoi hoê taata i nia i te ahuru. I te fenua Beretane, te parauhia nei te numera ra e maha mirioni. Teie râ, aita te mau maˈi horiaria noa atoa, noa ˈtu e mea ino roa, e faaite-pauroa-hia nei aore ra e rapaauhia nei. E rave rahi mau taata teie e ora nei e to ratou riaria ma te ore e faaite atu i te hoê noa ˈˈe taata. Peneiaˈe, mai te reira atoa outou?
Te vai ra e hia huru maˈi horiaria noa taa ê? Ua taiohia fatata e 300, teie râ, e nehenehe faahou paha e faaroa ˈtu â i te tabura aita e hopearaa. E faatupu noa te tahi mau maˈi horiaria noa i te mataˈu iti haihai e e ere atura ïa i te mea ino roa. Teie râ, e nehenehe te tahi atu mau maˈi horiaria noa e faahuehue roa i te hoê oraraa. Mai te peu e mai te reira te huru, e tia ïa i te utuafare fetii, i te mau hoa e i te mau hoa rave ohipa o te taata maˈi, ia faaite rahi atu â ia ˈna, i te manaˈo taa maitai e te hoê haapao maitai tei î i te here.
Na te aha e faatupu mai i te mau maˈi horiaria noa? E nehenehe anei te hoê ohipa e ravehia ia ore te reira e tupu mai? Te vai ra anei te hoê tiaturiraa e ora ˈi i taua maˈi ra?