“O vai te nehenehe e rave i te ohipa na roto i te tahoê?”

Aita i maoro aˈenei, ua patu te mau Ite no Iehova i te hoê Piha no te Basileia na roto i te hoê ravea vitiviti i Tiverton, i roto i te Rhode Island (Fenua Marite). I raro aˈe i te upoo parau papai-faahou-hia i nia nei, ua faatia te hoê orometua haapaoraa no taua vahi ra no nia i to ˈna haereraa e hiˈo i te vahi raveraa ohipa. Teie te mea faufaa ˈˈe o ta ˈna i parau:

‘UA faaroo vau i te mau parau maere no nia i te hoê fare pureraa o te hamanihia ra i Fish Road. Ua parauhia e e patu e 500 taata i te reira i roto i te roaraa e piti mahana. Ua haere au i reira no te haapapu i teie mau parau. Fatata 1 500 taata tauturu te rave ra i te ohipa i nia i te vahi raveraa ohipa — te mau tamuta, te feia tamau auri pape, te feia tamau uira, te mau tamuta raau, te feia tamau hiˈo, te feia faanehenehe i te fenua, te feia parai i te puˈa, te feia haapao i te pae no te haaveavearaa i te fare, te mau taata patu e oia atoa hanere mau taata rave ohipa e mau taata tauturu.

‘Ua faanahohia te mau pereoo rahi na te hiti o te fenua 1,2 tâ i te aano. Ua tamauhia te hoê iri piaraa parau papaihia “Taoˈa iteahia mai” i nia i te hoê o taua mau pereoo rahi ra. Ia moe noa ˈtu ta te hoê taata tauihaa, e tia ia ˈna ia haere atu e tii i reira. Te feia e tae mai ma te ahu mâ e te hinaaro e rave i te ohipa, e nehenehe e noaa mai ia ratou te mau ahu ohipa e te mau taupoo paari no te vahi raveraa ohipa, i roto i te hoê pereoo ê atu. Ia pêpê noa ˈtu te hoê taata, aore ra ia hinaaro oia ia rapaauhia oia, e tia ïa ia ˈna ia haere atu i te hoê pereoo rahi faataahia no te mau tauturu matamua.

‘I roto i te hoê fare ie rahi omenemene, faatiahia i muri mai i te vahi raveraa ohipa, te opere nei te mau tane e te mau vahine, i roto i te hoê taime 15 minuti, i te maa no na 1500 rave ohipa. Te haere e te hoˈi noa maira te tahi mau vahine e ta ratou mau farii pape a pîpî haere noa ˈi i te repo eiaha ia puehu, e ua na reira noa ratou i taua mahana taatoa ra. A patiti-noa-hia ˈi te mau iri raau, tae noa mai te feia peni no te peni atu i te reira. Mea iti roa i roto ia tatou tei ite aˈenei i te hoê faanahonahoraa mai teie te huru.

‘Ua parau te mau raatira ohipa atoa no taua vahi ra e e ore roa e nehenehe e faatupu i te reira. Tera râ, ua faatupu teie mau taata i te reira e ua ite mata roa ˈtu vau. O vai ma te reira? Te mau Ite no Iehova, e te fare pureraa, o te hoê ïa Piha no te Basileia. Oia mau, ua tito ratou i te niu o te fare na mua ˈˈe, tera râ ua patu-mau-hia te toea o te fare i roto i te hoê area e piti mahana. Aita vau i faaroo i te hoê noa ˈˈe tuhi, aita atoa te hoê noa ˈˈe tatamaˈiraa. E haerea maere mau to teie mau taata. E rave noa ratou i ta ratou ohipa na roto i te mǎrû mau. E faaoioi noa ratou i te ohipa i te mau vahi e hinaarohia, eita râ e haamauˈa noa i to ratou taime na roto i te paraparau haere.

‘Te hoê ohipa o te haapeapea nei ia matou na roto i to matou tiaraa Unitariens-Universalistes, te mea ïa eita matou e manuïa i te faahaere rahi mai i te feia Ereere e te taata no te mau nunaa êê e te mau fenua êê. I nia i teie vahi raveraa ohipa, ua ite au e rave rahi mau taata Ereere e te taata êê atoa, o tei rave apitipiti i te ohipa mai te huru ra e e melo ratou no te hoê noa utuafare. Ua haere mai ratou mai te mau vahi atoa no Nouvelle-Angleterre e mai te tahi atu â mau vahi. Ua riro ratou ei pupu taata no te mau nunaa atoa, e feia apî te rahiraa o ratou, o te rave nei i te ohipa ma te anaanatae maitai.

‘Aita vau i imi rahi i te haamaramaramaraa no nia ia ratou no te mau faahaparaa o tei papaihia aore ra tei parauhia no nia ia ratou. Tera râ e mau ohipa papu anaˈe ta ˈu i ite i nia i ta ratou vahi raveraa ohipa. Aita aˈenei au i haapao atu i teie mau taata o tei haere mai e patoto i to ˈu opani e hia roaraa matahiti, tera râ ia papu ia outou mai teie atu nei, e farii vau ia ratou ma te tura mau e te umere atoa.

‘Ua itea mai au e, ua tapiri noa te rahiraa o tatou i to tatou nei feruriraa, no to tatou ite ore e no te mau manaˈo oti noa, i mua i te mau manaˈo e te mau feruriraa apî. Te manaˈo nei au e mea tia ia tatou pauroa ia rave i te hoê taime no te anaanatae atu i te feia e hemo nei ia tatou i roto i te hororaa. E faahuru ê mai te poiri e te mataˈu ia tatou hou tatou e haamata ˈi i te faaroo i te hoê taata. E mea papu mau te reira no nia i te mau Ite o te rohi nei ia rahi ta ratou ohipa e o te faaite nei i te anaanatae mau.

‘Ahiri ratou i hoo mai i teie fare oti noa — e te piha i raro i te fare e te mau ohipa atoa e hinaarohia i roto i te fare — e tae roa te moni hoo i te 500 000 moni marite [fatata e 3 300 000 moni farani. Te ui nei au ia ˈu iho e, i roto i to tatou mau pupu unitariens-universalistes e te mau peu tumu no Nouvelle-Angleterre, e tamata anei tatou i te hoê mahana i te faatupu atoa i te hoê ohipa mai teie te huru. Ia feruri na outou, outou e au nei i te mau putuputuraa tomite haapaoraa e te mau oreroraa parau rahi. Oia mau, a feruri atu i te reira!’