E “maramarama” anei to ratou?

E HAERE te otuu e taiˈa e te hoê huruhuru manu i roto i te vaha. Ia ite anaˈe oia i te hoê iˈa i roto i te anavai iti, e faarue ïa oia i ta ˈna arainu i roto i te pape. E haere mai te iˈa tei vare roa i nia i te pape e i reira e haru oioi mai ïa te otuu i ta ˈna maa — auê ïa manu taiˈa aravihi mau e!

Te haapapu maira anei te reira e mea maramarama oia? Ia au i te hoê parau faataa aivanaa, te maramarama, oia hoi ïa, “te aravihi no te ite e te vai mau ra oia mai te hoê tuhaa i roto i te hoê vahi taa maitai, no te rave mai e te haaputu i te ite, no te huti mai i te haapiiraa na roto i te mau ohipa i ravehia aˈenei, no te faatitiaifaro i te mau fifi e no te faaau ia ˈna iho ma te manuïa, i te mau tauiraa e tupu mai”.

Mai te mea râ e, ua nehenehe te otuu e huti mai i te haapiiraa na roto i te mau ohipa i ravehia e ana e e faatitiaifaro i te hoê fifi. No reira ˈtura, ia au i teie faataaraa, e parau mai ïa vetahi pae e “mea maramarama” oia. Te vai râ ia ratou ra te tahi mau hiˈoraa mai teie atoa te huru:

Mai te huru ra e e manu “maramarama” atoa te manu meli. Ua tuatapapa maite o James Gould, taata maimi i te haapiiraa tuatoru no Princeton, i te huru raveraa a taua manu iti ra. No te tamata i to ratou “maramarama”, ua tuu atu oia i te maa i pihai iho i te mau manu meli e, a faaatea ˈtu ai i teie maa i te taime a hoˈi ai ratou i to ratou afata. I te mau taime atoa, e faarahi atu â oia i te atearaa o te maa i te afata e hoê faito i nia i te maha. Aita i maoro i muri iho, ua maere roa oia i te mau manu meli. Oia mau, ua ite atu oia ia ratou ia ohu noa i te vahi mau i reira oia e tuu atu ai i te maa i te taime i muri iho.

Noa ˈtu â ïa, te manaˈo nei o James Gould e ua taaihia te rahiraa o te mau raveraa maramarama a te mau animala i te instinct, oia hoi te hoê huru no roto noa iho ia ratou o te turai ia ratou ia rave i te tahi mau ohipa taa maitai ma te feruri ore. Nafea ˈtura ïa oia i te faataaraa e ua nehenehe i te mau manu meli e huti mai i te hoê faahopearaa no roto mai i te mau ohipa i tupu na mua ˈˈe? Ua pahono mai oia e: “Aita vau i ite, e te parau mau, mea au aˈe ïa na ˈu mai te peu e aita ratou i manuïa i te reira!”

Noa ˈtu â ïa e te ohipa ra te mau animala ia au i te “maramarama” aore ra ia au i te aravihi parauhia e instinct, te vai noa nei â teie uiraa: No hea mai to ratou ite? Noa ˈtu e te farii nei oia e aita o ˈna i ite, ua haapoto mai o James Gould i to ˈna manaˈo na roto i teie mau parau: “E nehenehe ta te tupu-noa-raa te mau mea na roto i te hoê ravea manaˈo-ore-hia e faanaho mai i te mau huru raveraa fifi roa ia faataa, i roto i te mau roro nainai roa.” E ere anei râ i te mea tano aˈe ia parau e ua tupu mai teie mau huru raveraa “maramarama” ia au i te hoê opuaraa maramarama eiaha râ ia au i te hoê tupu-matapo-noa-raa o te mau mea? Te apiti nei te Bibilia i te huru raveraa a te mau manu i te Poiete iho, i te na ôraa e: “A ui na râ i te mau puaa, e na te reira e haapii mai, e te mau manu o te reva nei, e na te reira e faaite mai ia oe; o vai te ore i ite i taua mau mea ra e na te rima o te Atua teie i rave?” — Ioba 12:7, 9; hiˈo Maseli 30:24-28.

Eaha ta teie mau animala e parau mai mai te peu e e nehenehe ta ratou e paraparau mai? Teie ïa: ‘E nehenehe ta te Poiete e faanaho mai i te mau huru raveraa fifi roa ia faataa, i roto i te mau roro nainai roa.’ I to ratou aˈe pae, ‘mea au aˈe [na te feia e turu nei i te haapiiraa no te tupu-noa-raa te mau mea atoa] mai te peu e eita te mau animala e manuïa’ i te faatupu i te mau mea faahiahia mau, teie râ, te parau nei te Bibilia e, no ô mai te ite (tei haapiihia mai e ratou aore ra no roto noa iho ia ratou) o taua mau animala ra i Tei hamani ia ratou, oia hoi te Atua ra o Iehova. — Genese 1:20-22; Roma 1:20.