Te piti o te aroraa i te mariri ai taata

Ua haamaere roa o Jeff Blatnik, aito no te mau hautiraa olympique no te pae aroraa, i to te ao no te ohipa taaro, i muri aˈe i to ˈna oraraa mai i te mariri ai taata (te maˈi no Hodgkin), i to ˈna noaaraa i te fetia piru no te aroraa heleni e italia i te matahiti 1984. I muri aˈe râ i te reira, ua tupu faahou mai to ˈna mariri ai taata. Eaha to ˈna huru i reira?

Te faˈi nei oia e ua taˈi oia. Teie râ, ua opua oia e aro faahou â i te mariri ai taata. “Ua parau vau ia ˈu iho e: ‘Inaha, ua upootia vau i te reira i te taime matamua, e tamata faahou â ïa vau.’” Ua parau faahou oia e: “E au ra e ua haamata apî faahou vau. Ua rave au i taua mea ra mai te hoê aroraa. E au noa te mariri ai taata i te hoê tupuraa apî e tia ia faaruru atu.”

Ua rapaauhia o Jeff na roto i te chimiothérapie, rapaauraa te horoa pinepine mai i te mau faahopearaa au ore. Ua parau râ oia i te pae hopea e: “Tei roto te mau mea atoa i te feruriraa, aore ra fatata roa i te mau mea atoa; tae roa atoa i te mau faahopearaa no te chimiothérapie. Ua hinaaro hua vau eiaha e maˈihia, aita vau i maˈihia. Eita e titauhia ia riro ei aito no te mau hautiraa olympique no te hinaaro hua mai teie. (...) E tia i te mau taata ia ite e e nehenehe e ora mai i te mariri ai taata.” — The New York Times, 8 no eperera matahiti 1986.