Te tamahanahanaraa no te feia hara tei tatarahapa

AITA ANEI outou i rave aˈenei i te hoê hape ino mau e, i muri iho, a tatarahapa hohonu ai i to outou haerea tia ore? E nehenehe atoa te feia e tavini nei i te Atua e rave rahi taime i teie nei, e farerei i teie huru tupuraa. Ei hiˈoraa, ua faaturi o Davida, te arii no Iseraela; no te mea râ e ua faaite oia i te tatarahapa ma te aau mehara, ua farii maira te Atua i ta ˈna tatarahaparaa e ua turu maira ia ˈna i roto i te mau matahiti fifi mau ta ˈna i farerei i muri iho. — Samuela 2, 11:2-4; 12:13.

I hea e itehia ˈi ia outou te tauturu e te tamahanahana ia rave anaˈe outou i te hoê hape ino mau i te pae morare? E nehenehe e itehia te pahonoraa i roto i te hiˈoraa o teie vahine tei haamata i te haapii i te Bibilia e te mau Ite a Iehova i te taime a farerei ai oia i teie huru tupuraa. Te faatia ra oia e:

“Eita roa ˈtu e nehenehe e parauhia e e feia faaroo to ˈu nau metua. E faahapa pinepine to ˈu metua tane i te huru haavare ite-maitai-hia a te mau haapaoraa ta ˈna iho i tuatapapa maite. Ua aˈo mai râ oia i ta ˈu na taeae matahiapo toopiti e ia ˈu iho ma te tauturu mai ia matou ia riro matou ei taata paari faaturahia. Oia hoi, ua matau to ˈu papa i te tauaparau rahi e o vau iho nei. E faataa mai oia ia ˈu e te oaoaraa o te mau taatiraa o te tino, na te feia faaipoipo anaˈe ïa. E taata maitai roa oia; mai te huru ra ïa e e rave rahi te mea i erehia i to ˈu utuafare a pohe ai oia i te matahiti 1967.

“E ono matahiti i muri iho, ua haamata ihora vau i te haapii i te Bibilia e te mau Ite a Iehova. Tera râ, tau hebedoma noa i muri aˈe, ua reva ˈtura vau i te fenua Beretane no ta ˈu ohipa, e ua faaea ˈtura vau i ta ˈu haapiiraa. I ta ˈu vahi raveraa ohipa, ua here ihora vau i te hoê hoa rave ohipa e e hoa rahi atoa hoi no ˈu; i muri aˈe, ua ani maira oia ia ˈu ia faaipoipo mâua.

“Eaha râ te ohipa e tupu ia farerei te hoê tane e te hoê vahine faaipoipo-ore-hia, tei here hohonu te tahi i te tahi, raua anaˈe iho i roto i te hoê piha hotela faaunauna-maitai-hia, ma te hauˈa o te tiare, te mori haamohimohihia, te upaupa e taˈi marû noa ra e hau atu i te reira, te mau huru uaina monamona atoa na raua? A tahi, e horomiri ïa raua, i muri aˈe, e apa ˈtu ai, e na reira noa e tupu oioi atu ai te tahi ohipa ê atu. E, ma te feruri ore...

“I taua tau ra, aita iho â vau i ite i ta te Bibilia e parau ra no nia i te taatiraa pae tino i rotopu i te feia faaipoipo-ore-hia, ua taa rii râ ia ˈu e aita ïa oia e farii maitai ra i te reira. Tera râ, te haamanaˈo maitai ra vau i ta to ˈu mau metua i haapii mai ia ˈu. Rahi noa ˈtura to ˈu haava manaˈo i te faahapa mai ia ˈu. Ua haamâ roa ïa vau e ua inoino roa vau ia ˈu iho. Fatata e piti hebedoma to ˈu peapea-noa-raa, e aita vau i nehenehe e tapea faahou. Aita roa ˈtu vau e ite faahou ra e eaha to ˈu tiaraa i mua ia Iehova, te haapeapea ra hoi te reira ia ˈu.

“I te pae hopea, ua faaitoito vau e ua faanaho vau no te tauaparau e o Robin, te hoê hoa no ˈu no te mea ua haamata faahou vau i ta ˈu haapiiraa bibilia e ta ˈna vahine tau taime na mua ˈˈe. O Robin, e kerisetiano Ite a Iehova ïa oia e e matahiapo hoi i roto i ta ˈna amuiraa. Aita vau e ite e no te aha ra vau e hinaaro ai e faaite i ta ˈu mau hape. Inaha, aita roa ˈtu vau i faariro ia ˈna mai te hoê perepitero. Teie râ, te turai ra te hoê mea ia ˈu ia imi i te aratairaa e te aˈoraa i pihai iho ia ˈna.

“Ua faaroo maitai mai o Robin ia ˈu, ma te faaoromai, a faatia noa ˈi au i te mau mea atoa e haapeapea ra ia ˈu. Ua horoa mai oia i te hoê horoi no te tamârô i to ˈu roimata. Ua faaea mamû noa oia i te hoê taime, tei riro no ˈu ei taime roa roa, e i muri iho, ua parau maira oia e:

“‘Tamahine here e! Aita anei oe i ite e te haapao maira Iehova ia oe? Ua ite au e e itoito mau e e haehaa to oe no te haere mai e farerei ia ˈu. E mea varavara roa teie mau huru maitai, e, mea varavara mau. Ua papu maitai ia ˈu e e nehenehe te Atua e faaohipa i te hoê vahine mai ia oe te huru, ia tavini oe no ta ˈna mau opuaraa. Parau mau, aita vau e parau ra e mea maitai te ohipa ta oe i rave, no te mea e mea ino iho â. A hiˈo anaˈe na tâua i ta te Bibilia e parau ra no nia i to oe fifi, e ia manaˈo vau, e faaitoito e e haapuai te reira ia tâua. E farii anei oe?’

“Eita roa ˈtu e moehia ia ˈu te irava bibilia matamua ta Robin i faahiti. Mea fifi roa na ˈu ia taio, inaha e tahe noa to ˈu roimata. Te parauhia ra e: ‘E teie nei, e faaore atu outou i ta ˈna hara, e e haamahanahana ˈtu e tia ˈi, o te horomii-noa-hia taua taata ra e te oto rahi.’ (Korinetia 2, 2:7). I roto i te mau hebedoma hopea i to ˈu faaearaa i Lonedona, mai teie ïa te huru ta Robin e ta ˈna vahine horoa-noa-raa mai i te mau aˈoraa bibilia e te hoê haapiiraa faufaa mau.

“Ua faataa vau i te tane o ta ˈu i here i te mau faaotiraa ta ˈu i rave no te faaau i to ˈu oraraa i te mau ture a te Atua no nia i te vai-mâ-raa i te pae morare, e aita roa ˈtu vau i huna ia ˈna i to ˈu hinaaro ia riro mai ei Ite a Iehova. Ua farii oia i ta ˈu opuaraa ma te feaa piti te manaˈo e ma te taa ore rii hoi.”

Aita i maoro roa, ua bapetizo ihora taua vahine ra ia ˈna ei Ite a Iehova. Noa ˈtu e te here hohonu noa râ oia i taua taata ra, ua haapapu oia ia ˈna e eita oia e faaipoipo mai te peu e eita oia e riro atoa mai ei tavini no te Atua ra o Iehova. No te mea hoi e aita taua taata ra i haere noa ˈˈe i mua i te pae varua, ua faarue atura oia ia ˈna. E i muri iho, ua rave oia i te taviniraa pionie, aore ra taviniraa taime taatoa. Ua tupu te reira ahuru matahiti i teie nei, e e pionie tamau noâ oia e tae roa mai i teie mahana.

[Parau iti faaôhia i te api 32]

“A tahi, e horomiri ïa raua, i muri aˈe, e apa ˈtu ai, e na reira noa e tupu oioi atu ai te tahi ohipa ê atu.”