Hamaniraa fare e maha mahana te maororaa i te fenua Trinité
“MAI TE PEU e nehenehe ta outou e hamani i teie fare pure e maha mahana i te maororaa, e horoa ˈtu vau na outou te pape paari atoa ta outou e hinaaro, e ma te tamoni ore!” Te manaˈo ïa o taua taata hoo pape paari ra a faaroo ai oia e te faaineine ra te amuiraa a te mau Ite no Iehova no taua vahi ra, i te hamani i te hoê Piha no te Basileia na reira, e e maha mahana noa i te maororaa. Ua ineine oia i te parie e eita e oti ia ratou. Aita anei te reira i tupu i te fenua Trinité, e mea matauhia hoi i reira te mau ohipa taere? I te tahi aˈe pae, e 72 anaˈe melo i roto i te amuiraa no Siparia. No te mea hoi eita te mau Ite no Iehova e parie, ua hoo maira ratou i te pape paari navai maitai no te horoa ˈtu i te pape toetoe na na 300 rima tauturu e ua haere atoa ˈtura ratou e rave i te ohipa. — Isaia 65:11.
E nehenehe anei ta ratou e amo i taua hopoia ra? O ta ratou hoi i manaˈo. E ono avae to ratou faaineineraa i teie opuaraa. Ua haamouhia te mau niu hoê avae na mua ˈˈe, i muri aˈe i te tahi mau ohipa tamaumauraa i te mau auri pape e te uira. Area no te mau tauihaa e hinaarohia no te hamaniraa fare, ua tae ïa te reira i nia i te vahi ohiparaa.
Ua haamata te ohipa i te po mahana pae 17 no me 1985, a haere mai ai hau atu i te hoê hanere rima tauturu i nia i te vahi ohiparaa, e te reira ma te mataitaihia mai e te feia tapiri. I te mahana maa i te aahiata, ua tia te mau raau tapoˈi fare; ua haamata te mau tamuta i te faatia i te mau ofai araea e te feia ato i te tuu atu i te tapoˈi fare. I te hora ahuru ma piti, ua oti teie tuhaa; ua tamaumauhia te tuhaa haaparareraa reo e te faaite ra te hoê iri piaraa parau ma te tiaturi e te haapao maitai e:
Hamaniraa o te hoê Piha o te Basileia
Maororaa manaˈohia: e 4 mahana
18, 19, 25, 26 no me
O vai ïa teie mau taata rave ohipa? No roto mai te feia rave ohipa i te mau tiaraa totiare taa ê roa. I ô nei, te peni nei te hoê taurearea taote ma te aravihi a te hoê taote tâpû. Eaha te nehenehe e parau no nia i taua vahine e hamani ra i te tahua oreroraa? O o ˈna anaˈe hoi te faaamu i to ˈna utuafare e e faahoro pereoo ta ˈna imiraa moni. Te rave ra te hoê tamuta fare e 40 matahiti to ˈna raveraa i teie toroa i te ohipa i pihai iho i te hoê taurearea tei roaa te parau tuite ra C.A.P. no te ohipa tamuta. Eiaha atoa ia moehia ia tatou i te tahi mau vahine e rave ra i te ohipa i te fare utuutu, te ô atoa ra hoi i te mau apoo faataheraa pape, te peni ra, te tanu ra i te matie, te amo ra i te mau ofai araea e te faarapu ra i te tima.
Mea nafea ˈtura ïa te mau taata i te hiˈoraa i teie ohipa? Oia hoi, i te taime a navai ore ai te pape, mai te huru ra ïa e eita e nehenehe e tamau noâ i te faarapu i te tima; inaha hoi, ua faatae mai te raatira o te feia tupohe auahi, tei faahiahia roa i ta matou ohipa, i te hoê tura pape na matou, e te reira e toru taime i te po. Ua aratai atoa mai oia i te tahi mau hoa ia ite atoa ratou iho i taua ohipa ra. I te tahi aˈe pae purumu, ua farii maite te hoê vahine ia vaiiho te mau Ite no Iehova i ta ratou mau tauihaa i to ˈna vahi. Ua tae mai oia i te putuputuraa matamua i tupu i roto i teie piha.
E to tatou taata hoo pape paari? I te piti o te mahana, aita e pape paari faahou. I to ˈna iteraa i te ohipa i oti aˈena, ua faaau atura oia i te moni i te mau Ite ia nehenehe ratou ia hoo te tahi atu â pape paari. Oia mau, i teie nei, e tiaturi oia e e nehenehe te mau Ite no Iehova e manuïa.