Te faatereraa nazi: o vai tei patoi atu ia ˈna?

“HEIL Hitler!” Te tapao aroha ïa i raro aˈe i te faatereraa a te IIIraa o te Reich. Ia au i te Frankfurter Allgemeine Zeitung, e rave rahi te feia “tei tuu na i nia i te Führer te mau auraa aai e faaroo atoa”. Ua riro atura taua tapao aroha ra ei auraa hau roa ˈˈe i te faatura e au no te hoê aratai. — Hiˈo Roma 13:7.

Ua haapapu atoa o Hitler e “e vai te Reich national-socialiste no te maororaa hoê tausani matahiti”. Ua riro atura oia ei enemi no te Mesia o te Bibilia, o Iesu Mesia, o tei tǎpǔ mai i te haamauraa i te hoê faatereraa e mana mai i nia i te fenua nei no te maororaa hoê tausani matahiti. — Hiˈo Apokalupo 20:4, 6.

I rotopu i te hau mutoi a Hitler, e mea fifi roa te faaite-tahaa-raa i to oe manaˈo patoi i te mau opuaraa a te pupu nazi. I te ite-maitai-raahia te mau ohipa ino a taua faatereraa ra e i te papuraa te pau i reira te mauruuru ore i riro mai ai ei riri rahi.

Ua ite-papu-roa-hia te patoiraa i te 20 no te tiurai 1944 ra, i te opuaraahia e taparahi pohe roa i te Führer. Te feia i rave i te reira, i mutaa iho ua turu na aore ra ua haa na ratou no te faatereraa nazi. I te 20 no tiurai 1984 ra, aore ra e 40 matahiti i muri mai, ua orero mai te faatere rahi no Heremani no te hoê oroa haamanaˈoraa i te feia i haapohehia aore ra tei hamani-ino-hia i muri noa mai i te opuaraa e haapohe ia Hitler o te ore râ i manuïa. Te faahiti-noa-hia nei â te parau no Hitler.

Te tiaraa o te upoo faatere haapaoraa

E te mau upoo faatere haapaoraa no Heremani? Ua patoi anei ratou ia Hitler e i te faatereraa nazi? Eaha te haerea o te mau upoo faatere katolika? Ua parau te papai vea ra Klaus Scholder no nia ia Konrad Graf Preysing, epikopo no Berlin e: “I taua tau ra, e epikopo o Graf Preysing no Eichstätt, o oia te hoê i rotopu i te mau taata varavara roa, i te haamataraa iho â i ite e mea ataata mau e te taparahi taata te faatereraa a te IIIraa o te Reich.” (Na matou e haapapu nei.) Ua patoi oia i mua i te taatoaraa. Ua mataˈu râ hoi tahi pae ra o te mau melo o te Apooraa Epikopo no Heremani, e to ˈna atoa peretiteni, te taradina Bertram, i te patoi atu i te faatereraa nazi. Ua turu ratou ia ˈna i te pae hopea. Te parau nei â o Scholder e: “Ia feruri-anaˈe-hia i teie huru auraroraa [ia Hitler e i te faatereraa nazi] e mea taa ore mau e o te ore roa e au ia faatiahia.”

I ǒ te mau porotetani, ua parau-noa-hia na te orometua Martin Niemöller mai te hoê enemi no te faatereraa nazi. Te haapapu nei râ te taata papai buka ra o H. Brebeck e “te uiraa hoê roa e faataa ê ra ia ˈna i te mau opuaraa politita a Hitler maori râ: ‘Na vai e faatere i te Ekalesia? Na te Ekalesia noa anei, aore ra na te pupu nazi?’ I te pae politita râ ua turu ïa ma te aau tae mau”. I te poheraa o Niemöller, i te matahiti 1984 ra, ua faahiti te Frankfurter Allgemeine Zeitung e: “Mai te taatoaraa o te mau tia porotetani o teie fenua, na mua ˈˈe ua farii oia i te faaapîraa tiai-maoro-hia o Heremani i raro aˈe i te aratairaa a Hitler.”

E faahiti atoa tatou i te tuatapaparaa maramarama i piahia e te Deutsches Allgemeines Sonntagsblatt no nia i te Apooraa baptiste no Europa, o tei tupu i te matahiti 1984 i Hambourg i Heremani. Te taiohia ra e: “A tahi ra i horoahia ˈi te mau haamaramaramaraa no nia i te tiaraa o te Ekalesia i te tau a faatere ai te IIIraa o te Reich. I teie nei, mea au aˈe na te feia no roto i te reira faaroo i te ape i taua tumu parau fifi ra. I te tupuraa râ taua tairururaa ra, teie te ‘faaiteraa manaˈo’ a te peretiteni rahi (...). ‘Aita mau â matou i faaite tahaa roa ˈtu i to matou patoiraa [i te faatereraa nazi] (...) e, aita atoa matou i faahapa ˈtu ma te papu maitai i te ofatiraahia te mau faaueraa a te Atua. Te tatarahapa mau nei matou i te toparaa ta matou pupu heremani i roto i te herepata o te manaˈo o te reira tau e o te ore hoi i itoito atu no te aro-uˈana-raa no te parau mau e te parau-tia.’”

Te haapapu mai nei te aamu e o te hoê noa pupu iti roa epikopo o tei patoi tahaa roa ˈtu i te faatereraa a Hitler. Ua patoi vetahi pae ia Hitler no to ratou mauruuru ore, aore ra no te huru politita e ravehia ra i roto i te Ekalesia, e ere râ no te mau tumu Bibilia. No te aha, ia au i te feruriraa o te tahi pae i rotopu ia ratou aita to te reira e inoraa i te fariiraa ia Iesu Mesia mai te Mesia a pii noa ˈi “Heil” i te hoê mesia politita haavare e i ta ˈna “faatereraa tausani matahiti”. Ua apee to ratou mau melo i to ratou haerea ino, viivii, e te tano ore i te mau Papai, ei ati no ratou iho. — Hiˈo Mataio 15:14.

Te feia o tei ore i turu anaˈe

I vai na râ i Heremani te hoê pupu kerisetiano o tei turu ma te itoito i te mau haapiiraa tumu o te mau Papai. Taua pupu ra o te mau Ite a Iehova ïa. Ua taa ê roa to ratou haerea i to te mau upoo faatere faaroo e ta ratou nana, ua patoi te mau Ite i te mau faaauraa atoa ia Hitler e i te pupu nazi. Aita roa ˈtu ratou i farii noa ˈˈe i te ofatiraa i te ture a te Atua. Ua faaite noa iho â ratou i to ratou tiaraa kerisetiano na roto i te amui-ore-raa ˈtu i roto i te mau huru politita atoa (hiˈo Isaia 2:2-4; Ioane 17:16; Iakobo 4:4). Aita atoa ratou i parau noa ˈˈe Heil, te tapao aroha ia Hitler, ia au i te hiˈoraa o te pae rahi o te mau ekalesiatiko e ta ratou nana.

I te parau noa na te mau Ite a Iehova mai te aposetolo Petero atoa i teie parau no nia ia Iesu Mesia e: “Aore roa hoi e ora ia vetahi ê, aita ˈtu hoi e iˈoa i faaitehia mai e te taata i raro aˈe i teie nei raˈi, e ora ˈi tatou nei.” (Ohipa 4:12; hiˈo atoa Salamo 118:8, 9; 146:3). Aita hoê aˈe i rotopu ia ratou i haaviivii noa ˈˈe ia ratou i te toto na roto i te mau tamaˈi a te nuu a Hitler, no te mea aita ratou i tavini i roto i ta ˈna nuu. — Ioane 13:35; Ioane 1, 3:10-12.

No to ratou amui-ore-raa ˈtu ia Hitler e tae noa ˈtu i te faatereraa nazi, ua hamani-ino-hia ïa te mau Ite a Iehova, e mau tausani tei hopoi-haere-hia i roto i te mau aua hamani-ino-raa. Te puairaa o to ratou tiaturiraa e to ratou haapao maitai i mua te mau huru raveraa haavî atoa, ua faaite-maitai-hia te reira e o Anna Pawe-l-czyńska, hoê vahine polonia tuatapapa i te huru o te taata nei e o tei ora mai hoi mai roto mai i te aua riaria no te pohe. Ua faataa oia i roto i ta ˈna buka Te mau faufaa e te haavîraa i Auschwitz (beretane), e “mea puai roa” te mau Ite a Iehova “i te pae o te manaˈo e ua upootia mai ratou i nia i te faatereraa nazi”. Te faaau nei oia ia ratou mai te “hoê motu patu-etaeta-hia i ropu i te hoê nunaa ahoaho”. Te parau nei â oia e: “Ua faaite atoa ratou i taua huru itoito ra i roto i te aua no Auschwitz. Ua noaa mai ia ratou te faatura o te tahi atu mau mau auri (...), tae noa ˈtu vetahi mau mau auri rave ohipa a te hau e tae noa ˈtu i te mau ofitie SS. Ua papu roa i te taatoaraa e eita te mau Ite a Iehova e rave noa ˈˈe i te hoê ohipa e faaturori nei i ta ratou tiaturiraa e to ratou mau manaˈo i te pae faaroo.” Ua faaoti oia e: “Ua maiti te mau Ite a Iehova i te eˈa o te patoiraa ma te rave-ore-raa i te mau mauhaa tamaˈi no ta ratou tiaturiraa, o te faahapa nei ïa i te mau huru tamaˈi e haavîraa atoa.”

Oia mau aita te mau Ite a Iehova i turu noa ˈˈe ia Hitler e ta ˈna IIIraa o te Reich. Aita ratou i tiaturi noa ˈˈe i roto i te faatereraa nazi tae noa ˈtu i te tahi atu faanahoraa politita taa ê. Ua nehenehe ratou i te haapae i te faatereraa a te taata no te mea ua itehia mai te mea maitai aˈe ia ratou. No te reira i ore ai ratou i topa i raro aˈe i te mana o te faatereraa nazi mai te upoo faatere haapaoraa e ta ˈna nana.

Ta ratou tiaturiraa

Eita iho â te mau Ite a Iehova e haamau i ta ratou tiaturiraa i nia i te huru manaˈo politita atoa. Mea au aˈe na ratou te oraraa faahiahia i tǎpǔhia mai e te Atua: te hoê faatereraa faanahohia e a ˈna, o te haamau i te hoê amuiraa apî parau-tia, o te faatitiaifaro i te mau huru fifi atoa o te taata nei. O te Basileia o te Atua taua faatereraa hoê roa no te fenua nei, e tei haamau-aˈena-hia i roto i te mau raˈi, i raro aˈe i te mana o Iesu Mesia ra. — Mataio 6:9, 10; Petero 2, 3:13.

I te mahana 1 no febuare 1933 ra, ua horoa o Hitler i ta ˈna oreroraa parau matamua na roto i te radio. I muri aˈe i to ˈna faahua-parau-raa e e haamaitai mau â oia ia Heremani taatoa, ua titau oia i te feia e faaroo ra ia ˈna, ia horoa ïa no ˈna e no ta ˈna pupu te taime e au i muri iho e haava ˈtu ai ia ˈna ia au i te mau faahopearaa. Ahuru ma piti matahiti i muri aˈe, ta ˈna faatereraa, o tei parauhia na hoi e vai e tausani matahiti, ua hope oia na roto i te haama. Ua haavahia ta ˈna faatereraa: mea ino mau â no te mea i te hoperaa te tamaˈi, ua taui roa oia i to ˈna nunaa, to ˈna fenua e te ao taatoa e tei roto ratou i te mauiui rahi mau.

Auê ïa taa-ê-raa e te tausani matahiti faatereraa a te Mesia o te Bibilia, o Iesu Mesia. Ia hope te reira tau, eita ïa e nehenehe e faaauhia te huru o te mau taata e to te fenua nei i to tatou nei tau peapea mau. A taio atu i tei horoahia maira i roto i te Apokalupo 2:4, 5, e a manaˈo atu i te paradaiso î i te mau taata tia o te fanaˈo nei i te ora i roto i to ˈna auraa mau ma te ore e taiâ noa ˈˈe i te mau opuaraa taparahiraa taata, te tamaˈi aore ra te tahi atu mau tupuraa peapea no roto mai i te mau manaˈo taa ê ino râ, e aita hoê noa ˈˈe mea e haafifi i to ratou oaoa. E riro no oe atoa teie oraraa oaoa i mua nei! — Isaia 35:1-7; 65:17-25; Ioane 1, 2:17.

[Parau iti faaôhia i te api 9]

Ua mataˈu te rahiraa o te ekalesiatiko, katolika e te porotetani i te patoi atu i te faatereraa nazi.

[Parau iti faaôhia i te api 12]

O ta te Atua ïa te faatereraa hoê roa e te papu no te tausani matahiti.

[Hohoˈa i te api 9]

Ua viiviihia te rima o te mau upoo faatere haapaoraa i te toto i to ratou tururaa ia Hitler.

[Hohoˈa i te api 11]

Mai ia Johannes Harms, te hohoˈa ïa i nia nei, e mau tausani Ite a Iehova tei afai-haere-hia i roto i te mau aua hamani-ino-raa, no to ratou farii-ore-raa i te faatereraa nazi. E rave rahi tei pohe, mai teie e haapapuhia nei i nia aˈe.

Paruru no te Fare haavaraa no te nuu a te Reich.

Johannes Harms (...) ua haavahia oia i te 11 no tiurai 1940 i te Fare haavaraa a te nuu no te Reich no to ˈna haaparuparuraa i te itoito o te nuu e ua faautuahia oia i te utua pohe (...). Ua faaotihia te utua i te 1 no atete 1941.

Titiro no te Fare Haavaraa a te nuu no te Reich.