Ei hea ora i orahia e oe?

Na to matou taata papai no Inidia

I TE AFAIRAA to ˈna ahu i nia, ua faaite mai te fatu fare Inidia to ˈna avae feefee ino mau. Ma te faaiteraa i to ˈna avae, ua na ô oia e: “O to ˈu ïa karma, no to ˈu huru oraraa i muri nei.”

Na roto i taua mau parau ra, te faahiti ra oia i te hoê tiaturiraa parare roa i rotopu i te feia faaroo inidia, maori ra ïa ua riro to ratou ora i teie nei ei tuhaa noa no e rave rahi atu â mau fanau-faahou-raa. Te tiaturi nei ratou e ua riro noa to ratou oraraa i teie nei ei auhune no te mau mea o ta ratou i ueue na i to ratou mau oraraa i muri nei e o ta ratou e ueue i teie nei, e ooti ïa ratou i roto i te hoê oraraa a muri atu.

Hoê tiaturiraa parare roa

E ere tei te fenua Inidia anaˈe teie tiaturiraa no nia i te fanau-faahou-noa-raa. Ua papai o S. Radhakrishnan, te hoê raatira haapaoraa inidia e te itehia ra te reira “i roto i te mau haapaoraa e rave rahi o te ao nei”. I te mau vahi atoa o te ao nei — i Afirika, i Asia, i Marite Apatoerau e Apatoa, i roto i te mau motu no Patitifa e i Europa — te tiaturi nei te mau taata e te haere nei te nephe taata nei [âme] i roto i te mau maˈo, te mau moo rarahi pape, te mau mimi tahae, te mau pandas, te mau belettes, te mau iore e te mau manumanu atoa mai te mau manu patia e te mau bousiers. Eita te nephe e haere i roto i te mau animala anaˈe. I Afirika e i Inidia, te taˈu nei te mau vahine fanau ore i te tama i te mau tumu raau o tei tiaturihia e te faaeahia ra e te mau taata i pohe na. Te vai atoa ra teie mau peu i Europa i te anotau Tahito ra.

Mea nafea te itearaahia mai te fanau-faahou-noa-raa aore ra te haere-noa-raa te nephe i roto i te hoê tino taa ê atu? No te aha te mau taata i tiaturi ai i te reira? Mea nafea teie haapiiraa i te haafifiraa i to ratou oraraa?

Te mau tumu

Mai te peu e au ia haere atu te nephe i roto i te hoê tino taa ê atu, eiaha roa ïa ia pohe aˈe oia. Ua haamauhia ïa te tiaturiraa o te fanau-faahou-noa-raa i nia i te haapiiraa o te pohe-ore-raa o te nephe taata nei. No reira, e ite-noa-hia to ˈna mau tumu i ǒ te mau nunaa e tiaturi ra i te pohe-ore-raa te nephe. No reira, ua manaˈo vetahi pae e no Aiphiti tahito mai oia. Te haapapu nei râ vetahi pae e no Babulonia Tahito ra oia, i reira te iteraahia te haapaoraa matamua e ta ˈna mau miterio. Ia tui te roo o ta ˈna haamoriraa huru ê, ua haamau te autahuˈa no Babulonia i te haapiiraa no te haereraa ˈtu te nephe i roto i te hoê tino taa ê i muri aˈe i to ˈna poheraa. E nehenehe atura ta te mau tahuˈa e parau e to ratou mau aito i te pae faaroo e mau nephe anaˈe ïa no te mau tupuna tui roo o tei pohe e râ ê te tau.

E mea ite-roa-hia ˈˈe râ teie nei tiaturiraa i Inidia. Tei mua oia te mau gourous inidia i te fifi rahi no nia i te ino e te mauiui e vai ra i rotopu i te mau taata. Te ani ra ratou e: ‘Nahea ïa e faaauhia ˈtu te reira e te hoê Poiete parau-tia?’ Ua tamata ratou i te tatara te taa-ê-raa e vai ra i rotopu i te parau-tia a te Atua e te mau ati manaˈo-ore-hia e te mau oraraa ona e te oraraa veve o te ao nei. O te “ture o te karma” ïa tei noaa mai ia ratou — ture no nia i te mau tumu e te mau hopearaa. Ua faanaho ratou te hoê huru “tabula” no te mau ohipa maitatai e iino o te oraraa nei e ta ratou atoa mau haamaitairaa aore ra faautuaraa i roto i te oraraa a muri atu.

Te auraa o te parau “karma” e “ohipa” ïa. E parauhia i te hoê taata inidia e e “karma maitai” ta ˈna mai te peu e ua faaau oia ia ˈna i nia i te mau titauraa totiare e faaroo, aore ra, e “karma iino” ta ˈna mai te peu e aita i na reira. Na ta ˈna ïa mau ohipa e rave ra aore ra “karma” e faataa i to ˈna huru oraraa i muri aˈe i roto i to ˈna mau fanau-faahou-raa e rave rahi. Teie ïa te opuaraa hopea, maori ra, te tiamâraa mai ïa i teie nei huru faanahoraa no te tahoê atu i te Varua o te ao taatoa nei. Te tiaturihia ra e e tapae atu i reira, na roto i te faaitoitoraa i te rave i te hoê haerea au e te titauraa i te hoê ite hohonu i te haapaoraa inidia.

Te mau hotu o te fanau-faahou-noa-raa

Ua faataa te philosopho inidia ra o S. Dasgupta i te manaˈo no nia i te oraraa o te hoê taata e tiaturi ra i te fanau-faahou-noa-raa: “Eita roa e manaˈohia e e nehenehe te hoê ohipa e ravehia nei i roto i teie nei oraraa, e faaape i te mau ati o te oraraa o ta oe iho â e farerei atu ia au i te karma o to oe fanauraa i roto i te oraraa i mairi aˈenei.” Ua riro te reira ei hiˈoraa ino no nia i te oraraa nei e no nia atoa i te mau ohipa tia ore i te pae totiare iho â râ.

No te ture o te karma i vai noa ˈi te faanahoraa no nia i te mau pupu taata i roto i te totaiete inidia. Mea nafea ïa te reira? Inaha hoi e te haapii nei teie tiaturiraa e ua riro te mau ohipa a te hoê taata i to ˈna oraraa nei ei hopearaa no to ˈna karma o to ˈna mau oraraa i mutaa iho, eita iho â ïa oia e nehenehe e taui i te huru o to ˈna oraraa nei. Te tatara nei râ o Swani Nikhilananda e: “Na roto i te haapaoraa i te mau hopoia a to ˈna iho pupu, e nehenehe ai te hoê taata e fanau faahou mai i roto i te hoê pupu maitai aˈe.” No reira e mataˈu ïa te hoê taata no te hoê pupu haihai roa, i te patoi atu i te mau ture e te mau peu tuutuu o to ˈna iho pupu. Hau atu â, e mataˈu atoa o ˈna i te utua e ia tiavaruhia o ˈna no te mea e nehenehe e faautuahia e e faaruehia te taata atoa o tei ore e auraro i te mau ture e te mau peu a to ˈna iho pupu e te mau melo no to ˈna iho pupu. No taua mau haamataˈuraa ra, e vai noa ïa e rave rahi milioni taata i roto i te pupu o te mau “taataa viivii roa” e e oraraa veve roa to ratou e aita atoa to ratou e tiaraa i te pae tivila. Noa ˈtu â ïa e ua manuïa te mau taata iriti ture o teie nei tau i roto i ta ratou mau tutavaraa no te faaitiraa te mau hamani-ino-raa farereihia e te feia e parauhia nei e “e mau taata viivii roa”, e mea fifi roa i te faaore i te mau peu a te haapaoraa o tei niu-papu-hia i roto i te hoê totaiete peu tuutuu mai teie te huru.

Te fanau-faahou-noa-raa — E nehenehe anei e tiaturihia?

No te aha te vai nei te mauiui e te taa-ê-raa o te huru o te oraraa i rotopu i te mau taata? O te fanau-faahou-noa-raa anei te tatararaa hoê roa? E nehenehe anei e tiaturi i te reira? Rave anaˈe i te hiˈoraa o te taata avae feefee o te omuaraa o teie tumu parau. No te mea e aita oia i ite te mau tumu no to ˈna maˈi, te manaˈo nei oia e no to ˈna ïa karma. Ahiri hoi e aita oia e ora ra i te vahi î i te naonao e afai ra i te reira maˈi e aore ra ahiri i ite i te fifi o te nehenehe e tupu mai na roto i te naonao e ua rave oia i te mau ravea paruru, eita anei ïa oia e ape i te reira maˈi fifi roa? E ere atura ïa to ˈna mau mauiui ei mau faahopearaa no to ˈna karma, teie râ “e tau râ e te tiaia noa to te taata atoa ra”. — Koheleta 9:11.

I teie nei tau, ua tamata o Mohandas Gandhi e te tahi atu mau raatira politita i te faaiti i te mau haafifiraa o te haapiiraa karma e te fanau-faahou-noa-raa i te na ôraa e: “Ua riro te pupu taata ‘viivii roa’ ei hara rahi i mua i te aro o te Atua e i mua atoa i te taata nei.” Ua haamaitai rii te mau tutavaraa a Gandhi e te tahi atu mau taata e hoê â manaˈo to ratou i te huru oraraa o te mau “taata viivii roa”. E ere anei te reira te tapao e aita te ora o te hoê “taata viivii roa” e vai ra i raro aˈe i te mana a to ˈna karma e e nehenehe ïa e tauihia? Oia mau, e te haapapu mau nei te reira e ua riro teie huru oraraa peapea mau ei faahopearaa no te hoê faanahoraa totiare tahito o te nehenehe e tauihia. Na te taata ïa i faaoti na i te huru oraraa a te hoê aiû “viivii roa” e ere râ na te Atua.

Eaha te nehenehe ia parauhia no nia i te nounou e te viivii i te pae hooraa taoˈa? Te hoê taata i te pae hooraa taoˈa tia ore o te opua e peta i te taata aore ra e faahepo i te taata ia horoa i te moni ma te haamataˈuraa ˈtu ia ˈna, o te reira anaˈe ra ta ˈna e tia i te rave? Mai te peu aita oia e faatura nei i te ture, e ere anei e no te mea e aita oia e faaohipa maitai nei i to ˈna tiamâraa no te maiti? E ere atura i te mea titauhia te mau tiaturiraa no nia i te karma e te fanau-faahou-noa-raa no te faataa e no te aha ra te mau taata e mauiui ai. Ua taa i te feia e feruri nei e riro te mau ati manaˈo-ore-hia, te mau maˈi tupuna e te hoê faaohiparaa hape i te tiamâraa no te maiti ei mau tumu papu no te rahiraa o te mau ati e te taa-ê-raa o te huru o te oraraa i rotopu i te mau taata. — Roma 5:12; Koheleta 7:29.

Te fanau-faahou-noa-raa — E parau mau anei?

No roto mai te haapiiraa o te fanau-faahou-noa-raa i te tiaturiraa i te pohe-ore-raa o te nephe. Mai te peu e e mea pohe te nephe taata nei aita ïa e haapiiraa no nia i te fanau-faahou-noa-raa. I hea e itehia ˈi te mau haapapuraa tano no nia i teie tumu parau? Inaha e te haapii nei te rahiraa o te mau papai faaroo tui roo i te pohe-ore-raa o te nephe na roto mai i te hoê huru aore ra te tahi atu â, e ere râ te reira te manaˈo o te Bibilia.

No nia i te nephe [âme] o te taata, teie ta te Bibilia e parau nei: “A hamani ai te Atua ra o Iehova i te taata i te repo fenua nei, ua haapuai ihora oia i te aho i roto i tana apoo ihu ra riro aˈera te taata ei taata ora [âme aore ra nephe].” (Genese 2:7). No reira atura te taata — taata ora e huti nei i te aho — e nephe [âme] oia. Aita e vai ra ia ˈna te hoê nephe taa ê papu maitai i roto ia ˈna iho, ineine noa i te faarue i to ˈna tino i to ˈna poheraa.

No nia i te pohe teie ta te Genese 3:19 e parau nei: “E amu oe i ta oe maa ma te hou i nia i to rae, e hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.” No reira, i to ratou poheraa, ‘e hoˈi atu’ te mau taata eiaha i roto i te hoê oraraa apî, i roto râ i te “repo”. Te haapapu mau nei te Bibilia e e pohe te nephe taata nei. Eita oia e faarue i te tino pohe no te haere tia ˈtu i roto i te hoê tino taa ê atu. Te haapapu nei te Bibilia e: “O tei [âme aore ra nephe] rave i te hara ra, o te pohe ïa.” — Ezekiela 18:4, 20.

Te hoê tiaturiraa no tei pohe na

Inaha hoi e e pohe te nephe, eaha ïa to tei pohe tiaturiraa? Aita te Bibilia e vaiiho noa nei i te mau taata hara ia faaoti i to ratou oraraa no a muri aˈe na roto i te fanau-faahou-raa e rave rahi î roa i te mauiui e te ati, te parau nei râ oia e: “E tia-faahou-raa to tei pohe te feia parau-tia e te feia parau-tia ore.” — Ohipa 24:15.

Na roto i to ˈna paari e to ˈna aroha faito ore, te haamanaˈo nei Tei poiete i te oraraa i orahia na e te taata tataitahi hou to ˈna poheraa. E te reira, eiaha no te tapao i te mau mea atoa no te haavaraa e te faautuaraa, mai ta te ture a te karma e hinaaro ra ia tiaturi te taata, area râ no te faatia-faahou-raa i te mau taata ma to ratou iho ihotaata e mau huru hou ratou a pohe ai. Te feia e faatiahia i nia i te fenua nei e haavahia ïa ratou ia au i to ratou haerea i muri aˈe i to ratou tia-faahou-raa. I muri iho, i nia i to ratou tiaraa taata, e nehenehe ïa ratou e ora e a muri noa ˈtu i roto i te hoê paradaiso apî i nia i te fenua nei. No te reira, te haapapu nei te Bibilia e: “E ore roa te pohe, e te oto, e te mihi, e te mauiui, e ore atoa ïa no te mea ua mou te mau mea tahito ra.” — Apokalupo 21:4.

[Parau iti faaôhia i te api 29]

Ua parau o Gandhi e: “Ua riro te pupu taata ‘viivii roa’ ei hara rahi i mua i te aro o te Atua e i mua atoa i te taata nei.”

[Hohoˈa i te api 28]

Eaha ta teie nei taata i rave i riro ai mai teie?