Apokalupo

E FETIA TEI MAIRI MAI, E UA HOROAHIA IA ˈNA TE TAVIRI O TE ABUSO.

9 Ua faaoto ihora te pae o te melahi i ta ˈna, ite atura vau i te hoê fetia no nia mai i te raˈi i te mairiraa i nia i te fenua nei, e i horoahia mai te taviri o te abuso ra ia ˈna. 2 Ua iriti aˈera oia i te uputa o taua abuso ra, ua pee aˈera te au auahi i nia no roto i taua apoo ra, mai te au auahi o te hoê umu rahi ra; pouri atura te mahana e te reva i te au auahi o taua apoo ra. 3 Ua haere maira te akaride i nia iho i te fenua nei no roto i taua au auahi ra; e e mana tei horoahia mai no ratou, mai te mana o te mau pata o te fenua nei. 4 E i aˈohia mai ratou e, eiaha e rave noa ˈtu i te mau aihere o te fenua nei, e te mau raau rii ota ra, e te mau raau rarahi atoa ra; o te mau taata râ aore te tapao a te Atua i nia iho i to ratou rae o ratou anaˈe ra. 5 E i aˈohia mai ratou eiaha ratou e rave pohe roa i taua mau taata ra, i haamauiuihia râ ratou, e ia pae aˈe marama: e to ratou mauiui mai te mauiui pata ïa ia tairi mai i te taata ra. 6 E ia tae i te reira anotau e titau te taata i te pohe, e ore râ e noaa, e e nounou ratou i te pohe, e maue ê râ te pohe ia ratou. 7 E te huru o taua mau akaride ra, mai te puaahorofenua ïa i faanehenehehia no te tamaˈi ra; e to nia iho i to ratou mau upoo ra, mai te korona auro te huru, e to ratou mata mai te mata taata nei ïa. 8 E to ratou rouru mai te rouru vahine ïa, e to ratou niho mai te niho liona ïa. 9 E e paruru ouma to ratou mai te paruru ouma auri te huru; e te haruru o to ratou pererau ra mai te haruru pereoo e te puaahorofenua e rave rahi, ia horo i te tamaˈi ra. 10 E to ratou hope ra mai to te pata ra ïa, e e tara tei roto i to ratou mau hope; e e mana to ratou ia rave i te taata e ia pae aˈe marama. 11 E arii hoi to ratou, o te melahi ïa o te abuso ra; o Abadona to ˈna iˈoa i te reo Hebera, area i te reo Heleni ra, o Apoluona ïa. 12 Ua mure atura te hoê pohe; e inaha, e piti â pohe toe, te faaine maira.

13 Ua faaoto maira te tooono o te melahi i ta ˈna, e faaroo atura vau i te hoê reo no ǒ mai i na tara e maha o te fata auro, i mua i te aro o te Atua ra, 14 i te parauraa i te tooono o te melahi i mau i te pu ra, A tatara i na melahi toomaha i tapeahia i te pape rahi ra Eupharate. 15 Tatarahia ihora taua na melahi toomaha ra, ua ineine ratou e ia hoê aˈe hora, e ia hoê hoi mahana, ia hoê hoi marama, e ia hoê matahiti, ia taparahi pohe roa i te toru o te pǔpǔ o te taata nei. 16 E te rahi o taua nuu puaahorofenua ra, e piti ïa muriadiraa i te muriadi, ua faaroo hoi au i to ratou huru i te rahi. 17 E muri aˈera, ite atura vau i te mau puaahorofenua i taua orama ra, e te feia i parahi i nia ihora, e paruru ouma auahi to ratou, e te huakineto, e te gopheri: e te afii o taua mau puaahorofenua ra, mai te afii ïa o te liona ra: e ua puroro maira te auahi, e te au auahi, e te gopheri, no roto i to ratou vaha. 18 O taua na mea e toru ra i pohe ai te toru o te tufaa o te taata nei, o te auahi, e te au auahi, e te gopheri i puroro mai no roto i to ratou vaha. 19 Tei te vaha hoi te puai o taua mau puaahorofenua ra, e tei te aero: mai te ophi hoi to ratou aero, e afii anaˈe, o ta ratou ïa mauhaa e pohe ai te taata. 20 E te toea o te taata ra o tei ore i pohe i teie nei mau pohe, aore ïa i tatarahapa i ta ratou ohipa i rave ra, e eiaha ratou e haamori i te demoni, e te idolo auro ra, e te ario, e te veo, e te ofai, e te raau: o tei ore e tia ia hiˈo ra, e ia faaroo, e ia haere. 21 Aore atoa hoi ratou i tatarahapa i ta ratou taparahiraa taata, e ta ratou tahutahu, e ta ratou faaturi, e ta ratou eiâraa.