Apokalupo
TE HOÊ MELAHI TEI FA MAI, MA TE BUKA ITI HOÊ I TANA RIMA.
10 Ite aturâ vau i te hoê melahi puai i te pouraa mai, mai nia mai i te raˈi, ua vehîa i te ata: e anuanua tei nia i tana upoo, e to ˈna mata mai te mahana ra ïa, e mai te pou auahi ra o ˈna avae. 2 E e buka iti haihai ta ˈna tei te rima, ua maheu, ua titoo ihora i to ˈna avae atau i nia iho i te miti, e to ˈna avae aui i nia iho i te fenua nei. 3 Ua tiaoro hua maira to ˈna reo mai te liona ia oto ra; e oti aˈera to ˈna tiaororaa, ua haruru maira te reo o na patiri e hitu ra. 4 E oti aˈera te haruru o te reo o na patiri e hitu ra, te faaineine ra vau e papai: ite atura vau i te hoê reo no te raˈi mai, i te na ôraa mai ia ˈu e, A taati na i te mau mea a te mau patiri e hitu i parau iho nei, eiaha e papaihia. 5 E te melahi ta ˈu i ite i te tiaraa i nia iho i te miti e i nia iho i te fenua nei, faateitei aˈera ïa i ta ˈna rima i nia i te raˈi, 6 ua tǎpǔ ihora Ia ˈna i te tia i te oraraa e a muri noa ˈtu, o tei hamani i te raˈi, e te mau mea atoa i roto ra, e te fenua, e te mau mea atoa i roto ra, e te tai, e te mau mea atoa i roto ra, e e ore e mahia e tae ai i taua tau ra. 7 Ia tae râ i te tau faaotoraa a te toohitu o te melahi ra, ia faaoto oia i ta ˈna ra pu, ia tupu faaoti roa te parau aro a te Atua i ta ˈna i faaite mai i tana mau tavini i te mau peropheta ra. 8 Ua parau faahou maira ia ˈu taua reo no nia i te raˈi ta ˈu i faaroo ra, na ô maira, A haere, a rave i te buka iti i maheu i roto i te rima o te melahi e tia i nia iho i te miti e i nia iho i te fenua na. 9 Haere atura vau i taua melahi ra, ua parau atura vau ia ˈna, Ho mai na i te buka iti na. Ua parau maira oia ia ˈu, A rave mai, a amu e ia pau; e maramara to opu, area i roto i to vaha na, e momona ïa mai te meli ra. 10 Ua rave atura vau i taua buka iti i roto i te rima o te melahi ra, amu ihora vau e pau aˈera; e mai te meli â te momona i roto i tau vaha; ia pau râ i te amuhia e au ra, maramara ˈtura tau opu. 11 Ua parau maira oia ia ˈu, E tohu faahou â oe i mua i te aro o te mau nunaa e rave rahi, e te mau fenua, e te mau reo ěê, e te mau arii atoa hoi.