Apokalupo

TE HITU O TE TAPAO I VAHIHIA RA, E TE FARAA MAI O NA MELAHI TOOHITU MA TE PU ANAˈE.

8 E ia vahihia e te Arenio te hitu o te tapao taati ra, e faatupuaraa tei nia i te raˈi e mai te hora vaehaa nei te maoro. 2 E ua hiˈo atura vau i na melahi toohitu tei tia i mua i te aro o te Atua ra; e e pue pu e hitu tei hopoihia mai ia ratou ra. 3 Ua haere maira te hoê melahi, tia ihora i mua i te fata ra, ma te auˈa auro i te mauraa; e e mea noˈanoˈa rahi tei hopoihia mai ia ˈna ra, ia pûpû oia ma te pure a te feia moˈa atoa i nia i te fata auro i mua i te terono ra. 4 Pee apipiti atura te au o te mea noˈanoˈa i te rima o taua melahi ra, e te pure a te feia moˈa i nia, i mua i te aro o te Atua ra. 5 Ua rave ihora te melahi i taua auˈa noˈanoˈa ra, faaî ihora i te auahi no nia i te fata ra, ua titiri maira i nia i te fenua: o te haruru ihora, e te patiri, e te uira, e te aueue fenua.

6 Ua faaineine ihora na melahi toohitu i mau i na pu e hitu ra e faaoto. 7 Ua faaoto maira te hoê melahi i ta ˈna, o te ûa paari maira i muri iho, e te auahi i anoihia i te toto, e tiria maira i raro i nia iho i te fenua nei; pau ihora hoi te toru o te tufaa o te mau raau i te amâ, e pau ihora te mau aihere rii ota atoa i te amâ. 8 Ua faaoto maira te piti o te melahi i ta ˈna, e mai te mea ua tiria te hoê mouˈa rahi amâ i te auahi i raro i te miti; riro atura te toru o te tufaa o te miti ra ei toto: 9 pohe atura te toru o te tufaa o te mau mea ora i raro i te tai ra; e te toru o te tufaa o te mau pahi ra, pau ihora ïa.

10 Ua faaoto ihora te toru o te melahi i ta ˈna, ua mairi maira te hoê fetia rahi mai te rǎmǎ ura ra, no nia mai i te raˈi; mairi maira i nia i te toru o te tufaa o te mau anavai ra, e i nia iho i te mau pape pihaa ra: 11 e te iˈoa o taua fetia ra i mairihia o Apesineto ïa: maramara ˈtura te toru o te tufaa o te mau pape ra, mai te apesineto atoa ra ïa, e rave rahi te taata i pohe i te pape no te mea ua maramara.

12 Ua faaoto ihora te maha o te melahi i ta ˈna, tairihia ihora te toru o te tufaa o te mahana, e te toru o te tufaa o te marama, e te toru o te tufaa o te mau fetia; pouri ihora te toru o te tufaa ia ratou ra, aita ra te toru o te tufaa o te maramarama o te ao nei i te anaanaraa mai, e to te po atoa ra hoi.

13 Ua hiˈo atura vau i te hoê melahi i te maueraa na ropu i te reva nei, e te pii-hua-raa te reo e, E pohe, e pohe, e pohe to te feia e parahi i te ao nei i te oto hoi o te pu o na melahi tootoru e fatata i te oto nei.