Iakobo

EIAHA IA NOUNOU I TE TAOˈA, EIAHA ATOA IA TEOTEO, E IA FAARAHI.

4 Nohea te tamaˈi e te mârô i roto ia outou na? e ere anei no ǒ na no to outou hinaaro tia ore ra, o tei tamaˈi noa i roto i to outou tino na? 2 Te nounou na outou, e aore â i noaa: te taparahi na outou i te taata, e te titau hua na, e aita i noaa ta outou e titau na: te tamaˈi na, te aro na, e aita, no te mea aore outou i ani. 3 Te ani ra hoi outou, e aore a outou i noaa, no te mea te hapa na ta outou aniraa, ia pau i te puhurahia e outou i to outou hinaaro tia ore ra. 4 E te mau faaturi tane, e te mau faaturi vahine, aore outou i ite e, o te hinaaro i teie nei ao, e taua au ore ïa i te Atua ra? E teie nei, o tei titau e ei taua oia no teie nei ao, ua taa maite ïa oia, e e enemi ïa no te Atua. 5 Te manaˈo na outou e, e haavare ta te parau i papaihia ra? E faatupu anei te Varua e parahi i roto ia tatou nei i te feii? 6 E ore, e horoa mai râ oia i te maitai e ia rahi mai â. I parau mai ai oia e, E patoi mai te Atua i te feia teoteo, e horoa mai râ i te maitai i te feia haehaa. 7 E tena na, e auraro atu outou i te Atua. E patoi atu i te Diabolo, e na ˈna e maue ê atu. 8 E haafatata ˈtu i te Atua, e na ˈna e haafatata mai ia outou na; E horoi na i to outou rima, e te feia rave hara ra; e tamâ na i to outou aau, e te feia aau piti na; 9 a autâ na outou, a mihi, e ia manii to outou roimata; ia riro hoi to outou ata ei auê, e to outou oaoa ei taiâ: 10 a faahaehaa na outou i mua i te aro o te Atua, e na ˈna outou e faateitei.

11 Eiaha na outou, e au mau taeae, e parau ino te tahi i te tahi; o tei parau ino i tana taeae, e ua faahapa i taua taeae, ua parau ino ïa i te ture, e ua faahapa i te ture: ia faahapa râ oe i te ture ra, e ere ïa oe i te haapao ture, e faahapa râ. 12 Hoê hoi tumu o te ture, e tia ia ˈna ia faaora, e tia hoi ia taparahi pohe roa; o vai hoi oe na a faahapa ˈi ia vetahi ê? 13 E teie nei, o outou o tei parau e, E haere tatou auanei, e ananahi, i roto i te oire ra o mea, a hoo ai e ia hoê aˈe matahiti i te hooraa, e noaa ˈtu te taoˈa: 14 outou hoi o tei ore i ite i te mau mea e tupu ananahi. Eaha hoi to outou oraraa nei? e au auahi ïa, no vaivai aˈe e maoro iti aˈera, mou atura. 15 E na ô râ to outou tia, I tia i te Fatu ra, e ia maoro to tatou aho, e rave ïa tatou i teie, e i tera. 16 I tena na râ, te oaoa na outou i ta outou parau faaahaaha: e mea ino ïa taua oaoa na. 17 E teie nei, o te taata ite i te rave i te mea maitai, e aore i rave, ua riro ïa ei hara na ˈna.