Iakobo

EIAHA TATOU IA RU I TE FAAHAPA IA VETAHI Ê, EIAHA HOI IA RU I TE PARAU.

3 E au mau taeae e, eiaha ia rahi hua i te faaorometua ia outou iho, ua itea hoi e, o tatou te faahapa-rahi-hia. 2 Te hapa nei hoi tatou atoa i te mau mea atoa e rave rahi. E ia ore te hoê taata ia hapa i te parau ra, e te taata parau-tia oia, e tia ia ˈna ia tapea i te tino atoa ra. 3 Inaha, te tavaha nei tatou i te puaahorofenua, ia faaroo mai ratou ia tatou, e te tioioi noa nei tatou i to ratou tino atoa. 4 Inaha hoi te mau pahi, rarahi noâ iho ratou, e puhia-noa-hia e te mataˈi rahi ra, e tioi-haere-hia râ e te hôe iti haihai roa, i te mau vahi atoa ta te faatere e hinaaro ra. 5 Oia atoa te arero nei, e melo iti haihai ïa, e faaahaaha rahi râ ta ˈna. A hiˈo na i te rahi o te vahie e amâ i te auahi iti haihai ra! 6 E auahi atoa te arero nei, e pueraa no te mau ino atoa ra, e viivii te tino atoa nei i te arero, o te huru ïa o to ˈna vairaa i roto i te mau melo nei, i tuia oia iho i te auahi o te po, e te ura nei te mau haerea atoa a te taata i te oraraa nei ia ˈna. 7 E vi anaˈe te mau puaa taehae, e te manu, e te puhi taehae, e te mau mea atoa o te tai ra, ua hope ê na ïa i te haavihia e te taata nei. 8 Area te arero nei, aore ïa e taata e vi ai te reira, e ino morohi ore ïa, ua î i te hora pohe. 9 Te haamaitai nei tatou i te Atua ra i to tatou Metua i te reira: e te faaino nei tatou i te taata tei hamanihia i to te Atua ra hohoˈa i te reira. 10 No roto i taua vaha hoê nei te haamaitai, e te faaino. Eiaha roa te tia te reira, e au mau taeae e. 11 Te ohî nei anei te pape maˈaro e te pape taitai na roto i te apoo hoê ra? 12 E tia anei, e au mau taeae, i te suke ia faahotu mai i te olive? e te vine hoi ia faahotu mai i te suke? eita atoa e noaa te pape maˈaro i te apoo pape taitai.

13 O vai te taata paari e te ite i roto ia outou na? ia na te haapao maitai oia i te faaite mai i ta ˈna ohipa, ma te mǎrû o te paari mau ra. 14 Te vai na te feii rahi, e te mârô i roto i to outou aau, eiaha na e faarahi, a pari haavare ai i te parau mau. 15 E ere hoi te reira paari i to nia mai, no teie nei ao ïa, no te taata nei, e no te mau demoni. 16 Te vai ra hoi te feii e te mârô, tei reira atoa te arepurepu, e te mau parau iino atoa ra. 17 Area te paari no nia maira, e mea anoi-ore-hia ïa, e te mamahu, e te mǎrû, e te faaroo ohie, ua î i te aroha e te hamani maitai, e ore e faahuru ê i te taata, e ore hoi e haavare. 18 E ueuehia te parau-tia ma te hau e te feia e faatupu i te parau hau ra.