Iakobo

IA MǍTAˈU TE TAATA INO E TE TEOTEO I TE ATUA; IA HAAPAO HOI TATOU I TE FAAOROMAI O TE MAU PEROPHETA RA.

5 E tena na, e te feia taoˈa rarahi na, a oto, a auê, i to outou mau pohe rarahi e fatata mai ia outou na. 2 Ua tahuti ta outou taoˈa rahi, e ua pau to outou ahu i te manu. 3 Ua pe ta outou auro, e te ario; e e riro taua pe ra ei faahapa ia outou, e e pau to outou tino i te reira mai te pau auahi ra. Ua haaputu outou i te taoˈa rahi i te mau mahana hopea nei. 4 Inaha hoi te utua a te feia rave ohipa, o tei ooti i te mau aua na outou, e tei tapea-ino-hia e outou na, te pii ra ïa i te Atua ia outou; e te faateni a te feia ooti ra ua puta roa ïa i roto i te tariˈa o te Fatu sabaota ra. 5 Ua parahi outou i te ao nei ma te navenave, e te taiata; ua haaporia outou ia outou iho, mai tei te mahana taparahiraa puaa ra. 6 Ua faahapa outou, e ua taparahi pohe roa outou i te taata parau-tia ra, e aore oia i tahoo mai ia outou.

7 E teie nei, e faaoromai, e au mau taeae, e ia tae mai te Fatu ra. Inaha hoi te faaapu ra, te tiai maite ra oia i te maa maitai o te fenua nei, te faaoromai maite ra hoi i te reira, e ia noaa mai te ûa matamua, e te ûa hopea ra. 8 E faaoromai atoa hoi outou, e faaitoito na i to outou aau; ua fatata roa taua haerea mai o te Fatu ra. 9 Eiaha e tairoiro te tahi i te tahi, e au mau taeae, o te faahapahia mai outou: inaha, te tia noa maira te haava i te uputa. 10 E rave, e au mau taeae, i te mau peropheta, o tei parau mai ma te iˈoa o te Fatu ra, ei hiˈoraa i te haamahuraa i te ino, e te faaoromai. 11 Inaha hoi tatou, te parau nei tatou e, e ao to te feia i tamau maite i te faaoromai. Ua ite outou i te faaoromai o Ioba ra, e ua ite hoi outou i ta te Fatu i rave i te hopea ˈˈe; e ua î te Fatu i te aroha, e te hamani maitai rahi.

12 Area te tǎpǔ noa, e au mau taeae, eiaha roa ˈtu ïa, eiaha e tǎpǔ i te raˈi, eiaha atoa i te fenua, e te mau tǎpǔ atoa ra hoi: ia riro râ ta outou e, ei e; e ta outou aita, ei aita; oi roohia outou i te faahapa.

13 Ua roohia anei te hoê o outou e te ati? a pure oia, te rearea na te tahi, a himene oia i te himene. 14 Te pohe ra anei te hoê o outou i te maˈi? e tii oia i te mau peresibutero o te ekalesia ra, e na ratou e pure ia ˈna, ma te faatahinu ia ˈna i te monoˈi i te iˈoa o te Fatu ra. 15 E e ora taua maˈi ra i te pure faaroo, e na te Fatu oia e faatia i nia; e i rave na oia i te hara ra, e faaorehia ta ˈna hara. 16 E faˈi i ta outou mau hapa, te tahi i te tahi, e pure hoi te tahi i te tahi, ia faaorahia outou. Te pure faauˈana a te taata parau-tia ra, e mea tia-rahi-hia mai ïa. 17 E taata mau â hoi Elia mai ia tatou atoa te huru, e i pure uˈana ˈtura oia, e eiaha ei ûa; aore aˈera hoi e ûa i mairi mai i nia i te fenua, e a toru aˈera matahiti, a ono aˈera hoi marama. 18 Pure faahou atura hoi oia, e ua horoa maira te raˈi i te ûa, ua tupu aˈera hoi te maa o te fenua nei.

19 E au mau taeae ra, ia hahau ê te hoê o outou i te parau mau nei, e na te hoê oia i faahoˈi mai; 20 ia ite mai hoi taua taata ra, e o te faahoˈi mai i te taata hara i taua eˈa hapa na ˈna ra, e varua te ora ia ˈna i te pohe, e hara rahi te moe ia ˈna ra.