Korinetia 1
TE HURU O TA PAULO AˈORAA ˈTU I TO KORINETIA RA.
2 Ia ˈu hoi i haere atu ia outou na, e au mau taeae, aore au i haere atu ma te parau ahaaha e te paari, i te parauraa ˈtu ia outou i te evanelia o te Atua. 2 Ua opua maite au e, aita roa a ˈu parau e faaite atu i ǒ outou na, maori râ o Iesu Mesia e oia i faasataurohia ra. 3 E paruparu hoi to ˈu, e te mǎtaˈu, e te rurutaina rahi i ǒ outou na. 4 E ere hoi ta ˈu parau e ta ˈu aˈoraa i te parau taparu no te paari o te taata nei, i parau atu râ vau ma te faaite papu a te Varua e te mana:
5 ia ore to outou faaroo ia faatumuhia i te paari o te taata nei, i te mana râ o te Atua. 6 E parau paari râ ta matou i te feia i paari ra: e ere râ i te parau paari o teie nei ao, e no te hui tavana o teie nei ao, e tuuhia i raro ra: 7 te parau nei râ matou i te parau paari a te Atua i te parau aro ra, o tei hunahia ra, i te haapao-atea-hia e te Atua hou teie nei ao, ia maitai tatou: 8 o tei ore roa i itea e te hui tavana o teie nei ao ra: (ahiri hoi ratou i ite ra, e ore ratou e faasatauro i te Fatu o te ao.) 9 O tei papaihia ra e, O te mau mea aore i hiˈohia e te mata ra, aore i faaroohia e te tariˈa ra, aore hoi i ô i roto i te aau o te taata ra, o ta te Atua ïa i vaiiho no te feia i hinaaro ia ˈna ra. 10 Ua faaite mai râ te Atua ia tatou i taua mau mea ra i to ˈna Varua; e imi hoi te Varua i te mau mea atoa nei, e te mau mea hohonu atoa a te Atua ra. 11 O vai hoi te ite i te mau mea a te taata nei maori râ o te varua taata i roto ia ˈna ra? oia atoa te mau mea a te Atua, aore roa te hoê i ite, maori râ o te Varua o te Atua. 12 E teie nei, te Varua i noaa ia tatou nei, e ere ïa i to teie nei ao, o te Varua râ no ǒ mai i te Atua ra: ia ite tatou i te mau mea i horoa-noa-hia mai e te Atua no tatou nei. 13 O te mau mea ïa ta matou e parau nei, e ere ra ma te parau haapiihia mai e te paari e te taata nei, o ta te Varua râ i haapii mai; i te faitoraa i ta te varua i ta te Varua ra. 14 E ore râ te taata e haapao i ta te tino ra, e farii mai i ta te Varua o te Atua ra; e mea maamaa ïa ia ˈna, e ore hoi oia e ite i te reira, no te mea, i imihia te reira e te varua. 15 Area o tei haapao i ta te varua ra, te ite ra oia i te mau mea atoa, aita râ oia iho i itehia e te taata atoa nei. 16 O vai hoi te ite i te aau o te Fatu ra? na vai e haapii atu ia ˈna ra? Tei ia matou râ te aau o te Mesia.