Korinetia 1
TE PARAU E AU I TE TAMARII I TE PARAU A TE MESIA RA.
3 E teie nei, aita aˈera i tia ia ˈu, e au mau taeae, ia parau atu ia outou mai te feia e haapao i ta te Varua ra, mai te feia râ e haapao i ta te tino, e mai te tamarii rii ra i roto i te Mesia nei. 2 Ua faaamu hoi au ia outou i te û, aore i te maa etaeta; aore hoi i tia ia outou i reira; e eita atoa e tia ia outou i teie nei. 3 Tei ta te tino â hoi outou i teie nei; te vai ra hoi te feii, e te mârô, e te amahamaha i roto ia outou na, e ere anei tei ta te tino â outou, e mai ta te taata atoa ra ta outou haerea? 4 Te parau na hoi e tahi, No Paulo vau, e te tahi, No Apolo vau, e ere anei tei ta te tino â outou?
5 O vai Paulo, e o vai hoi Apolo, maori râ e orometua i faaroo ai outou na, o ta te Fatu ïa i horoa mai ia mâua atoa nei? 6 Na ˈu hoi i tanu, e na Apolo i faarari i te pape, na te Atua râ i faatupu. 7 E teie nei, aita a te tanu, aita hoi a te faarari-pape, o te Atua râ, o tei faatupu ra. 8 Te tanu, e te faarari-pape ra hoê â ïa: e rave te tahi e te tahi i ta ˈna iho utua e au i ta ˈna ihora ohipa. 9 E hoa rave ohipa hoi matou no te Atua, e aua outou na te Atua; e fare outou no te Atua. 10 No te maitai a te Atua i horoahia mai ia ˈu nei, ua haamau vau i te niu mai te patu fare paari ra, e te patu ra te tahi i nia iho. E haapao maitai râ te taata atoa i te huru o tana paturaa i nia iho i taua niu ra. 11 Aita ˈtu hoi e niu e tia i te taata atoa ia haamau, maori râ o tei haamauhia ra, oia hoi te Mesia ra o Iesu. 12 E teie nei, ia patu te hoê taata i te auro, e te ario, e te ofai maitatai, e te raau, e te nonoha, e te aihere, i nia iho i taua niu ra; 13 e faaitehia ta te taata atoa ra ohipa; na taua mahana ra hoi e faaite, e faataahia ïa e te auahi, e na te auahi e tamata i te huru o ta te taata atoa ra ohipa. 14 Ia toe ta te tahi ra ohipa, ta ˈna i patu i nia iho i taua niu ra, e rave ïa oia i te utua. 15 Ia amâ ta te hoê taata ra ohipa, e ere to ˈna, oia iho râ e faaorahia ïa; mai te mea ra e, i na roto i te auahi.
16 Aita outou i ite e, o te hiero outou o te Atua, e te parahi ra te Varua o te Atua i roto ia outou na? 17 E ia haaviivii te hoê taata i te hiero o te Atua ra, e pohe oia i te Atua; e moˈa hoi to te hiero o te Atua, e taua hiero ra o outou ïa. 18 Eiaha roa ei taata e haavare ia ˈna iho, te manaˈo ra te hoê taata i roto ia outou na, e e taata paari oia i teie nei ao, ia riro oia ei maamaa, ia paari oia. 19 O te paari hoi o teie nei ao, e mea maamaa ïa i te Atua; ua oti hoi i te papaihia e, Te haafifi nei oia i te feia paari i to ratou iho paari. 20 E ua papaihia hoi, Ua ite te Fatu i te manaˈo o te feia paari, e e mea faufaa ore ïa. 21 E teie nei, eiaha roa te hoê e teoteo i te taata. No outou hoi te mau mea atoa nei; 22 o Paulo, e o Apolo, e o Kepha, e teie nei ao, e te ora, e te pohe, e te mau mea e vai nei, e te mau mea a muri atu; no outou anaˈe â; 23 e no te Mesia outou, e no te Atua hoi te Mesia.