Korinetia 1
Te Episetole hoê i to Korinetia ra
TO PAULO AROHARAA ˈTU I TE EKALESIA I KORINETIA RA.
1 O Paulo, i haapaohia e te hinaaro o te Atua ei aposetolo na Iesu Mesia, e to tatou taeae nei o Sositene, 2 i te ekalesia o te Atua i Korinetia na, tei haamoˈahia i roto i te Mesia ra ia Iesu, i haapaohia ei feia moˈa, e te feia atoa e tau atu i te iˈoa o to tatou Fatu ra o Iesu Mesia i te mau vahi atoa ra, to ratou e to tatou atoa hoi: 3 ei ia outou te aroha mau e te hau, no ǒ mai i te Atua i to tatou Metua ra, e no ǒ hoi i te Fatu ra ia Iesu Mesia.
4 Te haamaitai nei au i tau Atua ia outou aita e faaea, i te maitai a te Atua i horoahia mai e te Mesia ra e Iesu ia outou na; 5 ua rahi hoi ta outou ia ˈna i te mau mea atoa nei i te mau parau atoa e te ite: 6 e ua faaite-papu-hia te parau o te Mesia i roto ia outou na. 7 E aita aˈenei outou i mairi i muri i te mau maitai atoa nei, i te tiairaa i to tatou Fatu ia Iesu Mesia i te faraa mai: 8 na ˈna e haapapu ia outou e tae noa ˈtu i te hopea, eiaha ei faainoraa, i te mahana o to tatou Fatu o Iesu Mesia ra. 9 E parau mau ta te Atua, i haapaohia ˈi outou no te amuiraa a ta ˈna Tamaiti a to tatou Fatu a Iesu Mesia ra.
10 E teie nei, e au mau taeae, te aˈo atu nei au ia outou i te iˈoa o to tatou Fatu ra o Iesu Mesia, e ei parau hoê ta outou atoa na, e eiaha ia amahamaha i roto ia outou: ia ati maite râ outou ma te aau hoê e te manaˈo hoê. 11 Ua faaitehia mai au ia outou, e au mau taeae, e to te fetii o Heloe e, e mârôraa tei roto ia outou. 12 Teie ta ˈu parau, te parau anaˈe na outou e, No Paulo vau; e no Apolo vau; e no Kepha vau; e no te Mesia vau. 13 Ua amahamaha anei te Mesia? e o Paulo anei tei faasataurohia no outou? e i bapetizohia anei outou i roto i te iˈoa o Paulo? 14 Te haamaitai nei au i te Atua i te mea aore au i bapetizo i te hoê o outou na, maori râ o Kerisepo e o Gaio; 15 o te parau te tahi taata e, ua bapetizo vau ia ˈna i roto i to ˈu nei iˈoa. 16 E ua bapetizo atoa vau i te fetii o Setephano; aita ˈtu a ˈu taata i ite i te bapetizoraa vau.
17 Aore hoi te Mesia i tono ia ˈu e bapetizo, e parau haere râ i te evanelia; eiaha râ ma te paari parau, o te riro hoi te satauro o te Mesia ra ei mea faufaa ore. 18 O te parau hoi i te satauro nei, e parau maamaa ïa i te feia e pohe; area ia tatou ia faaorahia nei, o te mana ïa o te Atua. 19 Ua papaihia hoi e, E faaore au i te paari o te feia paari, e e faariro vau i te ite o te feia i ite ra ei mea faufaa ore. 20 Teihea te taata paari? teihea te papai parau? teihea te taata mârô i te parau o teie nei ao? e ere anei ua faariro te Atua i te paari o teie nei ao ei maamaa? 21 Aore aˈera to te ao i ite i te Atua i to ˈna iho paari, i te ravea paari a te Atua ra, hinaaro aˈera te Atua i te faaora i te feia i faaroo i te mea maamaa i te aˈo. 22 Te ani ra hoi te ati Iuda i te tapao, e te titau ra te Heleni i te paari; 23 te parau nei râ matou i te Mesia faasataurohia ra, e turoriraa no te ati Iuda, e e mea maamaa i te Heleni. 24 Area i te feia i haapaohia ra, te ati Iuda e te Heleni atoa, o te mana ïa o te Atua, e te paari o te Atua, te parau i te Mesia nei. 25 E paari rahi hoi to te mea maamaa a te Atua nei, i to te taata nei paari; e puai rahi to te paruparu o te Atua, i to te taata nei puai.
26 Te ite na hoi outou, e au mau taeae, i to outou parauraahia, e aita rea e taata paari i te haapaoraa i te tino nei, aita rea e taata mana, aita rea e taata teitei fanau i parauhia. 27 Ua maiti râ te Atua i te mau mea maamaa o te ao nei, ei faahaama ˈtu i te feia paari; e ua maiti hoi te Atua i te mea paruparu o te ao nei, ei faahaamaraa ˈtu i te feia puai; 28 e te mau mea haehaa o te ao nei, e te mau mea i vahavahahia ra, e te mau mea aore ra, o tei maitihia ïa e te Atua, ei faaore i te mau mea e vai nei. 29 Ia ore roa te taata nei ia teoteo i mua ia ˈna. 30 E teie nei, tei roto outou i te Mesia ra ia Iesu ia ˈna, o tei faarirohia e te Atua ei paari, e ei parau-tia, ei maitai, e ei ora no tatou: 31 ia au i tei papaihia ra e, O te oaoa ra, e oaoa oia i te Fatu.