Ohipa

TE AˈO A PAULO I TESALONIA RA; E TE FAAROO O TE TAHI PAE, E TE HAMANI INO O TE TAHI PAE.

17 Haere atura râ na Amephipoli e Apolonia, e tae atura raua i Tesalonia, e sunago to reira no te ati Iuda. 2 Ua tomo atura Paulo i roto ia ratou ra, o ta ˈna ïa peu, e a toru aˈera sabati i te parauraa ˈtu ia ratou i te parau i papaihia ra, 3 i te haamahorahoraraa i taua parau ra, e te faaite-papu-raa ˈtu e, ia pohe â te Mesia, e ia tia faahou mai mai te pohe mai ra e tia ˈi; e te parauraa ˈtu e, Teie hoi te Mesia o Iesu nei â ta ˈu e parau atu ia outou na. 4 Ua faaroo maira e tahi pae, e ua amui atoa maira ia Paulo raua o Sila, e to te Heleni haamori Atua e rave rahi, e te mau vahine mana hoi e ere i te mea iti.

5 Area te ati Iuda faaroo ore ra, î aˈera ïa i te feii; e ua haaputuputu maira ratou i te taata iino haapao atâ ra, e putuputu aˈera ua tiarepu ihora i taua oire ra, haaati atura i te fare o Iasona, titau atura ia raua e arato mai i rapae au i te vahi taata. 6 E aore aˈera raua i itea, ua arato maira ratou ia Iasona e i e toofanu hoi no te mau taeae, i te feia haava i taua oire ra, pii atura, O te mau taata orure hau teie i te mau fenua atoa nei, e teie mai nei â hoi: 7 e i fariihia mai raua e Iasona, e eita anaˈe e au ta ratou parau i ta Kaisara, i te na ôraa maira hoi e, Te vai ê atura te hoê Arii, o Iesu. 8 Aehuehu atura te taata e te feia haava o taua oire ra ia ratou, i te faarooraa i taua parau ra. 9 E mahoru ihora ratou ia Iasona ma, ua tuu atura ratou ia ratou.

10 Ua tuu atura te mau taeae ia Paulo raua o Sila i reira ra i Berea i te rui; e tae atura raua i reira, ua tomo atura i roto i te sunago o te ati Iuda. 11 E maitai mau to ratou i to Tesalonia, ua farii noa hoi ratou i te parau ma te aau mahora, e te imiraa i te parau i papaihia ra i te mau mahana atoa hoi i taua parau ra. 12 E feia rahi maira to ratou i faaroo, e te mau vahine Heleni mana ra, e te tane atoa, e ere i te mea iti. 13 Ite aˈera râ te ati Iuda i Tesalonia ra, e te parauhia ra e Paulo te parau a te Atua i Berea, ua haere atoa maira ratou i reira, ua tiarepu ihora i te taata. 14 Ua tuu atura te mau taeae ia Paulo i reira ra e faahua haere oia na tai, area Sila raua o Timoteo parahi ihora i reira, 15 E te feia i aratai ia Paulo ra, aratai atura ratou ia ˈna i Ateno, poroihia maira ratou ia Sila raua o Timoteo e haere etaeta mai ia ˈna ra, reva mai nei ratou.

16 To Paulo ra hoi tiairaa mai ia raua i Ateno, aroha roa ˈtura to ˈna varua i roto ia ˈna ihora, i te hiˈoraa ˈtu oia i taua oire ra, ua î roa i te idolo. 17 Ua parau atura oia i te ati Iuda i roto i te sunago ra, e te feia e haamori Atua i reira ra, e i ta ˈna hoi i farerei atu i te hooraa ra, aita e mahana tuua. 18 Ua mârô mai ia ˈna o e toofanu mau philosopho Epikuro e te Setoiko; ua na ô aˈera hoi e toofanu, E nahea maira teie nei taata iti raveauru ia parau mai? ua na ô aˈera e tahi pae, E mea huru demoni ěê ta ˈna e parau haere nei, no te mea i faaite atu oia ia ratou ia Iesu e te tia-faahou-raa o te taata nei. 19 Ua rave aˈera ratou ia ˈna, aratai atura i te Areopago, ua na ô maira, A faaite mai ia matou i tena na parau apî ta oe e haapii na. 20 E parau huru ê hoi ta oe e hopoi mai i to matou nei tariˈa, te hinaaro nei matou ia ite i taua mau parau na i te huru. 21 (Aore â hoi a to Ateno atoa, e te taata ěê e parahi i ǒ ratou ra ohipa ê, maori o te faaroo e te parau i te parau rii apî.)

22 Ua tia aˈera Paulo i nia i rotopu i te Areopago, na ô atura, E te mau taata no Ateno nei, e rahi hua to outou mataro i te haamori i te demoni, ua ite iho nei au. 23 Ia ˈu hoi i hahaere noa iho nei e te hiˈo-noa-raa ˈtu i ta outou e haamori nei, ite atura vau i te hoê fata e te parau papaihia i nia iho, Na te Atua itea ore. O ta outou hoi e haamori noa nei ma te ite ore ia ˈna, oia ta ˈu e parau atu ia outou nei. 24 O te Atua i hamani i teie nei ao, e te mau mea atoa i roto ra, te Fatu o te raˈi e te fenua nei ra, aore ïa i parahi i roto i te hiero i hamanihia e te rima taata nei. 25 Aita a ˈna faufaa i noaa i te rima taata mai te mea e, i toe te hoê mea iti ia ˈna, oia iho hoi tei horoa mai i te ora, e te aho, e te mau mea atoa, i te mau mea atoa nei; 26 e na ˈna i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei, e ua haapao i te tau i haapaohia i mutaa ihora, e te otia o to ratou ra parahiraa; 27 ia imi ratou i te Fatu, peneiaˈe o te perehahu atu ratou ia ˈna e itea ˈtu, aita râ oia i atea ê atu ia tatou atoa nei: 28 no ˈna hoi to tatou ora, e i hahaere ai, e i parahi ai hoi; mai ta ve toofanu o to outou mau rohipehe i parau maira e, E tamarii atoa tatou na ˈna. 29 E teie nei, e tamarii tatou na te Atua ra, eita e tia ia manaˈo tatou e e au te Atua i te auro, e te ario, e te ofai i taraihia i te aravihi e te ravea paari a te taata nei. 30 Aita ˈtura te Atua i haapao i taua mau anotau ite ore ra, teie nei râ, te aˈo mai nei oia i te taata atoa e tatarahapa, eiaha ei vahi toe: 31 no te mea ua haapaohia e ana te mahana e haava mai ai oia i to te ao atoa nei ma te parau-tia, i te taata i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira.

32 Ite aˈera râ ratou i te parau i te tia-faahou-raa i tei pohe ra, ua tâhitohito maira e tahi pae; na ô maira hoi e tahi pae, E faaroo faahou atu matou ia oe i tena na parau. 33 Haere atura Paulo mai rotopu atu ia ratou ra. 34 Ua faaroo mai râ te tahi pae taata e ua amui maira ia ˈna; Dionusio Areopago e tahi, e te hoê vahine o Damarisi te iˈoa, e o e toofanu mau taata iho hoi.